Gobiernu del Principau d'Asturies

Asturies, muncho más cerca

Tas en

Asturias.es Temes Medios de comunicación La xornada electoral entama con normalidá en los 615 locales ...
 

Medios de comunicación

La xornada electoral entama con normalidá en los 615 locales habilitaos pa exercer güei’l derechu al votu

A les 08:31 hores yá taba confirmada la constitución del 50% de les 1. 573 meses distribuyíes nos 78 conceyos asturianos. El conseyeru de Presidencia y Participación Ciudadana va comparecer a partir de les 14:30 hores nel Palaciu del Conde de Toreno pa ufiertar una primer meyora de participación

26/05/2019

La xornada electoral empezó n'Asturies con total normalidá cola constitución de les 1.573 meses electorales (1.213 na zona centro, 233 nel occidente y 127 nel oriente) partíes en 615 locales nos 78 conceyos del Principáu. Según la información tresmitida al Centru d'Espardimientu de Datos, a les 08:31 yá taba formáu'l 50% de les meses. La primer mesa constituyóse en Llanera.

Los asturianos escueyen güei, ente les 11 candidatures presentaes, a los 45 diputaos que van formar la Xunta Xeneral del Principáu: 36 pola circunscripción central, 6 pola occidental y 5 pola oriental. Una vegada cerraos los colexos electorales a les 20:00 hores, y dada la coincidencia de trés procesos electorales, l'orde en que se va llevar a cabu'l recuentu, en cumplimientu de la Llei Orgánica 5/1985, de 19 de xunu, del Réxime Electoral Xeneral, va ser el siguiente: comicios al Parlamentu Européu, municipales y autonómicos.

El Gobiernu d'Asturies distribuyó pela comunidá a 894 representantes que van disponer de 701 tabletes (426 na zona central, 179 nel occidente y 96 nel oriente) pal treslláu eficaz de los datos al Centru de Recoyida d'Información.

Coles mesmes, a lo llargo de la xornada, el conseyeru de Presidencia y Participación Ciudadana, Guillermo Martínez, va comparecer pa ufiertar datos de participación. La primer meyora va ser a partir de les 14:30 hores nel Centru d'Espardimientu de Datos (CDD), instaláu nel Palaciu Conde de Toreno. La segunda comparecencia va realizase dende'l mesmu llugar a les 18:30 hores y, a lo último, el conseyeru va ufiertar los datos del escrutiniu.

El siguimientu de la xornada electoral va desenvolvese dende esi Palaciu del Conde de Toreno, onde se va ufiertar a los medios de comunicación acreditaos diversos recursos y sistemes d'accesu a la información. Amás, la ciudadanía va disponer d'un serviciu de consulta en tiempu real de los resultaos na web www. resultadoselecciones2019. asturias.es (a la que puede aportase tamién dende l'enllaz asturias. infoelecciones.es) con distintos niveles d'agregamientu: comunidá, circunscripción y conceyu. El portal ye accesible pa los navegadores más comunes y por terminales, tanto fixos como móviles.

Al traviés de la web tamién podrá aportase a les retresmisiones per internet de les distintes ruedes de prensa que va ufiertar el conseyeru de Presidencia pa informar de desenvolvimientu de la xornada electoral. Estes emisiones podrán siguise tantuo en directuo como en diferío, al traviés d'un enllaz na páxina de resultaos que va permanecer disponible pal públicu una vegada concluyida cada rueda de prensa. Esto va permitir el siguimientu en vídeu y audiu de les comparecencies dende cualquier llugar con accesu a internet.

Tamién se creó una aplicación gratuita pa dispositivos qu'utilicen sistemes operativos IOS y Android, que va facilitar datos de candidatures, participación y resultaos del escrutiniu provisional per aciu teléfonos intelixentes y tabletes. L'aplicación va poder descargase de forma gratuita n'Apple store y Google Play

De la mesma, el Gobiernu d'Asturies habilitó un kit de votu accesible col fin de garantizar que los ciudadanos con discapacidá visual puedan exercer el so derechu al sufraxu nes elecciones a la Xunta Xeneral. Esta ye la cuarta vegada que'l Principáu facilita'l dispositivu con documentación nel sistema de lectoescritura braille y nesta ocasión pidieron 14 persones de seis conceyos: 6 n'Uviéu, 3 en Xixón, 2 n'Avilés, una en Castrillón, otra en Mieres y una más en Siero. El dispositivu garantiza l'autonomía y la plena garantía pal secretu del votu. La páxina web, creada pa espublizar tola información de la cita electoral, tamién amuesa tolos conteníos adaptaos a los estándares d'accesibilidá y dispón d'una ferramienta de llocución pa los invidentes.

El Principáu, dende la puesta en marcha de tolos preparativos del dispositivu electoral, estableció les midíes necesaries pa cumplir los estándares de seguridá esixíos. Asina, realizáronse analís de seguridá ya integridá cola collaboración del Centru Criptológico Nacional dependiente del Centru Nacional d'Intelixencia (CNI), se definió y probó un plan de continxencies y un grupu d'especialistes en ciberseguridá monitorizará la xornada y va actuar énte cualquier amenaza.

 

Información sobre el documento

© Copyright 2006. Gobiernu del Principau d'Asturies