Gobierno del Principado de Asturias

Asturias, mucho más cerca

Estás en

Aniciu Temes Agricultura y montes Politica Forestal El Catálogu de montes d'utilidá pública del Principáu d'Asturies ...
 

Politica Forestal

El Catálogu de montes d'utilidá pública del Principáu d'Asturies (CMUP)

Montes declaraos d'utilidá pública por cuenta de la so importancia biolóxica, hidrolóxica, ecolóxica, económica, forestal o social

El Catálogu de montes y el conceutu d'utilidá pública forestal

El Catálogu de Montes d'Utilidá Pública del Principáu d'Asturies (CMUP) ye un rexistru públicu de calter alministrativu nel que tán inscritos tanto aquellos montes declaraos d'utilidá pública, enantes de la entrada n'usu de la Llei 3/2004, como los montes que lo seyan no socesivo.

Pueden declarase d'utilidá pública toos aquellos montes de propiedá o titularidá pública (pertenecientes al Estáu, al Principáu d'Asturies, a les entidaes llocales y a otres entidaes de derechu públicu) que cumplen dalgunu de los supuestos reseñaos nel artículu 8 de la Llei 3/2004, de 23 de payares, de Montes y Ordenación Forestal del Principáu d'Asturies

Los supuestos del artículu 8 tán rellacionaos cola proteición del suelu escontra la erosión, la defensa de les cabeceres de les cuenques hidrográfiques, la regulación del réxime hidrolóxicu evitando ádenes, riaes, inundaciones, la defensa escontra argayos o escontra'l vientu, la proteición de poblaciones, infraestructures y semes, la conservación de la biodiversidá, la proteición de flora y fauna o la conservación de la diversidá xenética y tamién la producción maderera d'alta calidá y el desarrollu rural.

El conceutu de monte d'utilidá pública (MUP) ta venceyáu en gran midida a la situación económica d'España a lo llargo del sieglu XIX. L'estáu de bancarrota axixó de manera espectacular el desendolcu de los procesos desamortizadores, inspiraos nes idees lliberales que tamién sobrevaloraben la propiedá privada de la tierra como panacea del desendolcu. Dende l'añu 1855 les ventes ficiéronse estensives a los montes de los pueblos y de los conceyos (desamortización xeneral de Madoz) perdiéndose gran parte de la titularidá pública de los nuesos montes ya incrementándose de forma alarmante l'estáu de deforestación del nuesu país.

Gracies a la fuerte presión y l'apasionada actividá desendolcada por estremaos coleutivos (Alministración forestal, intelectuales, téunicos y científicos, conceyos, pueblos y vecinos) consiguióse sacar de la venta tanto los montes que se declararan d'usu comunal y les deveses de vacuno, como aquellos montes que'l Gobiernu entendiera, por mor al so interés y relevancia, que nun teníen que vendese en puya pública remaneciendo en propiedá o titularidá pública pa beneficiu tanto de los sos usufructuarios y titulares, como de la sociedá en xeneral. Ye importante facer referencia, pa entender el conceutu d'utilidá pública forestal, al Real Decretu de 26 d'ochobre de 1855 (Ministeriu de Fomentu) pero sobre too facer la llectura detenida del informe que dio batura al mentáu Real Decretu (Memoria de la Xunta Facultativa del Cuerpu d'Inxenieros de Montes sobre desamortización forestal, 8 d'ochobre de 1855).

De resultes del Real Decretu anterior entama, per primer vez con feliz ésitu, un inventariu completu de la bayura forestal d'España qu'amás clasifica los montes con criterios científicos (Clasificación de Montes públicos de 1859 y Catálogu de montes públicos nun siendo la desamortización de 1862) al envís de determinar qué montes públicos nun han vendese pol papel económicu que xueguen pa los sos titulares y el serviciu y beneficios ecolóxicos xenerales qu'apurren a tola sociedá.

El conceutu d'utilidá pública forestal defínese llegal y definitivamente nel artículu 1 del Real Decretu de 20 de setiembre de 1896. Van declarase Montes d'utilidá pública y polo tanto llibres de la desamortización aquelles “Mases d'arboláu y terrenos forestales que poles sos condiciones d'asitiamientu de suelu y d'área seya preciso caltener poblaos o repoblar de vexetación arbórea forestal pa garantizar, pola so influyencia física nel país o nes comarques naturales onde tenga'l so asientu, la salú público, el meyor réxime del agua, la seguridá de los terrenos o la fertilidá de la tierra empobinao a l'agricultura, revisándose a xeitu con esti criteriu l'actual catálogu de los montes escartaos por especie y cabida”.

