Gobiernu del Principau d'Asturies

Asturies, muncho más cerca

Tas en

Asturias.es Temes Industria y enerxía Industria y enexía n'Asturies Campaña de control de instalaciones de protección activa contra ...
 

Industria y enexía n'Asturies

Campaña de control de instalaciones de protección activa contra incendios

Como ye sabío, y dende'l 12/12/2017 pasáu, atópase vixente'l Reglamentu d'instalaciones de protección contra incendios (RIPCI), aprobáu pol Real Decretu 513/2017, de 22 de mayu. Nel articuláu del RIPCI, establécense delles obligaciones y, ente otres, el so art. 22 dispón la d'inspeccionar les instalaciones de protección activa contra quemes, polo menos, cada diez años, siendo los titulares de les mesmes los responsables de solicitar esa inspección.

Pela so parte, la Disposición Transitoria Cuarta (DT 4.ª) del Real Decretu 513/2017 establez que les instalaciones de protección contra quemes existentes a la entrada en vigor del Reglamentu (suxetes a les inspecciones periódiques) han sometese a la primer inspección a los diez años de ponese en serviciu, teniendo en cuenta que les instalaciones con diez o más años dende la so puesta en serviciu han sometese a la primer inspección nestos plazos máximos:

  • Instalaciones con una antigüedá mayor o igual a 20 años (anteriores a 1997): nel plazu d'un añu (primero d'avientu del 2018)
  • Instalaciones con una antigüedá mayor o igual a 15 años y menor a 20 años (ente 1997 y 2002): nel plazu de dos años (primero d'avientu del 2019)
  • Instalaciones con una antigüedá mayor o igual a 10 años y menor a 15 años (ente'l 2002 y el 2007): nel plazu de trés años (primero d'avientu del 2020)
  • Instalaciones llegalizaes dende avientu del 2007: a los 10 años de la so puesta en serviciu.

Los establecimientos afectaos por esta normativa que riquen inspección por Organismu de Control son estos:

  • Usu alministrativu con superficie construyida ≥ 2000 m²
  • Usu docente con superficie construyida ≥ 2000 m²
  • Usu comercial con superficie construyida ≥ 500 m²
  • Pública concurrencia con superficie construyida ≥ 500 m²
  • Aparcamientos con superficie construyida ≥ 500 m²
  • Aquellos otros que, por superficie, nun tean incluyíos nos apartaos anteriores, pero onde confluyan zones o locales de riesgu especial altu.
  • Establecimientos industriales anteriores a la entrada en vigor del Reglamentu de Seguranza contra quemes nos establecimientos industriales

Amás, y nel exerciciu de les competencies qu'en materia de seguranza industrial-y correspuenden con calter irrenunciable a esta Conseyería d'Industria, Emplegu y Promoción Económica del Principáu d'Asturies, al traviés del Serviciu d'Industria de la Dirección Xeneral d'Industria, va llevase a cabu, en collaboración cola Asociación d'Organismos de Control y Afines del Principáu d'Asturies (ASOCAS), una campaña de comprobación del grau de cumplimientu d'eses obligaciones d'inspección qu'afecten a les instalaciones de protección activa contra quemes.

Esa campaña de comprobación del cumplimientu de les inspecciones, costiada dafechu con cargu al Presupuestu d'esta Conseyería, empieza llevando a cabu un plan d'información a los titulares d'establecimientos afectaos cola collaboración d'ASOCAS y con esa mira va realizase una verificación sobre la realización de la inspección reglamentaria obligatoria.

La Dirección Xeneral d'Industria púnxose en contactu con delles de les asociaciones qu'axunten a los titulares de los edificios afectaos al tar incluyida la instalación de Protección Contra Quemes de los establecimientos de los sos asociaos nel ámbitu d'aplicación de la DT 4.ª del RD 513/2017, pa pone-yos de manifiestu que personal vinculao a ASOCAS va personase nes instalaciones de los sos afectaos cola mira d'informalos de les sos obligaciones reglamentaries. Si nel momentu de la visita yá se fixo la inspección periódica reglamentaria, va solicitase la so collaboración pa qu'asina-y lo faiga saber, facilitándo-y una copia del certificáu d'inspección.

Si esti nun fore'l supuestu, l'establecimientu va recibir una segunda visita, nel plazu de dos meses, cola mira de comprobar si, desque recibió la información, fixo la inspección.

El modelu de carta unviáu a les asociaciones recuéyese nel documentu axuntu.

   Icono gráfico alusivo al tipo de archivo Modelu de carta (Pdf: 345 Kb) (n'español)

La finalidá d'esta Alministración competente en materia d'Industria de nenguna manera ye recaudar cola imposición de sanciones, sinón regular, controlar y inspeccionar esti sector, con incidencia especial nos parámetros de seguranza, polo qu'esta campaña tien fundamentalmente calter informativu pa los titulares de los establecimientos y la so collaboración ye voluntaria. De toles maneres, aprovéchase la campaña pa treslladar a los interesaos que, amás de los riesgos que supón la non realización de les inspecciones calteniendo l'actividá de los establecimientos, pue suponer falta grave con arreglu al réxime sancionador establecíu n'artículu 31 de la Llei 21/1992, d'Industria.

Pa cualquier dulda puen dirixise al Serviciu d'Industria al traviés del corréu electrónicu industriaasturias.org, indicando nel asuntu 'CAMPAÑA PCI', o a ASOCAS al traviés del teléfonu 985 246 312 o corréu electrónicu infoasocas.es, onde-yos van resolver cualquier dulda que pueda surdi-yos.