Gobiernu del Principau d'Asturies

Asturies, muncho más cerca

Tas en

Asturias.es Intervención del Presidente del Principáu d’Asturies, Adrián ...
 

Aniciu

Intervención del Presidente del Principáu d’Asturies, Adrián Barbón

Apertura cursu universitariu 2019-2020

10/09/2019

Va unos años, non demasiaos pero los bastantes como pa echalos en falta, estudié nesta Universidá. Percorrí'l campus d'El Cristo, visité esti edificiu, afitéme nes feríes de les sos parés, repulgos de la nuesa historia, conocí a compañeros y profesores que se convirtieron n'amistaes. Si pa cualesquiera ye un honor participar na solemne inauguración del cursu universitariu, pa mi ye por doble motivu, como presidente del Gobiernu d'Asturies y como ex alumnu, arguyosu ex alumnu de la Facultá de Derechu. Gracies, rector, pola to invitación.

Yá que tamos de vuelta a clase, propóngo-yos compartir la evocación d'un primer día de cursu. El formiguéu de molición énte nuevos profesores, nueves asignatures, seique nueves aules, quiciabes nueves compañeres y compañeros y, tamién, nuevos planes.

Al falar d'ello, tengo que confesa-yos que me vien a la cabeza de forma inmediata'l mio primer profesor en Derechu, nel mio primer día de cursu y de vida universitaria. Refiérome a un home bonu -con toles lletres-, íntegru, escepcional: don Carlos Prieto González. Y pa mi, ye emocionante citalu nesti discursu

Retomo lo que-yos taba diciendo: yo, que tamién soi nuevu en delles coses, vengo fala-yos precisamente d'eso, de los proyectos del Principáu pa la Universidá d'Uviéu. O, meyor espresao, cola Universidá, porque'l primer mandamientu pa la relación ente'l Gobiernu y la Universidá ha de ser la collaboración continuo y lleal. En conciencia, esa va ser la constante del mio Executivu.

Nesos apuntes sobre'l primer día faltáronme los deberes, que na Universidá tamién los hai. La verdá ye qu'a esta institución tol mundu-y impón xeres: tien qu'enseñar esto y aquello y de esta manera, tien qu'allugase equí o allá, tien qu'ufiertar esactamente lo que precisen tales empreses, etcétera. Asina convertimos l'autonomía universitaria nun principiu que s'amansuña más que se practica. Espero facelo al aviesu: respetar l'autonomía universitaria más que nomala. Asina, al respective de les titulaciones, el gobiernu confía en que la Universidá va plantegar siempre propuestes meditaes, consensuaes y técnica y financieramente vidables. A partir d'esi momentu, non antes, la palabra corresponderá-y al Executivu.

Agora, puestos a opinar, creo que primero de nada la Universidá tien de captar, retener y aprovechar el so talentu, que ye enforma. Equí cuntamos con investigadores de sonadía mundial qu'hemos curiar como un patrimoniu colectivu, auténtiques xoyes de la corona. Cuando celebramos la inclusión ente les 500 meyores del mundu nel ranking de Shanghái, una bona noticia pa esta institución y pa toa Asturies, ye de xusticia reconocer públicamente la so aportación. Deamos lluz al nuestru potencial investigador, con índices d'impactu especialmente alzaos n'árees que nos permiten sobresalir internacionalmente. A esti propósitu, hemos d'aumentar el númberu de proyectos europeos, porque ye n'Europa y na collaboración público-privada onde tenemos que captar más fondos. Esi ye ún de los retos: alzar el porcentaxe d'éxitu nes convocatories europees.

Pero yo nun vengo equí tanto a dici-yos qué creo que tendríen de facer como a esplica-yos qué pretende'l mio gobiernu. Como asocede cola caridá, los deberes bien entendíos empiecen por ún mesmu.

• El Gobiernu d'Asturies quier asegurar la estabilidá financiera de l'academia a partir del alcuerdu algamáu la pasada llexislatura. Recordemos qu'esi entendimientu, pol que'l Principáu destina más de 530 millones a la Universidá en cuatro años, inclúi un plan d'inversiones hasta 2021 que permite actuar y decidir con cierta previsión. Ye un bon puntu de partida.

• Tamién pretendemos siguir favoreciendo l'accesu. Dacuando escúchense discursos que paecen ecos del pasáu, cuando los estudios superiores pasu social acutáu pa los que teníen recursos abondos pa pagar el pasu. Al contrario, el mio gobiernu va siguir facilitando'l derechu a la educación de toles families con independencia del so nivel de renta. Esti cursu asumióse una rebaxa del 25% nes tases de primermatrícula, una midida tanxible, comprensible pa cualesquiera.

• Sigo cola llista de xeres. Acompáñame nesti actu'l conseyeru de Ciencia, Innovación y Universidá. Borja Sánchez, otru ex alumnu d'esta Universidá. Nun lu mento pa facer la so presentación pública, sinón pa sorrayar la importancia del departamentu que dirixe. ¿Garantiza, pol fechu d'existir, que se van algamar tolos oxetivos? Non, pero pon de manifiestu'l decidíu apueste pola Universidá y la ciencia del Gobiernu d'Asturies.

• Antes prometí una política de collaboración continua y lleal. Ratifícola. En verdá, ambiciono daqué más que collaborar: propóngo-yos que nos afitemos en metes comunes comunes, que la Universidá y el Gobiernu vaigamos de la mano pa impulsar Asturies a la vanguardia de la conocencia. Llamémos-y pactu pol talentu o como queramos nomalo, pero trabayemos xuntos, coles puertes franques a la iniciativa privada, p'asitiar al Principáu na primer llinia de la meyora científica.

