Gobiernu del Principau d'Asturies

Asturies, muncho más cerca

Tas en

Asturias.es El Principáu entrega dos pisos d’inclusión social en Llugones a ...
 

Aniciu

El Principáu entrega dos pisos d’inclusión social en Llugones a dos homes que lleven más de 20 años viviendo na cai

- El programa Housing first yá punxo a disposición 26 cases n’Uviéu, Xixón, Avilés y El Franco

13/08/2019

El Gobiernu d’Asturies dio güei en Llugones dos viviendes nueves d’inclusión social dientro del programa Housing first, col que se ponen pisos a disposición de persones ensin casa. La conseyera de Derechos Sociales y Bienestar, Melania Álvarez, dio les llaves d’estes cases públiques d’arriendu a dos homes que llevaben más de 20 años viviendo na cai na zona central del Principáu.

Nel actu, que cuntó tamién cola presencia del director xeneral de Vivienda, Fermín Bravo, y la xerente de Vipasa, María Montes, recordóse que son yá 26 los pisos habilitaos n’Uviéu, Xixón, Avilés, El Franco y agora tamién en Siero. Amás, hai otres cinco cases dispuestes pa entregar en Xixón.

Esti modelu busca facilitar l’autonomía de les persones escoyíes p’acceder a les viviendes públiques, que soscriben un contratu d’arriendu colos mesmos derechos y obligaciones que los renteros habituales. La peculiaridá del programa ye que busca l’atención a les persones ensin casa y convierte la vivienda nun elementu prioritariu nel so camín escontra una vida normalizada. Pa eso, cunten col sofitu d’un equipu técnicu encargáu de promover meyores na so situación personal y social.

Esti proyectu desenvuélvese en collaboración colos conceyos, que contraten a les entidaes encargaes del programa d’acompañamientu y siguimientu a les persones beneficiaries.

La iniciativa d’El Franco, que ye la primera del programa Housing First na zona rural, foi premiada nel II Concursu de Bones Práctiques en Materia de Vivienda promovíu pola Conseyería de Derechos Sociales y Bienestar.

Amás, el modelu asturianu de Housing first escoyóse pol Observatoriu Européu de la Vivienda como una de les bones práctiques que se tán desenvolviendo anguaño nel continente pa favorecer que la vivienda se convierta nun preséu d’inclusión social. Asina lo recueye un informe ellaboráu por esti organismu, dependiente del Housing Europe, onde s’analiza la implantación del proyectu y destácase la iniciativa asturiana xunto a les de países como Finlandia, Irlanda, Bélxica y Austria. El trabayu enmárcase nuna partida d’informes d’investigación sobre les formes nes que los provisores de vivienda pública encaren los desafíos sociales n’Europa.

Housing Europe ye la Federación Europea de Vivienda Pública, Cooperativa y Social, qu’axunta 45 federaciones nacionales y rexonales, incluyida l’Asociación Española de Xestores Públicos de Vivienda y Suelu (AVS), de la que forma parte la empresa pública Vipasa. Componen esta rede 43.000 empreses del sector de 24 países, qu’alministren más de 26 millones de viviendes, aproximao’l 11 % de les qu’existen en tol continente.

 

Información sobre el documento

© Copyright 2006. Gobiernu del Principau d'Asturies