Gobiernu del Principau d'Asturies

Asturies, muncho más cerca

Tas en

Asturias.es Temes Economía y finances El Gobiernu d’Asturies destina 872.000 euros a subvenciones pa ...
 

Economía y finances

El Gobiernu d’Asturies destina 872.000 euros a subvenciones pa favorecer el tránsitu camín d’una economía baxa en carbonu

La convocatoria ta empobinada a empreses de tolos sectores y tien como oxetivu l’aprovechamientu de los recursos renovables autóctonos pa xenerar enerxía. L’añu pasáu concediéronse nueve ayudes que movilizaron una inversión superior a los 2,9 millones

07/07/2019

El Gobiernu d’Asturies aprobó una partida de 872.000 euros destinada a la convocatoria de subvenciones a empreses pa favorecer, en tolos sectores, el tránsitu camín d’una economía baxa en carbonu col desenvolvimientu de proyectos d’eficiencia enerxética.

Esta iniciativa, que cunta con cofinanciación del Fondu Européu de Desenvolvimientu Rexonal (Feder), potencia l’aprovechamientu de recursos anovables autóctonos de biomasa forestal y del calor del agua de mina, de la que sofita acciones pal aforru enerxéticu y l’amenorgamientu de les emisiones de gases a l’atmósfera.

En concreto, van financiase dos llinies d’actuación:

   - Fomentu de la producción y distribución d’enerxía derivao de fontes anovables: implantación de sistemes de producción centralizada de calor y fríu, como redes a partir de biomasa o xeotermia d’agua de mines pa comunidaes locales pequeñes y medianes.
   - Fomentu de la eficiencia enerxética n’empreses: auditoríes enerxétiques en pymes y implantación de midíes d’aforru, diversificación y eficiencia en compañíes de cualquier tamañu.

Na convocatoria del 2018 concediéronse nueve subvenciones por un valor de 1.379.153 euros, que movilizaron una inversión de más de 2,9 millones. L’importe mediu de les ayudes abonaes asítiase en 101.865 euros y financiáronse proyectos como una rede de calefacción con xeotermia d’agua de mina del pozu d’El Fondón, en Llangréu, y delles actuaciones d’eficiencia enerxética n’empreses.

Les subvenciones tán dirixíes a empreses, incluyendo les firmes provisores de servicios enerxéticos, que promuevan l’usu d’anovables y d’aforru y eficiencia. Les sociedaes interesaes van disponer d’un mes, a partir de la publicación de la convocatoria nel Bopa, pa presentar les sos solicitúes o la documentación necesario.

 

Información sobre el documento

© Copyright 2006. Gobiernu del Principau d'Asturies