Gobiernu del Principau d'Asturies

Asturies, muncho más cerca

Tas en

Asturias.es Temes Seguridá pública Seguridá ciudadana Unidá de Policía Adscrita del Principáu d'Asturies
 

Seguridá ciudadana

Unidá de Policía Adscrita del Principáu d'Asturies

Información sobre la nueva Policía autonómica.

Unidá de Policía Adscrita del Principáu d'Asturies

La Unidá de Policía Adscrita al Principáu d'Asturies, qu'entró en funcionamiento'l pasáu mes de payares, ye frutu del alcuerdu de collaboración firmáu ente'l Ministeriu del Interior y el Principáu d'Asturies en desarrollu de lo dispuesto nel artículu 20.2 del nuesu Estatutu d'Autonomía, dientro de la voluntá y el compromisu de collaboración institucional alcanzáu col Gobiernu d'España.

 

El Principáu d'Asturies exerce la competencia funcional sobre esta Unidá que s'encarga de la vixilancia y protección d'edificios ya instalaciones del Principáu, de la protección y escolta d'autoridaes y del control ya inspección en materia de xuegu y apuestes.

 

La Unidá de Policía ta compuesta por 78 miembros de les diverses escales y categoríes del Cuerpu Nacional de Policía, sicasí nesta primer fase d'adscripción disponemos de 55 efectivos, al frente de los que s'alcuentren un Xefe de Sección con categoría d'Inspector Xefe y 2 Xefes de Grupu con categoría d'Inspectores.

 

La media d'edá de la Unidá de Policía ye de 35 años y un 18% de los sos integrantes son muyeres, 2 d'elles Oficiales, superando asina en 10 puntos porcentuales la media nacional de presencia de muyeres nel Cuerpu Nacional de Policía.

 

Distintivos

Los qu'integren esta Unidá Policial lleven la bandera oficial de la Comunidá Autónoma del Principáu d'Asturies na manga derecha del uniforme y l'escudu na prenda de cabeza y visten l'uniforme del Cuerpu Nacional de Policía.

Dotación

Dispón de 10 vehículos  y de los más modernos equipos de comunicaciones, dientro del Sistema Integral de Radiocomunicaciones Dixitales d'Emerxencia del Estáu. La incorporación a tala Rede de Comunicaciones realizóse por aciu de la firma d'un conveniu soscritu col Ministeriu del Interior y  permítenos formar parte d’un sistema desplegáu por tol territoriu español.

Funciones

La Unidá de Policía ocúpase de los servicios de vixilancia y protección d'edificios de titularidá del Principáu d'Asturies y de coordinar y controlar les funciones de seguridá asignaes a les empreses de seguridá privada. Amás, ta previsto  l'establecimientu de planes concretos de protección dinámica pa dar respuesta a situaciones específiques n'algunos centros, reforciando los dispositivos policiales d’ámbitu nacional y municipal establecíos.

Control ya Inspección del Xuegu

El control ya inspección del xuegu y apuestes ha efectuase por un Grupu especializáu que yá ta creáu por Resolución del Director Xeneral de la Policía. Les places han ser convocaes y asignaes próximamente. Esti grupu tien d'encargase de la vixilancia ya inspección del cumplimientu de la normativa de la Comunidá Autónoma en materia de xuegu, incluyendo casinos, sales de bingu, salones recreativos y otros establecimientos públicos onde practiquen xuegos d'azar.