Gobiernu del Principau d'Asturies

Asturies, muncho más cerca

Tas en

Asturias.es El Plan de Salvamentu en Playes va movilizar anguaño 313 ...
 

Aniciu

El Plan de Salvamentu en Playes va movilizar anguaño 313 profesionales ente socorristes, llancheros y coordinadores municipales

El Principáu financia con 394. 000 euros el Sapla, que va poner puestos de salvamentu en 66 arenales: 60 con serviciu diariu y 6 en fines de selmana. El dispositivu va tar operativu en 18 conceyos hasta’l 30 de setiembre. nel 2017 rexistráronse 10. 574 intervenciones, les más d’elles de calter sanitariu y primeros auxilios. Los socorristes de La Playa Aguilar amuesen la preparación con dos exercicios de rescate acuáticu, ún d’ellos con moto d’agua

La alcaldesa de Muros de Nalón, Carmen Arango, y el consejero de Presidencia y Participación Ciudadana, Guillermo Martínez

10/07/2018

El conseyeru de Presidencia y Participación Ciudadana, Guillermo Martínez, presentó güei en Muros el Plan de Salvamentu en Playes del Principáu d’Asturies (Sapla) 2018, que va movilizar 313 profesionales: 278 socorristes, 17 llancheros y 18 coordinadores municipales.

El plan Sapa, vixente dende’l 2001, estiende la cobertura a los 211 arenales allugaos nos 483 quilómetros de superficie costera del Principáu y busca cuatro oxetivos: el rescate de bañistes en peligru, l’asistencia sanitaria a los usuarios, la evacuación de mancaos o persones enfermes y la prevención pa evitar riesgos innecesarios. Concebíu pa garantizar la cobertura de les emerxencies y incidencies que puedan surdir na costa, “establez puestos de salvamentu, con personal socorrista, en 66 arenales: 60 d’ellos con serviciu diariu y 6 en fines de selmana”, esplicó Martínez. A esti dispositivu, que va permanecer activu hasta’l 30 de setiembre, súmense les siete playes de Xixón, con serviciu de salvamentu propiu, que la so organización y recursos cuerren a cargu del Conceyu, anque actúa de manera coordinada col Serviciu d’Emerxencies (Sepa).

El Gobiernu d’Asturies apurre pa la execución d’estos convenios una partida de 393.875 euros. Per un llau, 345.000 destínense a la collaboración colos conceyos pa sufragar los gastos del arriendu de casetes de los puestos de salvamentu y la incorporación de los socorristes y los profesionales encargaos de les llanches, que van tar a pie de playa dende les 12:00 hasta les 19:00 hores. Los otros 48.875 valen pa financiar el material necesario pa desenvolver el serviciu.

“El Sepa tamién dexa a los conceyos dél material valorao en 600.000 euros, como embarcaciones y motos acuátiques, cartelería y elementos de señalización, desfibriladores y equipos d’osixenoterapia y de telecomunicaciones”, destacó’l titular de Presidencia.

 

Collaboración y coordinación ente alministraciones

Martínez valoró la collaboración que dan los conceyos y el llabor que realicen tanto’l Sepa como les policíes locales, los Cuerpos y Fuercies de Seguranza del Estáu, les unidaes asistenciales del Serviciu d’Asistencia Médica Urxente (SAMU), les agrupaciones municipales de voluntarios de Protección Civil, la Unidá de Protección Civil de la Delegación del Gobiernu, la Sociedá Estatal de Salvamentu Marítimu, el Llaboratoriu de Salú Pública del Principáu y Cruz Bermeya.

“El so trabayu fai posible una respuesta, añu tres d’añu, cada vez más rápida y pereficaz na coordinación de toles persones que participen nel operativu”, precisó. Amás, esplicó que nel 2017 contabilizáronse 10.574 intervenciones, la cifra más baxa de los postreros once años. En concreto, el 92,02 % foron primeros auxilios emprestaos polos mesmos servicios de salvamentu a pie de playa y namás en 91 casos riquióse’l treslláu de los afectaos a centros sanitarios. En total, efectuáronse 232 rescates, el 70,2 % polos socorristes de los arenales.

 

Exerciciu en La Playa Aguilar

Tres de la presentación, celebrada na Casa Conceyu de Muros, el conseyeru, acompañáu pola alcaldesa, Carmen Arango, el xerente del Sepa y los representantes de los conceyos costeros treslladáronse a La Playa Aguilar pa ver dos exercicios de rescate acuáticu realizaos polos servicios de salvamentu. Ún de los simulacros foi con moto d’agua y l’otru con tablón de rescate. Los socorristes tamién s’exercitaron énte una posible atención sanitaria con maniobres de reanimación cardiopulmonar.

Nes playes de Muros (Aguilar, Los Llanos y San Esteban) rexistráronse l’añu pasáu alredor de 860 intervenciones, lo que convierte’l conceyu nel cuartu onde más actuaciones se llevaron a cabu.

   Icono gráfico alusivo al tipo de archivo Audiu (Audiu: 1 Mb) (n'español)

Información sobre el documento

© Copyright 2006. Gobiernu del Principau d'Asturies