Gobiernu del Principau d'Asturies

Asturies, muncho más cerca

Tas en

Asturias.es El paru mengua n’Asturies en xunetu en 2.160 persones y asitia ...
 

Aniciu

El paru mengua n’Asturies en xunetu en 2.160 persones y asitia nel nivel más baxu pa esi mes dende’l 2008

- El desempléu reduzse en tolos sectores, ente homes y muyeres, en tolos tramos d’edá y en 63 conceyos

02/08/2019

   - El Principáu rexistra la segunda mayor cayida a nivel nacional y encadena 70 meses siguíos con retrocesos nel cómputu interanual
   - La comunidá ye la cuarta con más aumentu d’afiliaos a la Seguridá Social y suma 4.159 puestos de trabayu nuevos

El desempléu baxó n’Asturies en xunetu en 2.160 persones, lo que supón el segundu mayor retrocesu de toles comunidaes autónomes. El númberu de paraos menguó un 3,20 %, hasta un total de 65.366, lo que representa la cifra de paraos más baxa pa un mes de xunetu dende’l 2008.

La baxada beneficia tanto a muyeres como a homes, a tolos grupos d’edá y a tolos sectores. A nivel municipal, 63 conceyos rexistraron retrocesos nel númberu de persones paraes.

Anque los descensos más acusaos foron nes actividaes vinculaes al sector servicios, y polo tanto más cícliques, con 1.560 paraos menos (-3,22 %), destaca la evolución na industria (-203), na construcción (-133), n’agricultura y pesca (-66) y sobre manera ente les persones ensin empléu anterior (-198).

Por actividaes económiques, la mengua produzse fundamentalmente na industria d’alimentación y bébora, nel metal, nos servicios de comerciu y hostelería, servicios a edificios, xardinería y alministración pública y actividaes residenciales.

Por zones, la mengua mayor concéntrase nos conceyos de más actividá turística, sobre manera n’área oriental: Ribadeva (-21,92 %), Cabrales (-18,18 %), Llanes (-13,92 %), Ribeseya (-15,91 %), Parres (-13,64 %), Cangues d’Onís (-12,62 %), pero tamién en Valdés (-8,47 %) y Cuideiru (-12,09 %).

La directora del Serviciu Públicu d’Empléu del Principáu (Sepepa), Luisa Pérez, sorraya que’l turismu funcionó en xunetu como tractor del empléu, un enclín que s’afita y que pon de relieve la importancia d’esti sector pa la economía asturiana.

Sicasí, remarca que la construcción y la industria, ámbitos con más estabilidá nel empléu, consolídense como árees en medría, con descensos importantes tanto en términos mensuales como interanuales.

La comparanza interanual caltien l’enclín positivu, con una baxada del paru en 2.626 persones nos postreros doce meses, lo que representa una cayida del 3,86 %. Estes cifres suponen qu’Asturies encadena yá 70 meses siguíos de descensos del desempléu interanual.

La evolución interanual foi positiva sobre manera nel sector de la construcción, con un retrocesu del -10,79 %, na industria (-5,24 %), y especialmente favorable ente les persones ensin empléu anterior, les más d’elles moces, con 425 paraos menos (-6,8 %) nel últimu añu. Nestos trés casos, los descensos foron mui superiores a la evolución media rexonal.

Otra manera, medra l’afiliación a la Seguridá Social hasta un total de 372.431 persones, lo que supón qu’en xunetu creáronse 4.159 puestos de trabayu nel Principáu. Con una medría del 1,13 %, Asturies foi la cuarta comunidá con más aumentu del empléu depués de Cantabria, Baleares y Galicia.

 

Información sobre el documento

© Copyright 2006. Gobiernu del Principau d'Asturies