Gobiernu del Principau d'Asturies

Asturies, muncho más cerca

Tas en

Asturias.es Temes Emplegu El Gobiernu d’Asturies llanza una campaña audiovisual pa ...
 

Emplegu

El Gobiernu d’Asturies llanza una campaña audiovisual pa facilitar la transición del salariu social al ingresu mínimu vital

Los beneficiarios de la prestación autonómica menores de 65 años tienen que solicitar l’ayuda estatal o autorizar que la Conseyería de Derechos Sociales lo faiga por ellos. El Principáu va unviar en setiembre al ministeriu tolos datos de los usuarios que dieren el consentimientu

03/07/2020

El Gobiernu d’Asturies llanzó una campaña audiovisual pa impulsar el tresvase d’espedientes dende’l salariu social básicu (SSB) al ingresu mínimu vital (IMV). La Conseyería de Derechos Sociales y Bienestar ellaboró un videu informativu onde s’esplica de manera clara y cenciella cuáles son les canales al traviés de les que pue solicitar la prestación estatal, a lo que tán obligaes toes aquelles persones que reciben el salariu social y que seyan menores de 65 años.

Los beneficiarios de la renta autonómica, aprobada n’Asturies nel añu 2005, puen solicitar directamente l’Ingresu Mínimu Vital dende la mesma web de la Seguridá Social www.seg-social.es o firmar un consentimientu espresu qu’autoriza a la Conseyería de Derechos Sociales y Bienestar a trespasar los datos al Institutu Nacional de la Seguridá Social (INSS).

Les entidaes locales y la conseyería tán collaborando pa dirixise a toles persones primero del 17 d’agostu. Sicasí, aconséyase que les que tengan capacidá de xestionar directamente vía telemática, al traviés de la páxina web www.asturias.es, daes les llimitaciones pa dir presencialmente a les oficines públiques (han solicitar cita previa nos centros de servicios sociales municipales o en cualquier oficina d’atención al públicu del Principáu).

La Conseyería de Derechos Sociales y Bienestar va unviar al Ministeriu d’Inclusión, Seguridá Social y Migraciones los primeros espedientes en setiembre, colo que s’apremia a la ciudadanía a xestionar esti consentimientu pa poder realizar el tresvase de datos lo primero posible.

Van quedar quitos de cobrar l’ayuda estatal y van caltenese baxo’l paragües de la prestación autonómica los mayores de 65 años y aquelles unidaes familiares que lleven conviviendo menos d’un añu.

Anguaño n’Asturies perciben el salariu social básicu 22.223 families.


Icono gráfico alusivo al tipo de archivo Audiu (Audiu: 531 Kb) (n'español)

Información sobre el documento

© Copyright 2006. Gobiernu del Principau d'Asturies