Gobiernu del Principau d'Asturies

Asturies, muncho más cerca

Tas en

Asturias.es El Principáu retoma’l 1 de xunetu la campaña de la viñeta, que ...
 

Aniciu

El Principáu retoma’l 1 de xunetu la campaña de la viñeta, que se suspendió mentes foi l’estáu d’alarma

Los pagos van poder facese hasta’l 7 de setiembre y van tramitase alredor de 590.000 recibos

29/06/2020

L’Ente Públicu de Servicios Tributarios del Principáu d’Asturies va retomar dende’l 1 de xunetu la campaña del impuestu sobre Vehículos de Tracción Mecánica, conocíu como viñeta. El pagu d’esti tributu suspendióse’l 14 de marzu por cuenta de la declaración del estáu d’alarma pola crisis sanitaria.

Mentes la campaña, que se va caltener activa hasta’l 7 de setiembre, van tramitase alredor de 590.000 recibos, que correspuenden a los conceyos que delegaron nel ente públicu la xestión de la viñeta, que son tolos conceyos asturianos, sacante Gozón y el Valle Baju de Peñamellera Baxa.

Los contribuyentes que nun domiciliaren el pagu del recibu disponen les víes habituales pa efectuar l’ingresu: l’abonu telemáticu al traviés de la páxina web del Ente Públicu de Servicios Tributarios (https://www.tributasenasturias.es ) y el pagu de manera presencial en cualquiera de les entidaes financieres collaboradores: BBVA, Caja Rural de Asturias, Liberbank, La Caixa, Banco Sabadell-Herrero y Banco Santander.

L’atención presencial al públicu pol ente tributariu faise namás con cita previa, que se pue concertar per trés víes diferentes: al traviés de la páxina web (https://www.tributasenasturias.es); pel corréu electrónicu citaprevia@tributas.es y nel teléfonu 985 66 87 00. Al traviés d’esti númberu ta disponible’l Serviciu d’Atención Telefónica Tributaria, col que se pue realizar cualquier clas de tramitación.

Información sobre el documento

© Copyright 2006. Gobiernu del Principau d'Asturies