Gobiernu del Principau d'Asturies

Asturies, muncho más cerca

Tas en

Asturias.es Gobiernu Actualidá Intervención del Presidente del Principáu d’Asturies, Adrián ...
 

Actualidá

Intervención del Presidente del Principáu d’Asturies, Adrián Barbón

Feria Internacional de Muestres d’ Asturies

02/08/2019

Esta tarde tengo l'honor d'inaugurar la Feria Internacional de Muestres, ún de los acontecimientos más enraigonaos del branu xixonés y d'Asturies entera. En Xixón, la feria ye a agostu como la playa a les fiestes de Begoña, una cita calismosa obligada, daqué que nun has perder.

Una de les palabres más socorríes nesti actu ye escaparate, para alzar el certame a la categoría de gran mostrador de la puxanza del Principáu. Ye cierto: nesta sesaxésima tercer edición (63ª), que yá son años, participen 2.000 espositores que van ocupar los 160.000 metros cuadraos del recintu Luis Adaro.

Digo ocupar en sentíu lliteral, porque inclusive hai llista d'espera, empreses que se quedaron ensin buecu pa participar. La relevancia económica rescampla.

Norabona, por tanto, a los organizadores. Si yá ye difícil tener ésitu, muncho más difícil resulta repitilo prácticamente en cada ocasión. La felicitación ye bien merecida.

Vuelvo a la idea d'escaparate, que da pa muncho. Un políticu siempre ta nel mostrariu espuestu al públicu, quiera o non. Nos nuestros díes, arrodiaos de güeyos y oyíos dixitales perdayures, intentar fuxir d'esi escrutiniu ye inútil. Y como da igual que te pruya, asúmolo con realismu y entiéndolo como un deber, y non el menos importante, incorporáu al mio cargu. A lo último, el llabor de representación tamién va nel sueldu.

Nun toi falando d'apetencies personales, sinón de cuestiones polítiques ya institucionales, porque los cargos públicos ponemos al Principáu nel escaparate coles nueses palabres, les nueses actitúes y los nuesos xestos. En cierta midida, somos custodios de la imaxe d'Asturies.

Agora plantégo-yos xuna entruga. Si ustedes tuvieren esa responsabilidá, la d'asitiar a Asturies nel espositor, ¿cómo lo fadríen? ¿Xurgaríen nos sos defectos, enseñaríen el peor ángulu o dedicaríense a sorrayar les sos ventayes, ufiertaríen la so meyor cara? Ensin dulda, escoyeríen la segunda opción. Echemos una güeyada a cualesquier de los estands d'esti llugar: nun imaxino unu solu que nun destacare les cualidaes de lo qu'espón, que nun lo faiga con optimismu y con ganes, convencíos de que la so ufierta ye la meyor. Yo tamién lo voi facer asina. Agora bien, creo qu'esa ye una xera colectiva pa tola sociedá asturiana y, yá que tamos nun actu d’índole económica, bien en particular pal empresariáu. Diríxome a la patronal, a les cámares de comerciu, a toles asociaciones rellacionaes cola actividá empresarial: pongamos nel escaparate lo meyor d'Asturies, que ye enforma.

Ye una idea sobre la que toi incidiendo nes mios primeres intervenciones. Un críticu va poder reprochame qu'ando vendiendo frascos tan etiquetaos d'ilusión como vacíos de conteníu. Niégolo. Defendo una actitú positiva que nos permita recuperar l'enfotu en nós mesmos, y sostengo, amás, que tenemos razones sólides pal optimismu.

El miércoles, por exemplu, conocimos l'alcuerdu sobre Alcoa. Depués d'un procesu tirante, difícil, cerróse la venta al fondu suizu Parter Capital. Entiendo perfectamente la prevención de la plantiya. ¡Qué tanto van tener precuru depués de tantos meses d'incertidume, colos sos empleos nel bistechu! Merecen tola comprensión y el sofitu del Gobiernu d'Asturies, que va siguir vixilante pa que se consolide'l proyectu industrial. El Principáu va siguir trabayando pol futuru de la nueva Alu Iberia.

