Gobiernu del Principau d'Asturies

Asturies, muncho más cerca

Tas en

Asturias.es La oficina d’atención telefónica del área sanitaria d’Avilés ...
 

Aniciu

La oficina d’atención telefónica del área sanitaria d’Avilés recibe una media de 3.184 llamaes al mes, les más d’elles pa tener información sobre cites

- Les preguntes sobre la demoranza de la llista d’espera quirúrxica suponen el 3 % de les comunicaciones

13/02/2018

   - El conseyeru Francisco del Busto destaca la satisfacción de los usuarios con esta esperiencia pilotu, que se podría treslladar a otres zones nel futuru

La oficina d’atención telefónica sobre llistes d’espera d’intervención quirúrxica, consultes esternes y pruebes diagnóstiques que se punxo en marcha en marzu del 2017 como esperiencia pilotu n’área sanitaria III, correspondiente a la zona d’Avilés, rexistró una media de 3.184 llamaes mensuales. Los usuarios, que s’interesen sobre manera por cites y pruebes pendientes, consideren satisfactoriu’l serviciu, polo que podría estendese nel futuru a les demás árees sanitaries.

La oficina recibió dende marzu hasta avientu del 2017 una media de 156 llamaes diaries, de les que 146 referíense a consultes y pruebes diagnóstiques y nueve a les llistes d’espera quirúrxica.

En función del motivu de les comunicaciones, les más d’elles fixéronles pacientes que precisaben datos sobre cites y pruebes pendientes –aproximao’l 22 % del total-, siguíes de pidimientos de reprogramación (17 %), llamaes ayenes a la oficina (16 %) y confirmación de citaciones (14,5 %).

La información sobre les demorances de les llistes d’espera quirúrxica supunxo’l 3 % del total de les llamaes, hasta algamar 853 nos nueve meses completos nos que funcionó’l serviciu, lo que supón una media de 94 mensuales y de 4 diaries nos díes llaborables.

En total hubo 1.740 consultes de pacientes que demandaron dalgún datu o realizaron dalgún pidimientu de cambéu al respective de les llistes pa intervenciones quirúrxiques, lo que supón aproximao’l 6 % del global de 24.766 comunicaciones telefóniques rexistraes.

Los usuarios del serviciu valoren l’atención que se-yos da na oficina y consideren qu’ameyoró’l so accesu a la información y l’atención.

Otra manera, les más de les llamaes fáense los llunes y los martes.

El conseyeru de Sanidá, Francisco del Busto, resaltó’l bon resultáu d’esti serviciu güei n’Avilés, onde participó na xornada Adherencia al tratamientu n’Asturies, que se celebra n’Hospital Universitariu San Agustín. Del Busto aseguró que la esperiencia ta dando resultaos “perpositivos”, tanto pol númberu de consultes que se rexistren como pola valoración de los usuarios. “En munchos casos, les llamaes faen posible cambeos de feches nes consultes o anulación de cites que xeneren buecos que son ocupaos por otros pacientes cuando la comunicación se fai con tiempu abondu”, precisó.

 

 

Información sobre el documento

© Copyright 2006. Gobiernu del Principau d'Asturies