Gobiernu del Principau d'Asturies

Asturies, muncho más cerca

Tas en

Asturias.es El Gobiernu d'Asturies reivindica una llei de vivienda estatal ...
 

Aniciu

El Gobiernu d'Asturies reivindica una llei de vivienda estatal que garantice la igualdá y cohesión interterritorial

Melania Álvarez pide que la norma contemple les peculiaridaes de cada comunidá autónoma. “Agora más que nunca, tenemos d'apostar por nuevos modelos de convivencia algamadices, tanto pa mayores como pa opciones intergeneracionales”, sorraya la conseyera

04/06/2020

El Gobiernu d'Asturies reivindica una llei de vivienda estatal que garantice la igualdá y la cohesión interterritorial. Esta ye la propuesta principal que la conseyera de Derechos Sociales y Bienestar, Melania Álvarez, y el director xeneral de la Vivienda, Fermín Bravo, plantegaron güei na Conferencia Sectorial de Vivienda, Urbanismu y Suelu, na que participaron representantes de toles comunidaes.

Álvarez insistió na importancia de dar forma a una norma nacional que contribuya a la igualdá territorial, anque tamién apuntó que la llei tien de dexar marxe pa que les diferencies sociales y económiques de cada territoriu puedan xestionase dende les comunidaes. “El desenvolvimientu d'esta normativa yera un oxetivu al entamu d'esta llexislatura, pero agora cobra más sentíu, yá que nos enfrentamos a una crisis sanitaria ensin precedentes”, indicó.

Coles mesmes, la conseyera destacó que ye importante apostar “por nuevos modelos de convivencia algamadizos, tanto pa persones mayores como pa otres opciones interxeneracionales”.

La titular de Derechos Sociales aprovechó la xunta telemática pa esplicar los oxetivos que tien Asturies nel ámbitu de la vivienda pública. “Apostamos por un parque públicu algamadizu, accesible y que dea cobertura a los colectivos más vulnerables”, precisó.

Tamién defendió la política de vivienda áxil y acertada”, desenvuelta pol Executivu central nesta crisis sanitaria. “Tomáronse midíes de protección de los impagos d'hipoteques y arriendos y amplióse la moratoria de les execuciones hipotecaries a colectivos vulnerables”, señaló Álvarez.



Innovación nel modelu asturianu

La Conseyería de Derechos Sociales y Bienestar dedicó l'añu pasáu 2,3 millones a arreglos d'inmuebles y zones comunes del parque públicu de vivienda. Esta inversión, enfocada a la rexeneración urbana y el caltenimientu y meyora de los pisos, va siguir anguaño.

Tocantes a los programes d'innovación, destaca la iniciativa Housing first pa persones ensin llar, que tamién foi reconocida a nivel européu y de la que se beneficien yá 32 persones, mesmo que la implantación d'un innovador sistema d'autoxestión enerxética nuna comunidá con 54 viviendes n'Uviéu.

Información sobre el documento

© Copyright 2006. Gobiernu del Principau d'Asturies