Gobiernu del Principau d'Asturies

Asturies, muncho más cerca

Tas en

Asturias.es Temes Agricultura y montes Alimentación El conseyeru Alejandro Calvo destaca’l calter estratéxicu del ...
 

Alimentación

El conseyeru Alejandro Calvo destaca’l calter estratéxicu del mediu rural como “despensa sostenible” d’Asturies

Valora la función del sector primariu y agroalimentariu y reconoz el so compromisu nel caltenimientu de la cadena alimentaria mentes ye la crisis sanitaria. El Principáu movilizó más de 85 millones n’ayudes que dan seguranza a los profesionales na situación actual

16/04/2020

El conseyeru de Desenvolvimientu Rural, Agroganadería y Pesca, Alejandro Calvo, señaló güei que la crisis sanitaria punxo de manifiestu’l calter estratéxicu del mediu rural como “despensa sostenible” d’Asturies. Tamién reconoció la función del sector primariu y agroalimentariu y abogó por que’l trabayu de llabradores, ganaderos y marineros, al qu’agora se-y da tanta importancia, “se reconoza pola sociedá tamién nel futuru”.

Calvo realizó estes declaraciones na videoconferencia que tuvo col grupu de trabayu de la Xunta Xeneral pal siguimientu del coronavirus, al qu’informó sobre les actuaciones y midíes impulsaes pol so departamentu pa garantizar l’actividá del sector primariu y el caltenimientu de la cadena alimentaria.

El titular de Desenvolvimientu Rural esplicó que la reorganización interna llevada a cabu na so conseyería, basada nel teletrabayu y el caltenimientu d’un dispositivu presencial básicu, dexó realizar, con calter prioritariu, actuaciones vinculaes a la llucha contra la COVID-19 y siguir al empar cola actividá ordinaria. Nesti sentíu, destacó la tramitación de delles llinies de subvenciones, ente elles la convocatoria 2020 de la Política Agrícola Común (PAC), que yá se publicó nel Boletín Oficial del Principáu (BOPA). Trátase d’ayudes que movilicen 85 millones y dan seguranza a ganaderos y llabradores nuna situación global d’incertidume.

N’ámbitu de la ganadería, Calvo señaló que se reforzó la información a los profesionales sobre los trámites rellacionaos cola so actividá. Pa eso, realizáronse unvios masivos de mensaxes de testu (SMS) pa esplicar l’operativu de les oficines comarcales y el funcionamientu de la plataforma dixital Remo Web. Tamién se llegó a alcuerdos colos conceyos pal repartu y entrega en casa de documentación y elementos d’identificación del ganáu, y volvió entamase la campaña de saniamientu.

Al respective de la industria agroalimentaria, púnxose en marcha, xunto al sector, un observatoriu de siguimientu pa conocer directamente les sos necesidaes. Amás, hubo contactos permanentes col Gobiernu d’España y les demás comunidaes autónomes, que dexaron algamar alcuerdos pa que los productores con sellos de calidá Denominación d’Orixe Protexida (DOP) y Indicación Xeográfica Protexida (IGP), incluyida la producción ecolóxica, sigan etiquetando con toles garantíes de la que dure l’estáu d’alarma.

El conseyeru recordó, amás, que mentes yera’l confinamientu remataron negociaciones y xestiones del Principáu qu’ameyoraron les posibilidaes de pesca de xarda pa la flota asturiana. Anguaño, dispón d’un 71 % más que nel 2019, lo que-y da más capacidá pesquera y económica al sector nuna campaña que, al desenvolvese nesta situación, tien un impactu fuerte na cadena alimentaria y nos ingresos de la flota.

Pela so parte, los axentes del Mediu Natural caltuvieron l’actividá de vixilancia y prevención y, amás de les sos funciones ordinaries, tamién participen nel Grupu d’Acción Social coordináu pola Delegación del Gobiernu n’Asturies. Nesi marcu, tán repartiendo xel hidroalcohólico pa les residencies de mayores del ERA.

Na llucha contra les especies invasores, alcordóse un protocolu d’actuación cola Federación Asturiana de Conceyos (FACC) p’habilitar, dende los conceyos, a profesionales y voluntarios nes xeres de trampéu, cola mira de caltener activa la campaña, una de les acciones principales pa lluchar contra la Vespa velutina.

Información sobre el documento

© Copyright 2006. Gobiernu del Principau d'Asturies