Gobierno del Principado de Asturias

Asturias, mucho más cerca

Estás en

Aniciu Temes Economía y finances El Gobiernu d’Asturies destaca que les ayudes dirixíes a les ...
 

Economía y finances

El Gobiernu d’Asturies destaca que les ayudes dirixíes a les entidaes del tercer sector aumentaron un 24,12 % dende’l 2017

La Conseyería de Derechos Sociales y Bienestar va caltener toles convocatories p’asegurar l’atención social d’estos colectivos. Melania Álvarez afirma que “paez razonable axustar les ayudes a les actividaes que se puen xustificar”. “L’Executivu del Principáu nun va dexar a nengún colectivu al debalu”, recalca la titular del departamentu

04/09/2020

El Gobiernu d’Asturies va convocar toles llinies de subvenciones previstes pa garantizar l’atención social que da’l tercer sector. Asina lo manifestó güei la conseyera de Derechos Sociales y Bienestar, Melania Álvarez, quien destacó la medría del importe de les ayudes empobinaes a estos colectivos: del 24,12 % dende l’añu 2017 y del 8,39 % namás nel exerciciu actual. Estos aumentos superen la medría del presupuestu de la propia conseyería, que se llimitó al 10 % dende’l 2017.

Les entidaes del tercer sector recibieron nel 2015 ayudes por valor de 27.487.024,02 pa programes desenvueltos por estes organizaciones. Nel 2019, la cantidá xubió a 40.722.380,49 euros, lo que supón una medría de más de 13 millones.

El compromisu coles entidaes sociales refléxase tamién na medría d’otres partíes nel exerciciu actual:


  • Aumentu nun 5 %, pela primer vez dende va más de cinco años, de les subvenciones nominatives correspondientes a entidaes del tercer sector. En total, 28 organizaciones van recibir 1.922.245 euros anguaño.
  • Medría de la convocatoria d’ayudes con cargu a la x solidaria del IRPF 2020: más 467.000 euros.
  • L’aplicación de la Llei d’Acción Concertada va aumentar en 3,5 millones la cantidá prevista nel alcuerdu marcu vixente.
  • Medría de 800.000 euros p’asumir la xubida del conveniu colectivu en discapacidá.

La conseyera de Derechos Sociales y Bienestar afirmó que “el Gobiernu d’Asturies nun va dexar a nengún colectivu al debalu”. Precisó, amás, que “paez razonable que los importes de caúna de les ayudes s’axusten a les posibilidaes reales de xustificación posterior” porque hai actividaes, como les vinculaes al ociu, que nun pudieron desenvolvese de resultes de les llimitaciones derivaes del estáu d’alarma y de los propios conseyos y obligaciones sanitaries pola pandemia del coronavirus.

Coles mires d’optimizar la xestión del presupuestu y destinar tolos recursos disponibles a la respuesta inmediata énte situaciones d’urxencia y vulnerabilidá especial “alliniemos les cantidaes previstes pa les cinco convocatories (mayores, infancia, discapacidá, inclusión y voluntariáu) a les posibilidaes de xustificación. Nesti sentíu, trabayamos en reforzar l’acción que vienen desenvolviendo los servicios sociales municipales a lo llargo d’estos meses, que se va canalizar al traviés d’una tercer programación del plan concertáu”, esplicó.

Información sobre el documento

© Copyright 2006. Gobierno del Principado de Asturias