Gobiernu del Principau d'Asturies

Asturies, muncho más cerca

Tas en

Asturias.es Temes Agricultura y montes La captura de reines nel trampéu primaveral de l’aviespa ...
 

Agricultura y montes

La captura de reines nel trampéu primaveral de l’aviespa asiática medra un 600 % al respective de tol 2019

La collaboración de cuasi 4. 000 voluntarios y de les entidaes locales dexó poner un 115 % más de trampes. El Principáu anuncia’l principiu d’una campaña nueva de control sobre’l plumeru de la pampa

09/07/2020

La campaña de trampéu primaveral de l’aviespa asiática zarróse con un aumentu de les captures de reines d’un 600 % al respective de tol añu pasáu. En concreto, prindáronse 110.694 exemplares frente a los 15.717 del 2019.

El directores xenerales del Mediu Natural y Planificación Rural, David Villar, y d’Infraestructures Rurales y Montes, Fernando Prendes, presentaron güei los resultaos de les actividaes rellacionaes col siguimientu, control y posible desaniciamientu d’especies invasores nel Centru d’Alarma y Control de La Mata, en Grau.

Villar destacó que nestos resultaos influyó la implicación y collaboración de la sociedá civil y de les demás alministraciones. Según los datos que facilitó, alredor de 4.000 voluntarios, axuntaos na plataforma www.avisap.es y coordinaos polos conceyos, foron quién a asitiar 7.749 trampes per toa Asturies, lo que supón un 115 % más que nel 2019, cuando s’instalaron 3.609.

D’equí p’alantre va dase continuidá a los trabayos cola retirada de niales nuna collaboración estrecha col Serviciu d’Emerxencies del Principáu, al traviés de Bomberos d’Asturies, el 112 y Protección Civil. Precisamente, la selmana que vien va celebrase una xunta del comité asesor contra l’aviespa asiática que va analizar y va consensuar les midíes a adoptar.

Nel marcu de la llucha contra especies invasores, Villar anunció una campaña nueva de control sobre’l plumeru de la pampa, dientro del plan rexonal pa un posible desaniciamientu d’esta especie. Los trabayos d’eliminación de plántules y destoconáu van priorizar les zones de más interés natural y van desenvolvese actuaciones pilotu en collaboración cola Dirección Xeneral d’Infraestructures Viarias y Portuaries.



Llucha biolóxica

El director xeneral d’Infraestructures Rurales y Montes, Fernando Prendes, tamién destacó que’l Centru d’Alarma y Control de La Mata ye tamién una pieza clave na llucha biolóxica contra especies como l’aviespa de la castañal o’l gonipterus.

Prendes resaltó que l’aviespa de la castañal afecta de forma negativa a la producción de castaña de frutu na nuestra comunidá. Pa lluchar contra ella, el Principáu lleva años investigando y actuando, tanto en montes públicos como privaos, cola suelta selectiva del torymus, insectu alóctonu que s’alimenta de l’aviespa.

Nesta mesma llinia d’actividá rellacionada cola llucha biolóxica del Centru de La Mata, destaca la que se lleva a cabu contra’l gonipterus, un coleópteru qu’afecta al ocalitu y que se combate cola suelta del himenópteru Anaphes nitens, que la so producción perfecciónase añu tres d’añu nestes instalaciones dende’l 2016.

Na llucha contra toes estes especies invasores, tanto l’aviespa asiática como nes qu’afecten a la masa forestal, qu’amenacen la biodiversidá y mengüen les producciones agraries, amplíase la collaboración a la Caja Rural de Asturias. Asina, esta entidá va participar na investigación pa desaniciar l’aviespa de la castañal y na adquisición d’atrayente específico pa la Vespa velutina, que se va repartir de baldre a la rede de collaboradores na siguiente campaña de trampéu.

Información sobre el documento

© Copyright 2006. Gobiernu del Principau d'Asturies