Agora, al tiempu, asumamos tamién que tamos meyor, que se trabayó y que la collaboración ente alministraciones ayudó a atopar una salida. Como afirmó la ministra d'Industria, Reyes Maroto, a quien quiero reconocer la so implicación, tenemos derechu a “l’allegría y la esperanza”. Quiero ser claru: nun trato de distribuyir medayes ente les alministraciones pero sí constato que tuvimos, l'alministración rexonal, la estatal y la municipal, onde teníamos de tar: acompañando a los trabayadores y a les sos families en meses que foron mui duros y faciendo el nuesu trabayu, que ye buscar soluciones cola vista puesta nos ciudadanos y les ciudadanes.

Esta ha ser la pauta, la manera d'encarar los desafíos: reconocelos, analizalos y ponenos a trabayar de la mano pa superalos. Son necesarios tolos pasos. Aceptar los retos, analizalos y esforcianos pa superalos, nun paranos na descripción de los problemes. Non siempre se va algamar una bona solución, pero la mayor parte de les veces llograse.

Tamos en Xixón, una de les grandes places de la siderurxa, y sabemos qu'existe preocupación en toa Europa respecto al futuru d'esta industria. Con éses, nos próximos díes voi caltener una xunta colos sindicatos y la patronal na que voi abordar unu de los mios compromisos electorales: l'aplicación d'un arancel ambiental, d'un axuste en frontera qu'evite la desventaxa de la siderurxa europea frente a la competencia d'otros países. Ello ye que l'alcuentru yá taba previstu pal xueves pero hubo de suspendese.

Y, yá que faigo alusión a les midíes impuestes na UE pa combatir el cambéu climáticu, pensemos que, en realidá, la transición ecolóxica plantéganos una doble prueba. Nun se trata namás d'embrivir los riesgos qu'apareya pa la nuesa industria, sinón tamién de saber aprovechar les posibilidaes que trai pa xenerar empléu y nueves actividaes.

La perspectiva ha ser completa: de xacíu, transición xusta, apautada y pautada, pero tamién atención a les oportunidaes que van acompañar esa tresformación. Veamos la botella entera, cola so parte vacía y la so parte llena, y asina vamos avanzar meyor escontra esa gran prioridá del Gobiernu d'Asturies que ye l'afitamientu de la industria como piedra angular de la nuestra estructura económica: apurre'l 23,7% del nuestru valor añedíu brutu, seis puntos penrcima de la media nacional

Falába-yos antes de razones pal optimismu. El mesmu día, el miércoles, supimos los datos de balance turísticu de los primeres seis meses del añu. Fueron los más altos, inclusive pencima de los rexistraos en 2017, cuando se degolaron tolos récords. De xineru a xunu, 883.775 visitantes, con un crecimientu del 7,2% de los procedentes d'otros países. Sé que los númberos resequen los discursos, conviértenlos en pedregales grebos pa l'atención, pero nesti casu paecíame importante citalos porque probablemente prologuen el meyor exerciciu turísticu de tola historia d'Asturies.

Y a partir d'ende empreses y plantiyes del sector van poder reprochanos y reclamanos munches coses, unes con más motivos qu'otres. Nueves campañes, mayor collaboración, más atención a les condiciones llaborales, imaxinación y audacia pa repensar la nuestra imaxe.

D'alcuerdu, pondremonos a too, pero lo que nos tán indicando eses cifres ye qu'hai munchos motivos pa tar ilusionáu. A estes altures, el pesimismu sobre la capacidá turística d'Asturies sería de cenizos.

Más razones. Güei mesmo conocimos los datos del paru rexistráu: sumamos 70 meses consecutivos de descensu interañal y el númberu de persones afiliaes a la Seguridá Social llega a 372.431, el más altu dende ochobre de 2011 . Llevamos más de cinco años ininterrumpíos d'amenorgamientu del desempléu y, acordies con toles previsiones, vamos camín d'un llustru de crecimientu económica siguíu, siempre percima de la media de la eurozona.

Vuelvo a lo primero. Sé de sobra qu'esta intervención tien debilidaes. Por volver al primer exemplu, pueden dicime que'l futuru de la planta d'aluminiu y de tola industria que consume muncha enerxía precisa que s'abarate'l preciu de la eletricidá. Ye verdá. Pero pa que eso se pueda resolver fai falta qu'España tenga un gobiernu con competencies p'aprobar l'Estatutu de les Electrointensives, como se comprometió la ministra Maroto.

