Gobiernu del Principau d'Asturies

Asturies, muncho más cerca

Tas en

Asturias.es Empléu refuerza les partíes de sofitu a la dixitalización ...
 

Aniciu

Empléu refuerza les partíes de sofitu a la dixitalización d'empreses, a los autónomos y a la contratación de paraos en 2019

- El presupuestu de la conseyería xube a 228.386.926 euros, un 0,17% más que'l proyectu pa 2018 y un 13,4% percima del creitu final dispuestu

03/12/2018

-  Van dedicase 30,7 millones a la promoción económica, con nueves midíes como dos llinies d'ayudes pa favorecer la innovación en pymes y negocios per cuenta propia.

- El Principáu va crear una rede de centros d'atención a entamadores con servicios unificaos y un itinerariu d'acompañamientu común

- La partida empobinada a actividaes formatives para paraos y ocupaos va aumentar en 7 millones

 

El presupuestu de la Conseyería d'Empléu, Industria y Turismu pa 2019 xube a 228.386.926 euros, un 0,17% más qu'el del proyectu pa esti añu y un 13,4% percima del creitu dispuestu finalmente. El departamentu que dirixe Isaac Pola va centrar los sos esfuerzos en siguir impulsando la dixitalización de la industria, va crear una plataforma de sofitu al emprendimientu para unificar servicios y va reforzar les polítiques d'empléu que favorecen la contratación de los colectivos más vulnerables. El proyectu de tresformación dixital de l'Alministración, qu'empezó a executase esti añu, constitúi otra de les principales actuaciones, con una partida superior a los 6 millones.

Pola presentó esta tarde les cuentes na Xunta Xeneral y destacó qu'el 42,18% del total; esto ye, 96.334.153 euros (+9,6%) dedícase a tresferencies de capital -les ayudes a proyectos d'inversión del sector productivu-, lo qu'evidencia'l sofitu de la conseyería a la investigación, desenvolvimientu ya innovación de los sectores económicos.

Les tresferencies corrientes suponen el 31,8% del presupuestu, con una partida de 72.643.709 euros (-3,56%). Esta cantidá focalízase, sobremanera, nel Serviciu Públicu d'Empléu (Sepepa), con un presupuestu que crez en 3,8 millones (3,7%), hasta algamar los 106,9.

Los fondos destinaos al Institutu de Desenvolvimientu Económicu (Idepa) crecen un 18,4%, hasta los 30,7 millones. El principal oxetivu va ser siguir favoreciendo la incorporación de nueves tecnoloxíes nes empreses. Con esti propósitu, va ponese en marcha'l Dixital Innovation Hub, un centru d'innovación que se va sofitar nes competencies diferenciales d'Asturies y va ser clave pa l'allugamientu de la comunidá nel movimientu global de la dixitalización. Tamién se va habilitar una llinia d'ayudes específica con cuenta de que pymes y autónomos apuesten por tecnoloxíes innovadores. Esta midida ta dotada con 1.250.000 euros y va sumase a les llinies d'I+D+i yá esistentes.

Polo xeneral, va apostase por ayudar a les pequeñes y medianes empreses a anovar. Asina, la convocatoria Innova Idepa, dotada con 1,5 millones, va dirixise puramente a pymes y na principal llinia de sofitu a la I+D va acutase una partida de 2,4 millones (el 60% de la so dotación total) para esti sector.

Amás, les dos convocatories pa incorporar a les pequeñes y nueves empreses a la innovación - la de cheques d'innovación y la d'ayudes a firmes de base tecnolóxica-, refuércense un 24%. L'oxetivu ye claru: que la industria incorpore tecnoloxía creada por empreses asturianes.

 

Sofitu a los entamadores

 

En 2019 va ponese en marcha la Rede de Centros de Referencia d'Entamadores d'Asturies (rede Crea), que va permitir unificar los servicios qu'empresten les distintes empreses públiques. va reforzase la formación de los técnicos, va diseñase un itinerariu d'acompañamientu común y va enllantase una plataforma de xestión que faiga posible l'intercambiu automáticu d'información y datos ente centros. Pa ello, la partida a Valnalón auméntase un 7,3%, hasta los 402.400 euros

Tamién se va convocar una nueva ayuda, el cheque del emprendimientu, que va sustituyir al tique del autónomu y ameyorálu, yá que va permitir sofitar a persones que moren nel estranxeru y retornen a Asturies con mires d'entamar o a aquelles que, tres un primer fracasu, aspiren a abrir un nuevu negociu. La cuantía de l'ayuda va xubir a 10.000 euros, 6.000 más qu'el extintu tique del autónomu.

