Gobierno del Principado de Asturias

Asturias, mucho más cerca

Estás en

Aniciu Temes Agricultura y montes Politica Forestal Información xeneral y historia
 

Politica Forestal

Información xeneral y historia

La llexislación nacional y autonómica vixente estrema dos grandes grupos de propiedá forestal: los montes públicos y los montes privaos.

Son públicos los montes de titularidá d'una alministración o entidá de derechu públicu existiendo n'Asturies montes de titularidá del Estáu (pelo menos unu) y tamién de la Comunidá Autónoma del Principáu d'Asturies (alredor de 25 montes), anque los titulares más comunes d'esti tipu de propiedá son les entidaes locales (conceyos y parroquies rurales, con unos 400 montes) que na so mayoría son tamién comunales. Los montes públicos son xeneralmente grandes finques, rondando la so superficie media les 800 hectárees si atendemos a los datos de los que fueron catalogaos d'utilidá pública.

D'alcuerdu a los datos del Inventariu Forestal Nacional (cuartu IFN ellaboráu pol Ministeriu d'Agricultura) y a los rexistros y datos de que disponen dellos órganos de l'Alministración del Gobiernu del Principáu d'Asturies, na nuestra comunidá autónoma de les 770.549 hectárees forestales existentes (datu del añu 2010), aprosimao'l 42 % trátase de montes públicos, siendo los demás de propiedá particular, colo qu¡esti réxime ye dominante, con más de 446.000 hectárees d'estensión superficial.

Los montes privaos o particulares son los pertenecientes a persones físiques o xurídiques de derechu priváu, yá sía individualmente o en réxime de copropiedá. Dientro d'esti grupu, el nuestru ordenamientu xurídicu incluye los denominaos Montes vecinales en mancomún (MVMC), los Montes de socios (n'Asturies denominaos 'Montes proindiviso'), los montes de les empreses y otres persones xurídiques, y los particulares de les persones físiques (y families).

La historia contemporánea de la propiedá forestal privada n'Asturies ta íntimamente influyida tanto poles desamortizaciones d'últimos del sieglu XVIII y a lo llargo del sieglu XIX hasta primeros del XX, como pol procesu siguíu y menos conocíu del accesu a la propiedá de la tierra (y los montes colectivos) por parte del campesinao por aciu la redención de censos y foros, sobre manera nel centru y occidente de la provincia. Asinamesmo, la perda de la personalidá xurídica de los pueblos amazcara la existencia, pelo menos a principios del sieglu XIX, de les comunidaes de réxime xermánicu que pasen a ser consideraes patrimoniu comunal de los conceyos constitucionales y van volvese a reconocer hasta finales de los años sesenta del pasáu sieglu XX.

Tanto les desamortizaciones (nel casu de la venta de propios y comunes de los pueblos) como les redenciones de censos y foros (dalgunos previamente desamortizaos) dieron pie a los llamaos montes proindiviso (conocíos como montes de socios n'otros sitios d'España).

El Serviciu de Montes a últimos del añu 2011 acabó un trabayu de recopilación d'información sobre les anuncies de ventes de montes de más de 10 hectárees de superficie publicaes nel Boletín Oficial (BOPO) pola Comisión Principal de Ventes de bienes nacionales de la provincia d'Uviéu. Revisáronse tolos boletinos dende mayu del añu 1855 (añu de publicación de la Llei xeneral de desamortización de 1 de mayu de 1855) hasta marzu de 1924, añu nel que cola aprobación y publicación del Estatutu Municipal de Calvo Sotelo se deroguen definitivamente les lleis desamortizadores de los bienes de los pueblos.

Non tolos montes públicos que foron puestos a puya llegaron a ser vendíos (al quedar munches de les puyes ermes). L'historiador, y reconocida autoridá p'Asturies nel tema, José María Moro Barreñada, en publicaciones del año 1976 evalúa nunes 16.000 les hectáreas de finques rústiques de los pueblos que foren efectivamente vendíes, ente les que s'incluyíen los sos montes de propios y comunes.

En cualquier casu na llista que s'axunta apaecen reseñaos los datos de 380 montes o finques forestales de más de 10 hectárees que se publicaron pa la so venta pol Estáu (Ministeriu de Facienda) en puya pública.

Icono gráfico alusivo al tipo de archivo Llista de montes (Pdf: 160 Kb)