Gobiernu del Principau d'Asturies

Asturies, muncho más cerca

Tas en

Asturias.es Temes Ociu y tiempo llibre El Muséu del Xurásicu rexistra 1.767 visitantes diarios na ponte ...
 

Ociu y tiempo llibre

El Muséu del Xurásicu rexistra 1.767 visitantes diarios na ponte de Selmana Santa y supera los 7.000 usuarios

El conxuntu d’equipamientos dependientes de la Conseyería de Turismu recibe un 23 % más de turistes que nel 2018

23/04/2019

El Muséu del Xurásicu d’Asturies (Muxa) rexistró una media de 1.767 visitantes diarios na ponte de Selmana Santa y algamó un total de 7.068 usuarios nesos cuatro díes. Esta cifra representa una medría del 20 % al respective del mesmu periodu del 2018.

El conxuntu de los equipamientos culturales dependientes de la Conseyería d’Empléu, Industria y Turismu siguió’l mesmu enclín y sumó un total de 11.694 visitantes, lo que representa una medría del 19 % en comparanza col añu pasáu. En concreto, la xubida algamó un 26 % nel Centru d’Interpretación del Prerrománicu d’Uviéu, un 22 % nel Centru d’Arte Rupestre de Tito Bustillo (Ribeseya), el 13 % nel Parque de la Prehistoria de Teberga y el 12 % en Llaboral Ciudá de la Cultura (Xixón).

Pela so parte, el Centru d’Información Turística del Principáu, allugáu n’Uviéu, y la oficina d’información turística del aeropuertu atendieron a 3.853 persones, lo que supón un aumentu del 36 %.

En total, nel conxuntu de los equipamientos turísticos y culturales algamáronse 15.547 visitantes, un 23 % más que nel mesmu periodu del 2018.

El director xeneral de Comerciu y Turismu, Julio González Zapico, sorrayó qu’estos datos confirmen que la Selmana Santa foi “realmente favorable”. “La confluencia de dellos factores, pero sobre manera’l frutu d’años de trabayu col sector por un destín de calidá, son los responsables de la bona salú del turismu asturianu”, indicó.

Zapico enfotóse en que nel 2019 s’afite l’enclín de los últimos años y resaltó’l “grau de cumplimientu de los oxetivos definíos nel Programa de Turismu Sostenible d’Asturies 2020”.

 

Información sobre el documento

© Copyright 2006. Gobiernu del Principau d'Asturies