Gobiernu del Principau d'Asturies

Asturies, muncho más cerca

Tas en

Asturias.es Intervención del Presidente del Principáu d’Asturies, Adrián ...
 

Aniciu

Intervención del Presidente del Principáu d’Asturies, Adrián Barbón

II Alcuentru Hispano-Americanu de la Fundación Archivu d’Indianos- Muséu de la Emigración en Colombres

07/08/2019

Gracies pola so invitación, que me dexa tratar ún de los moldes principales de l’Asturies contemporánea. Si la minería y la siderurxa edificaron el paisaxe industrial del Principáu y catalizaron el movimientu obreru col so correllatu políticu, la emigración, y sobre manera la ultramarina, foi otra de les traces destacaes del nuestru pasáu recién. Pue qu’agora nos cueste facenos a la imaxe de pueblos entornaos al Atlánticu, llugares que se baleraben d’habitantes en busca d’una vida meyor al otru llau d’un océanu qu’enxamás vieren, pero esa foi una estampa común dende últimos del sieglu XIX hasta les primeres décades del sieglu XX. L’Asturies de güei nun s’entiende ensin la buelga, la buelga marcada de la emigración.

Esti actu rique una intervención curtia, daqué que siempre s’agradez. Voi tentar de llimitame, polo tanto, a una idea principal: a avisar de que la emigración nun ye un rellatu acabáu, un periodu con fecha d’apertura y zarru caducáu va yá tiempu. Inclusive dende’l puntu de vista de la recuperación histórica queda bien de xera pendiente, porque la dimensión económica y social –y pa qué falar de la sentimental- foi fortísima. Basta con lleer dacuando una carta d’un emigrante a la so familia, ún d’esos folios de caligrafía cuidada y apertada de detalles, pa percibir de qué tamos falando.

La emigración nun ye un rellatu acabáu porque nun terminó. Quiciabes me dirixo a ún de los auditorios que meyor puen entender esta reflexón. Cuando ustedes entamen esti II Alcuentru Hispano-Americanu tán recordando la emigración que foi, pero sobre manera tán pensando qué va ser, qué pue dar de sí. Refiérome, n’especial, a aprovechar les oportunidaes de collaboración económica qu’ufierten les rellaciones comerciales y empresariales entamaes ente Asturies y América a partir de la emigración. Esperdiciales diba ser un espilfarru.

Como ún siempre s’esplica meyor con un exemplu, voi citar a don Antonio Suárez, medaya de plata del Principáu. Él ye ún d’esos capitanes d’empresa que dio Asturies, que’l so compromisu cola nuestra industria ta acreitáu a esgaya. Pos él tamién foi ún de los promotores de l’Asociación d’Amigos del Archivu d’Indianos, qu’anguaño preside. La so contribución merez tola reconocencia del Gobiernu d’Asturies. Ési ye’l modelu de cooperación arrogante y productivu al qu’aludo.

La Quinta Guadalupe, l’edificiu onde nos atopamos, ye una señal grandiosa de l’arquitectura indiana. Ye tamién la sede permanente del Muséu de la Emigración, un espaciu pa la investigación y, amás, un portal qu’enllaza dambos llaos del Atlánticu. Esi ye, al cabu, l’oxetivu principal d’esta xunta: valir de puntu d’alcuentru ente empresarios d’Asturies y América, un sitiu pa compartir, pa conocese y comprometese cola nuestra tierra al traviés de los oxetivos culturales del Archivu d’Indianos. Entiendan qu’aproveche esti momentu pa dar la mio norabona a Francisco Rodríguez, presidente nuevu de la fundación y otru miembru destacáu d’esa categoría de capitanes de la empresa a la qu’enantes me referí. Asumió un empeñu al altor de la so esperiencia. Cómo non, tamién m’atrevo a felicitar al so próximu “patronu d’honor”, l’ex-embaxador d’España en México Luis Fernández-Cid de las Alas Pumariño, otra de les almes impulsores de l’Asociación d’Amigos.

Dicía-yos primero que la emigración nun ye un rellatu acabáu. Ta claro que pal mio gobiernu nun lu ye de nenguna manera. Per un llau, quiero anuncia-yos la disposición dafechu del Principáu a cooperar cola Fundación Archivu d’Indianos. Cola mesma intensidá, el gobiernu va trabayar pa fortalecer los vínculos empresariales ente Asturies y México y colos demás Estaos iberoamericanos. Sé que nun toi diciendo nada inédito porque esti camín yá lu esploraron otros Executivos. Lo que vuelvo caltener ye’l mio determín, el d’implicame personalmente n’ameyorar esa cooperación a lo llargo d’esta llexislatura. Fíxose enforma y yo quiero siguir faciendo más.

Tamién queremos siguir faciendo más por quien, emigrantes o descendientes d’emigrantes, sufren problemes lloñe d’Asturies. Esa tamién ye una realidá que nun podemos resalvar, que nun tenemos que dexar de llau. Toos sabemos que la emigración nun foi siempre una historia d’éxitu y que les circunstancies polítiques y económiques agravaron les dificultaes en dellos países. Esa va ser una de les nuestres prioridaes nesti ámbitu, igual que caltener el sofitu a los centros asturianos, facilitar la rellación cola Alministración del Principáu pente medies de les posibilidaes qu’ufierten les tecnoloxíes nueves y atender les necesidaes de la emigración nueva, de la mocedá que güei dexa Asturies pa trabayar en cualquier otru requexu del planeta, y a la que quiero tener bien presente na mio intervención.

Enforma por facer y muncha gana de facelo, como puen comprobar. Y, anque pueda aparentar un puntu alloñáu a esti actu, al referime a la emigración nun puedo dexar de pensar no que ta asocediendo güei nel mundu. Como sociedá –como humanidá, inclusive- tamos énte ún de los grandes desafíos del sieglu XXI. Tenemos que nos entrugar cómo reaccionamos énte esa inmensa, masiva llamada a les puertes d’Occidente que suponen les foles migratories, seyan les qu’intenten cruciar el Mediterraneu o les qu’anden escontra la frontera d’Estaos Uníos. La embaxadora de México, Roberta Lajous, que nos fai l’honor d’acompañanos, entiende perfectamente la envergadura d’esi retu escomanáu.

Pue paecer pretencioso que’l presidente d’una comunidá autónoma pequeña d’España saque esta cuestión nun alcuentru como ésti. Puen dicir que me queda pergrande. Pero, la verdá, yo soi de los que piensen que’l desafíu ye tal que la respuesta va retratanos como civilización. Y pertenecer a una comunidá moldiada pola emigración tien que, polo menos, facenos pensar nello. Nun tenemos que cayer na soberbia de declaranos ayenos a esa realidá.

La brevedá oblígame a rematar. De nuevo, norabona pola celebración d’esti II Alcuentru Hispano-Americanu. Vuelvo afitar, una vez más, los compromisos del mio gobiernu cola Fundación Archivu d’Indianos y agradézo-yos sinceramente la so invitación, porque falar con toos ustedes ye fala-y al corazón de la nuestra propia historia.

 

Descargar noticia (PDF : 158 Kb )

Descargue gratis el programa Acrobat Reader

Información sobre el documento

© Copyright 2006. Gobiernu del Principau d'Asturies