Gobiernu del Principau d'Asturies

Asturies, muncho más cerca

Tas en

Asturias.es Temes Ganadería Sanida Animal Avispón Asiáticu (Vespa velutina nigritorax)
 

Sanida Animal

Avispón Asiáticu (Vespa velutina nigritorax)

Estratexa pa la detección y control del Avispón asiáticu o Aviespa negra (Vespa velutina nigritorax) nel Principáu d'Asturies

Les invasiones biolóxiques son causantes d'importantes consecuencies a nivel ecolóxicu, económicu y social. Les especies de flora invasora tienen efectos negativos sobre la biodiversidá y el funcionamientu de los ecosistemes al traviés d'efectos directos y indirectos, qu'incluyen la competencia interespecífica, los cambeos a nivel microclimáticu y les interferencies nel réxime de perturbaciones y ciclos de nutrientes. Por cuenta de los sos impactos ecolóxicos, de cutiu catastróficos, anguaño considérase que les invasiones biolóxiques son la segunda causa de perda de biodiversidá a nivel mundial, tres l'alteración y destrucción d'hábitats.

L'Avispón asiáticu (Vespa velutina) ye una especie d'himenópteru alóctonu, orixinariu del norte de la India, del que se describieron una docena de subespecies. Ente elles, la Vespa velutina nigrithorax, ye la subespecie exótica invasora que llegó de forma accidental a Francia nel añu 2004. N'España detectóse pela primer vez n'añu 2010 en Navarra, dende onde s'estiende a tola cornisa cantábrica. N'Asturies los primeros exemplares viéronse nel occidente, nel añu 2014, procedente d'un focu de Galicia, y nel oriente nel añu 2016, procedente de la estensión pol cantábricu. Nel añu 2018 constátase la so presencia na práctica totalidá de la rexón.

Esta especie yá foi incluyida nel Real Decretu 1629/2011, de 14 de payares, pol que se regula'l llistáu y catálogu español d'especies exótiques invasores y ta ente les especies recoyíes nel Decretu 630/2013, de 2 d'agostu, pol que se regula'l catálogu español d'especies exótiques invasores.

A nivel européu esta especie ta recoyida nel Reglamentu d'Execución (UE) 2016/1141 de la Comisión, de 13 de xunetu de 2016, pol que s'adopta una llista d'especies exótiques invasores esmolecedores pa la Unión de conformidá col Reglamentu (UE) númberu 1143/2014 del Parllamentu Européu y del Conseyu.

Esta especie ta provocando anguaño un impactu importante en cuatro vertientes:

-Sobre la biodiversidá, pola so depredación sobre otros himenópteros (abeyes, avispones, aviespes) y otros insectos.
-Sobre la seguridá de les persones, magar nun ye una especie agresiva, l'allugamientu de niales n'edificaciones, poblaciones y llugares próximos a viviendes, puede llevar un riesgu por manipulación involuntaria de los mesmos.
-Sobre la producción apícola, directamente por depredación y indirectamente pol estrés provocáu nos truébanos.
-Sobre dellos cultivos agrícoles, puede causar perdes económiques graves sobre los árboles frutales (pumares), arándanos, viñeos y otros.

En febreru del 2018, la Conseyería d'Infraestructures, Ordenación del Territoriu y Mediu Ambiente, cola collaboración del Comité Asesor, formáu por representantes de l'Alministración y de los sectores implicaos, ellabora'l Plan d'actuación pa la detección y control del avispón asiáticu (Vespa velutina) nel Principáu d'Asturies (BOPA 01/03/2018), que'l so oxetivu principal ye amenorgar no posible la dispersión y l'asentamientu de la invasora nel territoriu cola mira de minimizar los daños causaos tanto a la biodiversidá como a la economía y a la seguridá de les persones.

Dada la importancia de la participación ciudadana, tanto na colocación de trampes como na posterior notificación de niales creóse una plataforma al efecto pa recoyer, rexistrar y actuar énte la presencia de niales d'esta especie invasora.

Los avisos de niales de Vespa velutina pueden realizase d'esta miente:

- www.avisap.es
- info@avisap.es
- WhatsAp: 610 255 111
- Tfno: 984 249 165

 

 Estrategia Vespa velutina (pdf: 2.259 kb) (n'español)

- Plan d'Actuación pa la Detección y Control del Avispón Asiáticu (Vespa velutina nigrithorax) nel Principáu d'Asturies