Gobiernu del Principau d'Asturies

Asturies, muncho más cerca

Tas en

Asturias.es Gobiernu Actualidá El Gobiernu d'Asturies celebra la confirmación de la venta de la ...
 

Actualidá

El Gobiernu d'Asturies celebra la confirmación de la venta de la planta d’Alcoa n'Avilés al grupu Parter

31/07/2019

   - L'Executivu considera garantizada l'actividá industrial y el caltenimientu del empléu
   - El Principáu ufierta collaboración al nuevu propietariu pa contribuyir a consolidar y espandir el proyectu empresarial
   - El conseyeru d'Industria destaca que la implicación de les alministraciones foi clave nel alcuerdu

El Gobiernu d'Asturies amosó'l so contentu pola resolución positiva de la venta de les plantes d’Alcoa n'Avilés y La Coruña, que permite la continuidá de la producción y el caltenimientu del empléu en dambes factoríes. Asina lo espresó güei el conseyeru d'Industria, Empléu y Promoción Económica, Enrique Fernández, tres la xunta de la comisión de siguimientu de los alcuerdos pol caltenimientu de l'actividá industrial, na que se confirmó la so compra pol fondu de capital riesgu Parter Capital Group nos términos yá conocíos.

“Esti anunciu garantiza que'l Principáu caltenga una actividá mui importante pa la economía y la industria, qu'apurre'l 0,30% del valor añedíu y xenera cerca de 800 puestos de trabayu directos ya inducíos”, señaló. Amás, el conseyeru considera que la venta permite a la plantiya estenar les incertidumes sobre'l so futuru llaboral inmediatu y poner fin a la situación d'inestabilidá de los últimos meses.

Fernández destacó l'esfuerzu de mediación realizáu polos gobiernos autonómicu y central, que foi fundamental la so implicación n'ochobre de 2018, pa llograr una solución satisfactoria al difícil escenariu abiertu tres l'anunciu d’Alcoa del zarru de les sos factoríes d'aluminiu básicu n'Avilés y A Coruña.

Nesti contestu, el Gobiernu d'Asturies ufiertó la so collaboración al nuevu propietariu pa que l’horizonte temporal previstu nos alcuerdos pueda ampliase, col fin de consolidar el proyectu industrial y los empleos, prioridaes sobre les que va trabayar dende agora.

Fernández repitió'l compromisu del Principáu col sector industrial y col desenvolvimientu de polítiques que permitan la so modernización, mesmo la promoción de nueves iniciatives empresariales basaes na investigación y la innovación.

 

Información sobre el documento

© Copyright 2006. Gobiernu del Principau d'Asturies