Gobiernu del Principau d'Asturies

Asturies, muncho más cerca

Tas en

Asturias.es Temes Agricultura y montes Ayudes al Sector Agrariu Desenvolvimientu Rural prioriza con 12,8 millones la ...
 

Ayudes al Sector Agrariu

Desenvolvimientu Rural prioriza con 12,8 millones la incorporación de mocedá y la meyora de les esplotaciones pa impulsar l’actividá económica nel campu

El conseyeru Alejandro Calvo presenta na Xunta Xeneral el presupuestu del so departamentu, que xube a 219,6 millones. Va impulsar con más d’un millón la marca de calidá Alimentos del Paraísu pa facela más atractiva pa consumidores y productores. La conseyería destina 2,8 millones a lluchar contra les especies invasores y promover la Rede Natural d’Asturies. Pesca Marítima dedica 163. 000 euros a tres llinies nueves d’ayudes al sector

13/12/2019

Impulsar l’actividá económica nel mediu rural pa garantizar el futuru del sector y encarar el retu demográficu. Alejandro Calvo, conseyeru de Desenvolvimientu Rural, Agroganadería y Pesca, espunxo güei na Xunta Xeneral les grandes llinies del so departamentu na presentación de los sos presupuestos pal 2020. Les cuentes xuben 219.656.919 euros. D’esa cantidá, 12,8 millones van dedicase a dar prioridá a la incorporación de mocedá y la meyora de les esplotaciones.

Nel abanicu de prioridaes de la conseyería, Calvo tamién apostó por potenciar la comercialización de los productos agroalimentarios; ameyorar la xestión del usu públicu de los espacios protexíos; la llucha contra les especies invasores; el plan de choque de la propiedá forestal, y la modernización y diversificación del sector pesqueru.

La partida de 12,8 millones prevista pola conseyería pa impulsar l’actividá va destinase a la concesión d’ayudes pa favorecer el relevu xeneracional y la meyora de les esplotaciones, lo que supón una medría del 22 % al respective d’anguaño. Esta medría va dexar facer frente, ente otros oxetivos, al compromisu de llexislatura d’aumentar les ayudes a la incorporación de mocedá dende los 50.000 euros hasta’l máximu de 75.000, según actividá principal y zonificación.

Otra de les prioridaes de la conseyería supón potenciar la marca Alimentos del paraísu, faciéndola más atractiva pa consumidores y productores, y vinculándola a los valores de calidá y sostenibilidá d’Asturies. Pa eso, dirixe más d’un millón pa campañes y acciones promocionales d’estes ellaboraciones.

Estes midíes adscríbense a la Dirección Xeneral de Desenvolvimientu Rural y Industries Agraries, que cunta con una asignación de 30,95 millones. D’ellos, destaca’l sofitu a los programes Leader, un instrumentu importante na diversificación y la creación d’actividá económica estable, con 16,23 millones. Tamién aumenta nun 2 % el presupuestu del Serviciu Rexonal d’Investigación y Desenvolvimientu Agroalimentario d’Asturies (Serida), que va disponer de 8.731.682 euros pa sostener les sos actividaes d’investigación y innovación tecnolóxica en collaboración con empreses, cooperatives, centros tecnolóxicos y alministraciones.



Sofitu al sector ganaderu

La Dirección Xeneral de Ganadería pon l’acentu nes ayudes empobinaes a aumentar la rentabilidá y ameyorar la competitividá del sector primariu, lo que dexa destinar recursos al caltenimientu de la renta de los ganaderos, compensar los costos derivaos de determinaos sistemes de producción de les esplotaciones, y promover la meyora de la sanidá, l’alimentación y el bienestar animal, amás d’a los sistemes de producción.

En pagos directos a la Política Agraria Común (PAC) presupuestáronse 64,12 millones en subvenciones pa los ganaderos. Tamién se caltienen los 18,27 millones de les ayudes agroambientales. D’esta manera, consolídase la medría de trés millones qu’hubo anguaño. Estes subvenciones tán dirixíes a incentivar y compensar l’aplicación de métodos de producción agrícoles y ganaderos que contribuyan a la protección y meyora del mediu ambiente.



Prevención de quemes y concentraciones parcelaries

La Dirección Xeneral de Planificación, Infraestructures Agraries y Montes, que cunta con 26.658.000 euros, un 1,34 % más qu’anguaño, apuesta pola prevención na llucha contra les quemes y la meyora de les infraestructures.

La inversión pa lluchar contra les quemes esperimenta un aumentu en toles partíes y ye significativa sobre manera’l de la llinia de subvenciones que se xestiona al traviés de convenios colos conceyos, que xube un 4 %, hasta algamar 3.860.000 euros.

Tocante a infraestructures, destínense 9.850.000 euros pa siguir colos proyectos que yá tán en marcha de concentraciones parcelaries y empezar otros nuevos, y realizar actuaciones pa dotar a les finques, montes y praderes de les infraestructures viaries y otros servicios que faigan posible les comunicaciones y tresporte.



Caltenimientu y xestión del patrimoniu natural

Nel campu de los recursos naturales, una de les prioridaes va ser impulsar la Rede Natural d’Asturies con un oxetivu doble: el caltenimientu y meyora de los espacios y la so biodiversidá, y el desenvolvimientu socioeconómicu d’estes zones. Pa eso, dispunxéronse 2.127.768 euros, ente los que destaquen la llinia de subvenciones de 200.000 euros a entidaes locales pa prevención de quemes vinculaes a usos agroganaderos tradicionales, y la de 248.000 euros pa los conceyos asturianos del ámbitu d’influencia del Parque Nacional de Los Picos d’Europa.

Otra de les prioridaes nesti capítulu ye la llucha contra especies exótiques invasores que suponen una amenaza pa la biodiversidá y les actividaes del mediu rural. Refuérzase’l presupuestu destináu al control y posible desaniciamientu d’estes especies con 748.000 euros, focalizándose sobre manera nel plumeru de la Pampa y l’aviespa asiática.



Llinies nueves d’ayudes al sector pesqueru

La pesca marítima ye otra pieza básica de la conseyería y nel proyectu de presupuestos pal 2020 destaca la puesta en marca de trés llinies nueves de subvenciones pa les que s’acuten 163.000 euros: una pa Redepesca, la rede ente marineros y organismos científicos; otra pa les cofraderíes, dirixida a la dotación d’apareyos y elementos de trabayu de l’actividá pesquera y de comercialización, y una tercera pa facilitar el relevu xeneracional, pa cursos de capacitación pal accesu a la profesión marítimo-pesquera.

L’añu que vien va tratase la ellaboración d’un Plan de Desenvolvimientu de la Pesca Artesanal, que va dexar actualizar la conocencia de la realidá socioeconómica de la flota pesquera asturiana.

Información sobre el documento

© Copyright 2006. Gobiernu del Principau d'Asturies