Gobiernu del Principau d'Asturies

Asturies, muncho más cerca

Tas en

Asturias.es Temes Cultura Promoción, Cooperación y Difusión Cultural Puntu d’Información Toponímica
 

Promoción, Cooperación y Difusión Cultural

Puntu d’Información Toponímica

Esta páxina busca ser un puntu onde se centralice tola información toponímica relevante del Principáu d’Asturies

Esta páxina busca ser un puntu onde se centralice tola información toponímica relevante del Principáu d’Asturies, de manera que quien tea interesáu en consultar esta información pueda acceder direutamente a ella.

El procesu de revisión de la toponimia oficial d’Asturies entamó nel añu 2004 col envís de cumplir el mandáu de la Llei 1/98, de 23 de marzu, d’usu y promoción del asturianu, qu’afita que “los topónimos de la Comunidá Autónoma del Principáu d’Asturies van tener la denominación oficial na so forma tradicional”. Fechu conceyu a conceyu a pidimientu de los Conceyos, ye un procesu llargu y concienciudu nel qu’intervienen la Xunta Asesora de Toponimia, los partíos con representación municipal, coleutivos vecinales ya investigadores y espertos en toponimia. El resultáu ye un Decretu aprobáu pol Conseyu de Gobiernu del Principáu d’Asturies, pol que se determinen los topónimos d’esti conceyu, que s’asoleya nel BOPA. Consulta tamién los Decretos aprobaos hasta la fecha. 

Pa simplificar y axilizar la consulta sobre los distintos nomes oficiales de les entidaes de población ta ellaborándose’l Nomenclátor Xeográficu de la Toponimia oficial del Principáu d’Asturies (n'español). Esti documentu apurre delles ventayes no que cinca a les consultes que pueden facese nos decretos d’oficialización:

  • Recueye nun únicu documentu tola toponimia oficial, evitando tener que facer la consulta conceyu per conceyu. 
  • Pue buscase tanto pol nome oficial n’usu como pol anterior (según el códigu SADEI).
  • Clasifica toos y caún de los topónimos, siguiendo una tipoloxía predefinida (parroquia, ciudá, barriu, casería...). 
  • Xerarquiza los topónimos, de manera que d’una güeyada ye posible ver qué pueblos conformen determinada parroquia, en qué barrios se divide determinada población, etc. 
  • Dota a caún de los topónimos d’una posición xeográfica, pudiendo saber fácilmente’l so allugamientu. 

Como una ferramienta más d’espardimientu de la toponimia tradicional (en dellos casos yá oficializada y n’otros como propuesta), ellaboróse nel añu 2010, l’Ortofotomapa de Capitales y Poblaciones importantes. Ye un conxuntu de 122 fueyes, colos encuadres axustaos a toles capitales de conceyu del Principáu d’Asturies y a determinaes poblaciones que se consideraron relevantes p’apaecer nesta serie. Nelles apaez la ortofotografía de capa base, sobre la que s’añadió información vectorial, ente ella la información toponímica de la rodiada, non solo la referida a poblaciones, sinón tamién la referida a ríos, paraxes, picos, etc.