Gobiernu del Principau d'Asturies

Asturies, muncho más cerca

Tas en

Asturias.es Temes Europa Fondos Estructurales y d’Inversión Europeos El Principáu va impulsar la creación de diez consorcios ...
 

Fondos Estructurales y d’Inversión Europeos

El Principáu va impulsar la creación de diez consorcios científicos con empreses pa competir por fondos europeos

La Conseyería de Ciencia, Innovación y Universidá va promover que dos institutos d'investigación s’acrediten como centros d'excelencia nacionales. El presupuestu pa 2020 aumenta l'aportación a la Universidá d'Uviéu y moviliza ayudes pa la formación de más de 150 científicos. Les cuentes inclúin 9,5 millones pa sofitar la I+D+i empresarial y la creación d'empreses de base tecnolóxica. El Gobiernu d'Asturies va poner en marcha dos proyectos pilotu pa 5G p’ menorgar la fienda dixital na zona rural

Reunión en la Junta General del Principado

17/12/2019

La creación de consorcios pa captar fondos europeos, l’acreditación de centros d'investigación d’excelencia nel ámbitu nacional y la movilización de recursos pa cuntar con más personal científicu son dalgunes de les llinies estratéxiques sobre les que se sofita'l proyectu de presupuestos de la Conseyería de Ciencia, Innovación y Universidá pal 2020. Amás, inclúi programes pa impulsar la innovación empresarial y la creación de spin off, mesmo qu’un aumentu de la financiación de la institución académica asturiana.

El conseyeru, Borja Sánchez, espunxo güei na Xunta Xeneral les principales cifres de les cuentes del so departamentu, que xuben a 185.388.227 euros y coles que se pretende cuntar con un sistema d'investigación ya innovación fuerte y competitivu nel ámbitu nacional y européu, capaz de captar y xenerar talentu. Unu de los oxetivos ye que'l personal que se forme nesti ámbitu n'Asturies pueda escoyer ente siguir la so carrera investigadora nun centru, incorporase a la I+D+i empresarial o optar por crear una spin off o empresa de base tecnolóxica. “La nuestra acción de gobiernu tien como base favorecer les sinerxes ente la investigación ya innovación y la empresa. Pa eso tenemos qu'actuar con una visión global”, resumió'l conseyeru na so intervención.



Dos grandes misiones científiques

La sostenibilidá y amenorgamientu de les emisiones contaminantes y l'avieyamientu saludable son les pilastres sobre les que se van construyir les dos misiones científiques d'Asturies de cara a 2030. La Conseyería de Ciencia destina 400.000 euros a financiar la creación d'una decena de grupos público-privaos d'investigadores y empreses, y la prepación d'estudios y pruebes pilotu de proyectos que van intentar captar fondos europeos.



Apueste pola escelencia investigadora

Una de les novedaes qu'ufierta'l presupuestu ye la reserva, per primer vegada, d'una partida de 300.000 euros p'ayudar a qu'institutos universitarios o organismos d'investigación opten a acreditase como centros o unidaes d'excelencia Severo Ochoa y María de Maeztu, un distintivu nacional qu'abre les puertes a captar importantes fondos p'Asturies (cuatro millones nel primer casu y dos millones nel segundu pa cuatro años).

Nel so apueste pola ciencia d'escelencia, inclúyense 400.000 euros pa la Fundación pa la Investigación y l'Innovación Biosanitaria d'Asturies (FINBA); 550.000 euros pa la investigación de vanguardia que realiza'l IUOPA; y 120.000 euros, el doble qu'en 2019, pa la tresformación de la Unidá Mista d'Investigación en Biodiversidá (UMIB) n'Institutu mistu del CSIC y Universidá d'Uviéu.



La Universidá, con menos costu pa les families

El proyectu de presupuestos reflexa, amás, “una apuesta inequívoca del nuesu Gobiernu pola Universidá d'Uviéu”, asegura'l conseyeru. La Dirección Xeneral d'Universidá cunta con 149.268.217 euros, lo que supón el 80,52% del total de la conseyería y un 6,16% más respectu al creitu inicial de 2019. La Universidá d'Uviéu recibe 143 millones, a los que se suma la financiación procedente de determinaos programes d'investigación.

El Gobiernu d'Asturies destina a la Universidá 5 millones pa compensar la rebaxa del 25% nes matrícules de grau y máster oficial. El presupuestu cumple íntegramente el conveniu suscritu cola institución académica, con un aumentu de 3,6 millones na aportación ordinaria; y consolida partíes bien importantes como 1,6 millones pal plan d'inversiones; 1,1 millones pa programes de sofitu al alumnáu; o dos millones (500.000 euros más qu'en 2019), p'actuaciones de meyora de la calidá de la Universidá.



Ayudes pa movilizar a más de 150 investigadores

La conseyería pretende movilizar cerca de 4,3 millones en programes venceyaos a la formación ya incorporación de personal científicu de los que s'envalora que podríen beneficiase más de 150 investigadores dientro de la Universidá d'Uviéu, centros del CSIC, centros tecnolóxicos y empreses. Pa ello, van potenciase convocatories esistentes y van abrise nuevos programes colos siguientes oxetivos:

— Aumentar el númberu d'ayudes predoctorales Severo Ochoa.

— Reforzar programes como'l Clarín pa financiar la investigación nel estranxeru.

— Potenciar les ayudes Xovellanos pa movilidá de titulaos na empresa.

— Impulsar los doctoraos industriales, pa incentivar que los doctores s’incorporen a centros empresariales.

— Complementar les ayudes a los beneficiarios de programes nacionales como Ramón y Cajal y Miguel Servet.

— Poner en marcha'l programa Margarita Salas: una nueva convocatoria destinada a captar a investigadores con una trayectoria brillosa, qu'aspira a cuntar con unos diez contratos.



Impulsu a la I+D+i empresarial y les spin off

El Serviciu d'I+D+i cuenta con 26,4 millones, un 14,29% del total del presupuestu, venceyaos en gran midida a actuaciones del Plan de Ciencia, Tecnoloxía ya Innovación (PCTI). El proyectu inclúi 9,5 millones pa incentivar la I+D+i empresarial y la creación d'empreses de base tecnolóxica (EIBTS).

Tamién s'incorpora nel capítulu d'inversiones una partida de 300.000 euros destinada a la Compra Pública d'Innovación, que tien como oxetivos n la meyora de los servicios públicos por aciu la incorporación de bienes o servicios innovadores.



Desenvolvimientu tecnolóxicu na zona rural

Una de les actuaciones más importantes en materia de telecomunicaciones ye la puesta en marcha de dos proyectos pilotu d'implantación de la tecnoloxía 5G na zona rural, pa los que se van dedicar 250.000 euros. Ye una iniciativa estratéxica que pretende contribuyir a afitar población nes zones más despoblaes del nuestru territoriu (sobremanera, los estremos). Coles mesmes, l'amenorgamientu de la fienda dixital va afrontase con 1,3 millones pa entidaes locales de menos de 20.000 habitantes, coles mires de potenciar micro innovaciones y contribuyir a frenar el despoblamientu.

   Icono gráfico alusivo al tipo de archivo Intervención del Ilmo. Sr. Consejero de Ciencia, Innovación y Universidad (Pdf: 163 Kb) (n'español)

   Icono gráfico alusivo al tipo de archivo Audiu (Audiu: 2 Mb) (n'español)
   Icono gráfico alusivo al tipo de archivo Audiu 2 (Audiu: 2 Mb) (n'español)

Información sobre el documento

© Copyright 2006. Gobiernu del Principau d'Asturies