Gobiernu del Principau d'Asturies

Asturies, muncho más cerca

Tas en

Asturias.es El Principáu entama la ellaboración del Plan Integral ...
 

Aniciu

El Principáu entama la ellaboración del Plan Integral d’Emigración 2021-2024

El documentu va definir los oxetivos de les polítiques de sofitu a la población que vive nel esterior y a les comunidaes con reconocimientu d’asturianía

19/11/2020

La conseyera de Presidencia, Rita Camblor, presidió güei la primer reunión del grupu de trabayu que va ellaborar el V Plan d’Emigración del Principáu, el documentu que va definir les polítiques de sofitu a los asturianos que viven fuera de la comunidá y que va tar vixente nel periodu 2021-2024.

La llei de los asturianos nel esterior y del reconocimientu d’asturianía establez nel so artículu 22 que’l Conseyu de Gobiernu, a propuesta de la conseyería competente, ha redactar cada cuatro años un plan integral d’emigración que va remitise a la Xunta Xeneral pal so debate.

Na ellaboración del documentu intervienen tolos departamentos rellacionaos cola población emigrante y retornao. Nesta ocasión, participen nel grupu de trabayu la viceconseyera de Turismu, Graciela Blanco; la presidenta del Conseyu de Comunidaes Asturianes, María Antonia Fernández Felgueroso, y les directores xenerales d’Emigración y Memoria Democrática, Begoña Serrano; d’Igualdá, Nuria Varela; d’Universidaes, Cristina González; de Mocedá, Diversidá Sexual y Derechos LGTBI, Clara Sierra; de Política y Planificación Sanitaries, Lidia Clara Rodríguez, y de Xestión de Derechos Sociales, Paula Álvarez.

Igualmente, formen parte del equipu los directores xenerales d’Innovación, Investigación y Tresformación Dixital, Iván Aitor Lucas; de Política Llingüística, Antón García; de Tresportes y Movilidá, José Manuel Caldevilla; de Cultura y Patrimoniu, Pablo León; de Vivienda, Fermín Bravo, y d’Enseñances Profesionales, Javier Cueli, mesmo que la xerente del ERA, Ana Suárez, y el responsable del área de Xestión del Conocimientu del Idepa, Rosendo Rojas.

El plan tien, ente otros, los oxetivos siguientes:


  • Favorecer el bienestar social d’estes persones que viven nel exterior, al traviés de programes d’ayuda económica en casu de situación d’emerxencia o desamparu, faciendo posible el so derechu a la salú y garantizando la so atención sanitaria n’estancies temporales n’Asturies, d’alcuerdu cola llexislación vixente.
  • La organización de actividaes de calter didáctico y divulgativo, cursos y programes presenciales o audiovisuales que faciliten el conocimientu de la llingua, cultura, historia, vezos, economía y, en definitiva, la identidá asturiana.
  • La promoción de programes y intercambios de tipu educativu, cultural y económicu empobinaos sobre manera a la xente mozo, mesmo que facilitar información sobre homologación de títulos y sofitu na realización n’Asturies de los estudios que tean cursando.
  • Alcuentros temporales n’Asturies.
  • L’establecimientu de canales d’información y sofitu a emigrantes y quien quiera emigrar
  • La constitución d’un foru virtual d’asturianos nel exterior
  • L’impulsu de los trabayos d’estudiu e investigación sobre la historia de la emigración asturiana.
  • La promoción d’una política integral pa facilitar el retornu de los asturianos nel exterior
  • L’asesoramientu y orientación de los derechos nel país o países nos que residieron como emigrantes y sobre les midíes y programes establecíos pa favorecer el retornu
  • El asesoramientu sobre’l derechu de votu fuera d’Asturies pa les elecciones

La directora xeneral d’Emigración y Memoria Democrática, Begoña Serrano, informó na pasada reunión de la comisión delegada del Conseyu de Comunidaes Asturianes sobre la creación d’esti grupu y del posterior treslláu al propiu Conseyu del borrador pa la so discusión y aportaciones. Esti mes va escomenzar una serie de sesiones de trabayu con diferentes centros asturianos, asociaciones y entidaes relacionaes cola emigración con esti fin.

Información sobre el documento

© Copyright 2006. Gobiernu del Principau d'Asturies