Nun cito al empresariáu de raspión. Saben que nos comprometimos a xubir la inversión n'I+D+i hasta algamar el 2% del PIB, un oxetivu nel que vamos trabayar de forma progresiva. Agora, tengamos claro que l'aumentu de los fondos públicos nun va ser abondu. Tamién precisamos más inversión privada y, al tiempu, una relación permeable, favorecer la ósmosis ente investigación y empresa. Asumamos que destinar dineru a la ciencia nun ye un luxu, sinón una inversión de futuru, clave pa la nuesa economía y el nuesu bienestar.

Pa ponelo de relieve añedo otra reflexón, rellacionada col desenvolvimientu científicu y tecnolóxicu. Toos oyimos falar de la tecnoloxía 5 G, la nueva etapa na evolución acelerada de les tecnoloxíes de la comunicación que va actuar como un potente catalizador de fluxos informativos con repercusiones notables nel mercáu llaboral. Cola so implantación, en cuestión de bien pocu tiempu va haber ocupaciones que languidecerán y van apaecer otres nueves. Como ante munches otres coses, la resistencia escarez de sentíu. Aspiramos, al contrario, a que la Universidá d'Uviéu lidere l'accesu de los nuestros mozos a los nuevos empleos que van venir de la mano d'esi saltu tecnolóxicu. Quedanos fuera d'esi tresformamientu sí que sería esbardiar dafechu.

• Favorecer esa vinculación porosa d'iniciativa privada ya investigación va ser un oxetivu de la Llei de la Ciencia que va proponer la conseyería, al mio xuiciu ún de los desafíos de la llexislatura. El testu va ser consensuáu con tolos actores y va perseguir fines como la participación de los nuestros investigadores n'empreses emerxentes con base tecnolóxica (start-ups) o garantizar l'ausencia d'años en blanco nel Plan de Ciencia, Tecnoloxía ya Innovación. Namás una llei puede consolidar un marcu homoxéneu, eficiente y estable qu'ayude a superar les barreres a la tresferencia de conocencia qu'entá persisten.

• Tamién proponemos amenorgar la burocracia, una de les demandes compartíes polos investigadores. Empecemos cola ellaboración d'unes bases comunes pa les ayudes a I+D+i, que pueden sirvir de puntu de partida pa ordenar un calendariu que permita planiar la carrera investigadora y que los grupos sepan cuándo tienen que presentar los sos proyectos y cuálos son los plazos de resolución.

• Pa ser un primer día, creo que yá vamos cargaos de notes, pue que por demás.Permítome añedir, pa dir terminando, los importantes cambeos previstos nel real decretu llei de midíes urxentes nel ámbitu de la ciencia, la tecnoloxía y la universidá ellaboráu pol Gobiernu d'España. Hai dos d'especial relevancia: la contratación áxil y estable n'universidaes y centros d'investigación y el fomentu de la igualdá d'oportunidaes ente investigadores, de cuenta que los que s'atopen en situaciones de maternidá o paternidá, lo mesmo que de incapacidá temporal, nun se vean perxudicaos.

• Esclario, sicasí, que nun tengo una visión reduccionista de la Universidá. L'apueste pola ciencia y la tecnoloxía ye compatible - ten de selo, dígolo como imperativu- coles ciencies sociales y les humanidaes. Permitan qu'un ex estudiante de Derechu reivindique güei la so vixencia y el so protagonismu, que proclame'l so convencimientu de que son imprescindibles pa la comprensión de la sociedá y la reflexón sobre'l nuestru papel nel mundu. Permitan que lo faiga precisamente equí, na biblioteca universitaria, colos sos 250 años d'historia, primero de too el saber acumuáu nos sos anaqueles.

Y déxenme que, nesti precisu momentu, me reivindique con arguyu como alumnu del profesor Tolivar Alas. Siempre ye un placer escuchalu y aprender d'él. Asina foi con esta llección inaugural que combina de forma tan precisa l'analís de la interrellación ente Universidá y Política y como les bones enseñances, nos fai entender. Volver escuchalu equí, na Universidá d'Uviéu, faime retrotrayer venti años atrás y sentir que les alcordances adquieren ciertu puntu de señaldá: señaldá de les clases, señaldá de los mios amigos, señaldá de los profesores. Poro, recordando, quiero espresar públicamente la mio almiración pol so maxisteriu. Gracies por enseñame tanto queríu profesor. De corazón, gracies.

Y agora concluyo. En 1959, un asturianu, Sever Ochoa, recibió'l Premiu Nobel polos sos trabayos, desenvueltos básicamente n'Estaos Xuníos. Cuando se cumplen 60 años d'aquella distinción, el tiempu sírvenos una bona escusa pa imaxinar si güei sería posible qu'un científicu atopara n'Asturies les condiciones afayadices pa realizar una investigación d'élite mundial. Pensemos si tamos cerca o llueñe d'esa realidá, si ta asocediendo yá o si facemos tolo posible por qu'asoceda y, amás, se sepa. Que cada cual eche les sos propies cuentes. En concencia, el Gobiernu d'Asturies, y en primer llugar esti Presidente, nunca va cerrar les puertes a esi oxetivu, a que la Universidá d'Uviéu s’asitie na excelencia del conocimientu .

 

   Icono gráfico alusivo al tipo de archivo Ver en formatu orixinal (Pdf: 168 Kb)

Información sobre el documento

© Copyright 2006. Gobiernu del Principau d'Asturies