Gobiernu del Principau d'Asturies

Asturies, muncho más cerca

Tas en

Asturias.es Temes Economía y finances El Principáu destina casi cuatro millones a la convocatoria ...
 

Economía y finances

El Principáu destina casi cuatro millones a la convocatoria d'ayudes para oenexés con cargu al caxellu solidariu del Impuestu sobre la Renta de les Persones Físiques

Les entidaes interesaes pueden presentar la documentación riquida p’acoyese a estes subvenciones dende güei y hasta el 6 d'agostu. Con esta partida van financiase inanciaránse proyectos de sofitu a la infancia, families, mocedá, colectivos de mayores y persones con discapacidá o en situación de vulnerabilidá

24/07/2019

Les organizaciones non gubernamentales d'iniciativa social pueden presentar dende güei la documentación necesaria pa beneficiase de la convocatoria añal de subvenciones que'l Gobiernu d'Asturies destina a estes asociaciones con cargu al 0,7% del Impuestu sobre la Renta de les Persones Físiques (IRPF). Esta llinia de subvenciones, publicada ayeri pol Boletín Oficial del Principáu (Bopa), cuenta con una partida inicial de 3.999.494 euros.

El plazu de presentación de les solicitúes ye de diez díes hábiles, polo que les entidaes interesaesa disponen dende güei, miércoles, y hasta el 6 d'agostu, dambos incluyíos, pa tramitar la documentación.

Estes ayudes, que se financien coles aportaciones de los contribuyentes que marquen el caxellu de fines sociales -la x solidaria- na so declaración de la renta, van dirixíes a oenexés que desenvuelven programes de sofitu a la infancia, families, mocedá, colectivos de mayores, persones con discapacidá o en situación de vulnerabilidá y riesgu d'esclusión social. En concretu, la convocatoria subvenciona midíes d'atención integral, respaldu educativu o asistencia pal insertamientu llaboral.

Pa la valoración de los proyectos van tenese en cuenta, ente otros, aspectos como'l grau d'implantación de les entidaes n'Asturies, la so capacidá de xestión y la realización d'auditoríes esternes. Tocantes a les iniciatives plantegaes, va analizase l'aportación de fondos d'otros entes públicos y priváos, mesmo que l'adecuación de los recursos humanos a los planes que les organizaciones pretenden impulsar.



Un total de 320 proyectos financiaos en 2018

La convocatoria de 2018 cuntó con un presupuestu de 3.998.456 euros, colos que se financiaron 320 proyectos de 107 entidaes, qu'anguaño se tán desenvolviendo.

Dende 2017, les autonomíes xestionen el 80% de los fondos de la x solidaria -qu'antes alministraba puramente l'Estáu- en cumplimientu d'una sentencia del Tribunal Constitucional qu'envaloró parcialmente la inconstitucionalidá del modelu anterior.

Según la distribución alcordada ente l'Executivu central y les comunidaes, el Principáu repartió l'añu pasáu un 15,81% (545.855 euros) más qu'en 2017. Pa esti exerciciu, la convocatoria realízase con un importe asemeyáu al de 2018, que va poder ser ampliáu nos próximos meses, en función de l'actualización de la financiación per parte del Estáu, nel marcu de la distribución añal qu'alcuerden el Gobiernu central y les comunidaes.

 

Información sobre el documento

© Copyright 2006. Gobiernu del Principau d'Asturies