Gobiernu del Principau d'Asturies

Asturies, muncho más cerca

Tas en

Asturias.es Información de los Conceyos El to Conceyu El Gobiernu d'Asturies va roblar esti mes los primeros convenios ...
 

El to Conceyu

El Gobiernu d'Asturies va roblar esti mes los primeros convenios pa que los técnicos municipales valoren la dependencia

La conseyera de Derechos Sociales repite'l so compromisu de terminar coles llistes d'espera nun añu. Melania Álvarez asegura que los criterios del observatoriu sobre esti asuntu “premien a les comunidaes con más persones dependientes cuando nós queremos evitar llegar a esa situación”. Derechos Sociales refuerza l’área l, con cabecera en Xarrio, con un equipu itinerante que se va mover pel territoriu

02/03/2020

El Gobiernu d'Asturies va roblar esti mes los primeros convenios con diversos conceyos con cuenta de los técnicos municipales empiecen a valorar a les persones que soliciten l'estudiu del so grau de dependencia. Tres los trámites alministrativos, los profesionales locales van recibir una formación específica p’habilitase como valoradores y va empezar a tramitar espedientes en mayu. Los primeros conceyos en xuntase a esti conveniu son: Grandas de Salime, Pezós, Eilao, Boal, Coaña, Villayón, Cangas, Castropol y Casu.

Otra midida de refuerzu que yá ta en marcha ye la creación d'un equipu itinerante de profesionales que se va mover al área l (con cabecera en Xarrio) para dar sofitu a los equipos locales.

La conseyera de Derechos Sociales y Bienestar, Melania Álvarez, caltién el compromisu adquiríu cola sociedá asturiana al asumir el cargu en septiembre, cuando aseguró que terminaría nun añu coles llistes d'espera y tolos espedientes se resolveríen en plazu.

Para algamar esti oxetivu, la conseyería ellaboró un plan de choque que refuerza los medios personal y material; reorganiza y simplifica los procedimientos de valoración; ameyora los medios informáticos; establez un nuevu modelu de solicitú de l'ayuda a la dependencia más áxil y dinámicu, y axusta un siguimientu del propiu plan al traviés de xuntes técniques colos valoradores y trabayadores sociales.



Midíes para entainar la xestión

La conseyera de Derechos Sociales y Bienestar, Melania Álvarez, destacó les midíes que ta llevando a cabu'l so departamentu pa entainar la xestión en materia d'atención a les persones dependientes y amosó la so disconformidá col últimu informe del Observatoriu Estatal pa la Dependencia, coordináu pola Asociación de Directores y Xerentes de Servicios Sociales, onde Asturies llogra un resultáu de 1,1 puntos sobre 10.

“Los criterios de valoración d'esta entidá privada premien a les comunidaes con más persones dependientes, cuando lo que queremos evitar precisamente ye que se llegue a esa situación. Tampoco valora la calidá de les prestaciones y polo xeneral podemos dicir que mide l'aplicación de la dependencia al pesu, esto ye, cuantitativamente, non cualitativamente”, señaló Álvarez.

“Sabemos qu'entá cuando resolvamos les tramitaciones en plazu, vamos siguir suspendiendo, inclusive teniendo atendíes a toles persones que lo soliciten, porque esta situación yá asocedió n'avientu de 2014”, añedió la conseyera, qu'aportunó: “l’oxetivu nuestru nun ye aprobar l'exame del Observatoriu sinón dar respuesta a les necesidaes de la comunidá asturiana y nun dexar a naide atrás”.

Icono gráfico alusivo al tipo de archivo Audiu (Audiu: 830 Kb) (n'español)

Información sobre el documento

© Copyright 2006. Gobiernu del Principau d'Asturies