El Catálogu de montes d'utilidá pública d'Asturies asoléyase pa la so información pública nel Boletín oficial de la Provincia d'Uviéu nel añu 1900 (suplementu al nu 159 de fecha 16 de xunetu). Dempués, con pequeños cambeos, asoléyase na Gaceta de Madrid nel añu 1901 (en dellos númberos) en resultancia d'un cambéu del trámite alministrativu d'aprobación.

Ye nel añu 1907 cuando la Real Orde del Ministeriu de Fomentu de 19 de xunetu aprueba definitivamente'l Catálogu de montes d'utilidá pública de la Provincia d'Uviéu con delles esclusiones y cambeos no que cinca al asoleyáu en 1901.

Anguaño esisten n'Asturies 364 montes declaraos d'utilidá pública que son titularidá de 70 propietarios estremaos, como'l propiu Principáu d'Asturies (22 montes), pasando per 40 Conceyos, 28 Parroquies Rurales y una Xunta Alministrativa (entidá llocal menor). La pertenencia d'estos montes ye a comuña (sacante los del Principáu d'Asturies y dalgún patrimonial de daqué Conceyu) de munchos pueblos y entidaes de población representaes polos 69 titulares alministrativos llocales enantes indicaos.

No tocante a estos montes de les entidaes llocales, la gran mayoría d'ellos son namás d'un titular alministrativu (Conceyu o Parroquia Rural) que representa a una o delles entidaes de población (pueblu, aldea, llugar o casería) a les que pertenez realmente'l monte. En 27 montes d'utilidá pública'l titular alministrativu ye más d'ún, dase inclusive'l casu d'un monte en Pravia con seis entidaes llocales que comparten la titularidá representando a los pueblos a los que pertenecen los aprovechamientos del monte (“Sierra de Santa Catalina y El Molar” en Pravia nu 312 del CMUP).

La xestión de tolos montes declaraos d'Utilidá Pública ta encomendada per Llei a los servicios forestales de l'Alministración del Principáu d'Asturies.

Estos montes sumen una superficie total d'unes 270.000 Ha, lo que representa alredor del 17% de la superficie d'Asturies, con terrenos que van dende poco más de 10 Ha (por exemplu'l MUP nu 311-II “El Fisu” en Pravia), a otros de gran estensión con más de 7.000 Ha como nel casu del “Monte de Cuadonga” en Cangues d'Onís (nu 92 del CMUP).



Cartografía

Visor de Montes d'utilidá pública (n'español)



Documentos

Montes d'Utilidá Pública nel Principáu d'Asturies (n'español) (pdf: 24 Mb)
Catálogu de Montes d'Utilidá Pública d'Asturies: Fiches de Montes (n'español) (pdf: 59 Mb)
Mapa y asitiamientu de los Montes d'Utilidá Pública n'Asturies (n'español) (pdf: 8 Mb)


Actualización del Catálogu de Montes d'Utilidá Pública

El Catálogu de Montes d'Utilidá Pública ye un rexistru alministrativu n'actualización de contino. De magar se creó, n'añu 1907, l'alministración forestal fixo milenta apuntes nél anotando tolos actos alministrativos y de dominiu qu'afectaron a los montes que lu componen.

Ente ellos, los más importantes son los qu'afecten a la inclusión o esclusión de terrenos del mesmu. Asina, dende la so publicación, hubo munchos montes que s'incorporaron al catálogu, tanto propiedá del Principáu d'Asturies como de titularidá de les entidaes locales. Tamién hubo montes que se desclasificaron, bien por comprobase la inexistencia de la finca, bien por desapaecer les causes que motivaron la so inclusión.

Amás, efectuáronse munchos trabayos de delimitación de llindes (desllindes), que'l resultáu d'ellos incorporóse como anotaciones al Catálogu, y anotáronse toles ocupaciones concedíes nellos, tanto por interés públicu como por interés particular.

El puntu 7 del artículu 10 de la Llei del Principáu d'Asturies 3/2004, de Montes y Ordenación Forestal obliga a la Conseyería competente en materia forestal a tener permanentemente actualizáu y revisáu'l conteníu del Catálogu de Montes d'Utilidá Pública. Los datos actualizaos d'esa revisión permanente preséntense nesti documentu:


Icono gráfico alusivo al tipo de archivo Actualización del Catálogo de MUPS (Pdf: 5 Mb)


Más información sobre Montes d'Utilidá Pública y desllindes nel tablón de la Sede Electrónica.