Gobiernu del Principau d'Asturies

Asturies, muncho más cerca

Tas en

Asturias.es Persones entamadores El Principáu refuerza los sos vínculos cola rexón chilena de ...
 

Persones entamadores

El Principáu refuerza los sos vínculos cola rexón chilena de Tarapacá pa captar nueves oportunidaes de negociu

Una delegación asturiana xuntóse con representantes políticos y empresariales cola fin de facilitar les relaciones coles empreses de la comunidá

Un momento de la reunión

08/07/2019

El Principáu refuerza los sos llazos cola rexón chilena de Tarapacá col fin de captar nueves oportunidaes de negociu pa les empreses de la comunidá. Una delegación asturiana visitó Chile la selmana pasada pa conocer la estructura económica y empresarial d'esta zona, asitiada al norte del país, y estrechar les relaciones ente dambes rexones por aciu un plan d'acción conxuntu.

Los directores xenerales del Institutu de Desarrollu Económicu del Principáu (Idepa), Eva Pando, y de la Sociedá de Promoción Esterior (Asturex), Teresa Vigón, encabezaron la delegación asturiana.

Tarapacá cuenta con distintos recursos que pueden facilitar oportunidaes de negociu pa les firmes asturianes; por exemplu, na Zona Franca de Iquique (Zofri) y el puertu de la ciudá, unu de los principales núcleos d'actividá económica y puerta d'entrada al país. Amás, la rexón trabaya n'iniciatives de gran interés pal Principáu y qu'abren potenciales llinies de collaboración, como la economía circular -cola creación d'un importante centru tecnolóxicu- y la industria 4.0., especialmente nel sector pesqueru.

Per otru llau, la rexón va cuntar en 2020 con un mix enerxéticu nel que nel so marco les anovables van xenerar más del 80% de la eletricidá. Nesti ámbitu, la delegación asturiana visitó la planta solar de Huatacondo, que tien les sos estructures metáliques suministraes por Hiasa-Grupu Gonvarri y compartió les llinies desenvueltes na Mesa Rexonal pal Fomentu de la Movilidá Eléctrica, impulsada pol Principáu.

Otramiente , los responsables de la Universidá Arturo Prat (UNAP), que cunta con gran potencial investigador, espresaron la so voluntá d’entamar relaciones cola Universidá d'Uviéu pa promover l'intercambiu d'alumnáu y la collaboración ente investigadores de dambes instituciones académiques, especialmente ente aquellos que trabayen na xestión de residuos o la innovación.



Programa de Cooperación Urbana Internacional

El viaxe institucional a Chile enmárcase nel Programa de Cooperación Urbana Internacional de la Unión Europea, que fomenta'l desenvolvimientu urbanu sostenible ya inclúi un subprograma empobináu a promover la collaboración ente rexones de la Unión Europea y d'América Llatina. Nesi marcu, el Principáu y Tarapacá fueron escoyíes pa trabayar xuntes, polo que yá'l pasáu abril una delegación de la rexón chilena, encabezada pol so intendente Miguel Ángel Quezada, visitó'l Principáu. Na so estancia n'Asturies, los representantes rexonales axúntáronse col presidente de la comunidá, Javier Fernández, y col conseyeru d'Empléu. Tamién celebraron alcuentros de trabayu con instituciones autonómiques, organismos de promoción, centros tecnolóxicos, empreses como TSK y EDP y entidaes como Coxersa.

 

Información sobre el documento

© Copyright 2006. Gobiernu del Principau d'Asturies