O pueden dicime que les comarques mineres siguen sufriendo les consecuencies de la so desertización industrial, acelerada pol zarru de les esplotaciones de carbón. Y volveré responder que ye cierto. Que se precisa siguir col esplegue de los fondos mineros, como los 73 proyectos aprobaos en mayu que van movilizar una inversión de cercal de 98 millones. Y voi repitir que pa esi oxetivu, pa caltener el compromisu coles cuenques, tamién fai falta qu'España tenga un gobiernu en plenitú.

Ustedes saben de sobra a ónde quiero llegar. Toi diciendo con toles lletres que'l bloquéu que sufre España tien consecuencies reales, tanxibles, que nun ye un xuegu de retórica nin un simulacru. El bloquéu políticu ye perxudicial p'Asturies. La ministra Luisa Carcedo –que, perdonen la familiaridá, pa mi ye sobremanera la mio amiga Luisa, a quien estimo la so presencia entiéndelo bien, sabe hasta qué puntu esi bloquéu irresponsable a la única alternativa de gobiernu existente repercute nes necesidaes d'Asturies.

Punxi dos casos como podría poner munchos otros, incluyida la conclusión de les grandes comunicaciones, la puesta en marcha de la variante de Payares, o equí, en Xixón, el desenvolvimientu del plan de víes. Pa facer realidá esos oxetivos ye mester cuntar cuanto antes con un Gobiernu n'España con toles de la llei.

Recupero la idea central del discursu. Si tenemos la responsabilidá d'asitiar a Asturies nel escaparate, coloquémosla de la meyor manera posible, tal como fadríen ustedes na organización d'esta feria internacional de Muestres o como prepararía el so estand cualesquier de les empreses que participa nel certame. Ante nós mesmos, y sobremanera cara al esterior, ufiertemos lo meyor que tenemos, les nueses potencies y capacidaes.

Pensemos, amás, no qu'ufiertamos al futuru, non no que fuimos. Nun intentemos promocionanos con una postal del pasáu. Poro, nun pensemos en volver atrás, sinón en ganar el porvenir. Y, insisto, por muncho enfotu qu'haya en presentanos les coses de la peor manera posible, cola nube negra del pesimismu, tengamos claro qu'abonden les razones pa ilusionanos col futuru d'Asturies.

Esta selmana asocedió una circunstancia interesada. El mio primer viaxe institucional foi a Yernes y Tameza, el conceyu con menos población d'Asturies, y güei la inauguración de la Feria tráxome a Xixón, la ciudá con más habitantes. D'un pequenu pueblu interior a una ciudá costera. Ye un bon contraste y, sicasí perdayuri percibo les mesmes mires, les ganes de que'l nuevu gobiernu se ponga a trabayar yá por Asturies.

Equí, como ven, tán dellos conseyeros y conseyeres del mio Executivu. Ye un xestu de sofitu a la feria y Xixón, esencial p'Asturies. Alcaldesa, esti gobiernu va cumplir con Xixón, tenlo de cierto. Cuenta con nós.

Remato yá, y nun aguanto a face-yos una invitación espresa a que visiten el Pabellón del Gobiernu del Principáu del Principáu qu'anguaño dedicamos al Camín de Santiago. Nun ye esti'l llugar pa estendeme sobre la estraordinaria importancia que tuvo la ruta xacobea pal pequeñu Reinu d'Asturies non solo nos ámbitos cultural, espiritual y artísticu sinón como dinamizador económicu de primer orde.

Solo quiero sorrayar la idea de que'l camín del futuru nuestru, del futuru d'Asturies que tamién queremos innovador, inclusivu y sostenible como reza'l lema de la esposición, empieza tamién en nós mesmos. Tolos asturianos y asturianes somos puntu de partida nesti camín.

Otra vez, munches gracies a toos ustedes.

Declaro inaugurada la sesaxésima tercer edición de la Feria Internacional de Muestres d'Asturies.

 

Información sobre el documento

© Copyright 2006. Gobiernu del Principau d'Asturies