Gobiernu del Principau d'Asturies

Asturies, muncho más cerca

Tas en

Asturias.es Families Proteición y derechos de la infancia Protección de los menores
 

Proteición y derechos de la infancia

Protección de los menores

Midíes nueves pa la prevención y protección de los menores frente a la delincuencia de naturaleza sexual.

L'artículu 13.5 de la Llei Orgánica 1/1996, de 15 de xineru, de Protección Xurídica del Menor, de cambéu parcial del Códigu Civil y de la Llei d'Enxuiciamientu Civil, introducíu pola Llei 26/2015, de 28 de xunetu, de cambéu del sistema de protección a la infancia y a l'adolescencia, dispén que:

“Va ser requisitu pal accesu y exerciciu a los oficios y actividaes qu'impliquen contactu habitual con menores, el nun ser condergáu por sentencia firme por dalgún delitu contra la llibertá y indemnidá sexual, qu'incluye l'agresión y abusu sexual, acoso sexual, exhibicionismu y prevocación sexual, prostitución y esplotación sexual y corrupción de menores, asina como por trata de seres humanos. D’esta miente, quien pretenda l'accesu a tales oficios o actividaes tendrá d'acreitar esta circunstancia por aciu l'aportación d'una certificación negativa del Rexistru Central de Delincuentes Sexuales”.

Coles mesmes, apocayá aprobóse’l Real Decretu 1110/2015, de 11 d'avientu, pol que se regula'l Rexistru Central de Delincuentes Sexuales (BOE de 30 d'avientu del 2015) que yá regula'l conteníu y los datos inscritos nesi Rexistru.

De resultes de la normativa señalada y n'ares a la protección de los menores, toles  persones que pretendan exercer los oficios y actividaes qu'impliquen contactu habitual con menores tendrán d'apurrir a l'Alministración pública competente, antes del entamu de la so rellación estatutaria o llaboral, una certificación negativa del Rexistru Central de Delincuentes Sexuales o'l consentimientu pa que la Alministración competente pueda consultar directamente estos datos. De la mesma manera, les Alministraciones públiques van poder solicitar a toles persones coles que caltengan una rellación estatutaria o llaboral y que tean exerciendo oficios y actividaes qu'impliquen contactu habitual con menores d'edá, que presenten una certificación negativa del Rexistru Central de Delincuentes Sexuales o'l consentimientu pa que l’Alministración pueda consultar directamente estos datos.

Pa que toles unidaes alministratives del Principáu d'Asturies puedan cumplir les obligaciones establecíes de forma eficaz y eficiente, dende'l pasáu llunes día 7 de marzu del 2016 tienen accesu al serviciu electrónicu de consulta d'Inesistencia d'Antecedentes Penales por delitos sexuales. D'esta miente, l'Alministración puede recabar d'oficiu la información con consentimientu del afectáu pola consulta.