Gobiernu del Principau d'Asturies

Asturies, muncho más cerca

Tas en

Asturias.es El Principáu constituye la Mesa Rexonal pal Fomentu de la ...
 

Aniciu

El Principáu constituye la Mesa Rexonal pal Fomentu de la Movilidá Eléctrica y impulsa una rede d’once puntos universales de recarga rápida de bateríes de vehículos

- El serviciu va repartise pel área central, la costa y la exa Cangas del Narcea-Cangues d’Onís

13/02/2018

     - L’actuación va completase con midíes divulgatives empobinaes a usuarios particulares, empreses y alministraciones
    - L’Executivu va apoyar oportunidaes nueves de negociu na cadena de valor empresarial

El conseyeru d’Empléu, Industria y Turismu, Isaac Pola, presentó güei la Mesa Rexonal pal Fomentu de la Movilidá Eléctrica, creada pa favorecer l’usu d’esta clas de tecnoloxía nel tresporte per carretera, y anunció la puesta en marcha d’una rede de puntos universales de recarga rápida repartíos pel territoriu.

La mesa ta coordinada pola Dirección Xeneral de Minería y Enerxía y tien el sofitu técnicu de la Fundación Asturiana de la Enerxía (Faen). Esti foru abiertu, que yá celebró dellos alcuentros, facilita una contorna de collaboración público-privada pa definir estratexes, diseñar una rede de puntos de recarga pa vehículos eléctricos y promover actuaciones de formación y iniciatives empresariales.

El foru tamién cunta cola participación d’otros organismos públicos como l’Institutu de Desenvolvimientu Económicu del Principáu (Idepa) y la Universidá d’Uviéu, y de compañíes eléctriques como Viesgo, EDP, Iberdrola, Electra Norte y Endesa. Amás, tienen representación entidaes como l’Asociación Empresarial pal Desenvolvimientu del Vehículu Eléctricu (Aedive), l’Asociación d’Usuarios de Vehículos Eléctricos (Auve), l’Agrupación Asturiana de Vendedores al por menor de Carburantes y Combustibles (Asvecar) y xestores de carga como IBIL, amás d’empreses comercializadores de vehículos eléctricos como’l Grupu Resnova y Tesla, y fabricantes de componentes como Phoenix Contact.

 

Rede de puntos de recarga

Pola tamién anunció que yá se llogró’l primer oxetivu de la Mesa Rexonal pal Fomentu de la Movilidá Eléctrica: el desenvolvimientu d’una rede básica de puntos de recarga rápida y universal d’accesu públicu pa vehículos eléctricos, que se va executar nun plazu de 12 meses. Esta infraestructura va repartise en trés zones: l’área central, la zona costera y la exa Cangas-Cangues d’Onís.

Trátase d’once puntos de recarga rápida, de 43 kilovatios en corriente alterno y 50 en continuo, que dexen realizar recargues del 80 % de la batería d’un vehículu eléctricu en media hora, daqué que va facer posible usar esti mediu de tresporte en tol territoriu asturianu y conectar coles comunidaes vecines y otres redes.

A la execución d’estes infraestructures súmense otres midíes de calter divulgativu y formativu. Nesti sentíu, van desenvolvese eventos demostrativos itinerantes en dellos puntos del Principáu p’averar esta tecnoloxía a particulares y empreses, amás d’acciones de formación empobinaes a xestores municipales y instaladores, ente otros colectivos.

L’impulsu a la movilidá eléctrica va completase col sofitu a modelos nuevos de negociu y desenvolvimientu empresarial, amás d’a servicios y productos dixitales emerxentes: fabricación y caltenimientu de puntos de recarga, big data, intelixencia artificial, plataformes collaboratives, etcétera.

P’acabar, el conseyeru destacó que se destinaron 60.000 euros a dos proyectos singulares de sofitu a la infraestructura básica de recarga. El primeru consiste nun puntu aisláu de la rede eléctrica y alimentáu con fontes enerxétiques anovables lligáu a les instalaciones de la Universidá d’Uviéu en Mieres. Trátase d’un conceptu innovador qu’axunta la integración de sistemes de producción y almacenamientu y l’usu d’enerxía solar pa que les emisiones seyan nules. El segundu proyectu ye una estación itinerante pa recargar, tamién alimentada con fontes anovables, que va valir pa realizar actuaciones de sensibilización en toles partes d’Asturies.

L’usu de vehículos eléctricos amenorga’l costu enerxéticu por quilómetru aproximao unes cinco veces en comparanza colos qu’usen combustibles convencionales. Amás, esti tipu de movilidá ayuda a la meyora de la calidá del aire y a la mengua de la contaminación acústico.

 

 

Información sobre el documento

© Copyright 2006. Gobiernu del Principau d'Asturies