Gobiernu del Principau d'Asturies

Asturies, muncho más cerca

Tas en

Asturias.es Temes Mediu Ambiente El Principáu allarga la veda del oriciu de forma indefinida ...
 

Mediu Ambiente

El Principáu allarga la veda del oriciu de forma indefinida hasta que se constate la recuperación de la especie

La midida básase nos resultaos de los muestreos y nun informe de la Universidá d’Uviéu sobre la situación d’anguaño. Nes repoblaciones feches los últimos doce años soltáronse 135.720 ejemplares juveniles

26/09/2020

El Principáu decidió prorrogar la veda del oriciu de forma indefinida hasta que se constate la recuperación d'esta especie, tanto pa la pesca profesional como pa la recreativa. La resolución, que va publicase nunos díes nel Boletín Oficial del Principáu (Bopa), básase n'evidencies científiques sofitaes nos resultaos de los muestreos que se ficieron y nun estudiu de la Universidá d'Uviéu sobre l'estáu de les poblaciones anguaño.

La estracción d'equinodermos quedó vedada en 2016 y el Centru d'Esperimentación Pesquera (CEP) de Castropol diseñó entós un plan de repoblación y muestreos en distintos puntos de la marina asturiana pa conocer la evolución de la especie. Amás, el Principáu, en collaboración cola Universidá d'Uviéu, monitoriza l'asentamientu de los exemplares xuveniles y la situación nes zones repoblaes.

Coles mesmes, en virtú d'un conveniu cola institución académica, dende'l departamentu de Bioloxía d'Organismos y Sistemes ellaboróse'l documentu Estudiu y monitorización del estáu de les poblaciones d'oriciu nel Principáu, que constata que les densidaes y les distribuciones de talla siguen enllancaes y nun dexen inda la esplotación d'esti recursu, anque sí se notó ciertu ameyoramientu en delles poblaciones.

L'informe plantega que les claves de la mengua na especie anicien nos efectos que per separtáu tienen los factores ambientales y l'estracción, según les interacciones ente ellos. Asina, a la esplotación del recursu suman los cambeos producíos na marina asturiana nos últimos años, particularmente los de les comunidaes de microalgues, que constitúin la base de l'alimentación de los oricios.

Finalmente, encamiéntase estender la prohibición de captura, caltener la monitorización de les poblaciones ya impulsar la concienciación y la vixilancia costera. Estes son precisamente les midíes que ta llevando a cabu la Dirección Xeneral de Pesca Marítima, xuntu coles repoblaciones.



Acciones de recuperación

Les primeres acciones pa la recuperación del oriciu remóntense a 2009, cuando s'empecipia la reintroducción d'exemplares per aciu de repoblación. Dende entós, triplicóse’l númberu d'exemplares soltaos añalmente, al pasar de los 5.700 de 2009 a los 19.000 d'anguaño. En total, reintroduciéronse 135.720 xuveniles nos conceyos de Castropol, Tapia de Casariego, Valdés y Cuideiru, toos procedentes del criadoriu del CEP de Castropol.

Nel marcu del plan desenvueltu pol CEP, ente ochobre y payares de 2016 efectuóse una muestra pilotu en trés pedreros d’Andés (Navia), Capiecho (Gozón) y Val.louta (Cuideiru), coles mires d'establecer una metodoloxía que dexara analizar la evolución de la población. A esta iniciativa sumóse, un añu más tarde, l'estudiu sobre l'estáu de les poblaciones en doce pedreros, nos que dende entós se practiquen dos muestreos añales, ún en primavera y otru na seronda.


Icono gráfico alusivo al tipo de archivo Audiu (Audiu: 504 Kb) (n'español)

Información sobre el documento

© Copyright 2006. Gobiernu del Principau d'Asturies