Pela so parte, el Plan de Ciencia, Tecnoloxía ya Innovación  (PCTI) 2022 va cuntar con 83,1 millones de delles conseyeríes. Una de les iniciatives previstes pa 2019 ye'l programa In itineras, que consiste nel diseñu d'un itinerariu pa la xestión del talentu basáu na formación y la movilidá que tome tolos perfiles que trabayen en proyectos d'I+D+i pa cubrir la carrera profesional del investigador. Esta midida ta dotada con 5,6 millones, de los cualos 1,6 vienen de la Conseyería d'Empléu. 

Refuerzu a la contratación

 

La partida del Sepepa auméntase un 3,7% pa reforzar les midíes que faciliten l'accesu de la mocedá al mercáu llaboral, fomentar la contratación, sobremanera de persones con especiales dificultaes, y empobinar a los paraos na busca d'un puestu de trabayu.

Al sofitu a la contratación -tanto nel ámbitu local como empresarial- y la orientación profesional destínense 53,8 millones. Destaquen les partíes pa conceyos (13,7 millones), pa empreses (14,2) y pa entidaes ensin ánimu d'arriquecimientu (10,4). Pela so parte, los centros especiales d'empléu van recibir 14,4 millones.

Tamién s'ameyoren les ayudes a la contratación de mocedá inscrita nel Sistema de Garantía Xuvenil por aciu el financiamientu de contratos de formación y aprendizaxe (aquellos que combinen l'aprendizaxe con una actividá llaboral retribuyía) que van contemplar, per primer vez, les contrataciones nes que la formación s’impartie nel sistema educativu, amás de la correspondiente a los certificaos de profesionalidá.

Los planes mistos d'empléu y formación, que beneficien sobremanera a paraos de llarga duración y nuevos ensin cualificación, van concentrar 13,3 millones. Y el programa de formación profesional pal empléu va cuntar con 39,6 millones, 7 más qu'anguaño. Nesti ámbitu, siguirá afaciéndose la ufierta de cursos a los perfiles más demandaos.

 

Alministración electrónica

 

El proyectu de tresformación dixital del Principáu, qu'empezó a executase esti añu va tener una dotación de 6.050.000 euros pa 2019. Con esta partida, va consolidase'l cambéu de modelu escontra'l puestu de trabayu dixital, van ameyorase los servicios de la see electrónica, los procesos de xestión interna y la seguridá de los sistemes d'información. Tamién se van esplegar nuevos módulos de la plataforma d'alministración electrónica Site, ente los que figura'l tramitador d'espedientes electrónicos y la contratación pública dixital.

En total, la Dirección de Tecnoloxíes de la Información y la Comunicación va disponer de 35.425.872 euros que-y van permitir, amás, rematar el proyectu Escueles Conectaes y poner en marcha un nuevu modelu de trabayu nos centros educativos con cuenta de los estudiantes apuerten dende casa a les ferramientes de trabayu disponibles en los ordenadores de l'aula d'Informática.

 

Enerxíes anovables y minería

 

El presupuestu destináu a la promoción d'enerxíes anovables y a les actuaciones de sofitu a la eficiencia enerxética y la meyora de les instalaciones eléctriques antigües xube a 2.296.900 euros.

Per otru llau, a la investigación, desenvolvimientu ya innovación nel ámbitu mineru y a actuaciones de rehabilitación d'espacios degradaos dedíquense 1.400.289 euros.

 

Turismu

 

La partida pa promocionar Asturies como destín turísticu y fomentar la competitividá del sector suma 10.006.430 euros. Nesti apartáu, destaca la creación de dos nueves llínies d'ayudes, una d'elles alliniada coles mires de convertir el Principáu en destín intelixente y ameyorar la sostenibilidá medioambiental. La otra, va sofitar la execución de proyectos innovadores.

 

Estensión de la banda ancha

 

Van invertise 8,9 millones pa estender la sociedá de la información. Dientro d'esta partida, destaquen 3,8 millones pa la instalación y caltenimientu de la rede de centros deTDT, que fai posible qu'unos 100.000 asturianos que viven en núcleos ensin incluyir na zona de cobertoria obligada polos radiodifusores d'ámbitu estatal puedan recibir la señal, y los costos del espardimientu y tresporte de la señal de la RTPA.

 

 

Información sobre el documento

© Copyright 2006. Gobiernu del Principau d'Asturies