Gobiernu del Principau d'Asturies

Asturies, muncho más cerca

Tas en

Asturias.es Mocedá Más de 400 estudiantes van participar mañana nel HUCA nuna de ...
 

Mocedá

Más de 400 estudiantes van participar mañana nel HUCA nuna de les actividaes qu’ organiza la Fundación Princesa d’Asturies

Alumnáu de Primaria de 41 centros educativos y de les aules hospitalaries trabayaron nes sos clases na iniciativa FascinARTE en el Prado

14/10/2019

Más de 400 alumnos de Primaria de 41 centros educativos y de les aules hospitalaries van participar mañana nel Hospital Universitariu Central d'Asturies (HUCA) n'una de les iniciatives qu'entama la Fundación Princesa d'Asturies na selmana d'entrega de los sos premios añales.

Per primer vegada, l’ HUCA abre les sos puertes a estos galardones y l'aula hospitalaria va acoyer l'actividá FascinARTE en el Prado, que forma parte del programa cultural Toma la palabra, dirixíu a alumnáu de Primaria, Educación Secundaria Obligatoria (ESO), Bachilleratu y Formación Profesional, p’averar a la comunidá educativa les trayectories y los méritos de les persones ya instituciones galardonaes colos Premios Princesa d'Asturies.

Los estudiantes trabayaron nesta iniciativa nes sos clases y reinterpretaron delles obres del Muséu del Prau, galardonáu col Premiu Princesa d'Asturies de Comunicación y Humanidaes 2019 pol so llabor de caltenimientu y divulgación del patrimoniu artísticu.

La coordinadora xeneral d'Educación de la pinacoteca, Ana Moreno, va repasar mañana la historia de la pintura al traviés de diez cuadros emblemáticos y va esplicar tamién el trabayu que realizó l'alumnáu. Una selección de les sos creaciones va esponese na entrada del edificiu d'hospitalización del HUCA hasta'l domingu 20 d'ochobre.

Mientres l'actu, nel que van participar el conseyeru de Salú, Pablo Fernández Muñiz, y la directora xeneral d'Ordenación, Evaluación y Equidá Educativa, Paula García, va apurrise a cada centru educativu un catálogu de les obres realizaes polos estudiantes.

Con esti actu, l’HUCA repite'l so compromisu cola humanización de l'asistencia sanitaria al traviés de la cultura, l'arte y l'educación.

Información sobre el documento

© Copyright 2006. Gobiernu del Principau d'Asturies