Gobiernu del Principau d'Asturies

Asturies, muncho más cerca

Tas en

Asturias.es Temes Economía y finances Presupuestos y Cuentes El Principáu destina más de 72 millones a carreteres nel 2020, ...
 

Presupuestos y Cuentes

El Principáu destina más de 72 millones a carreteres nel 2020, un 11 % más qu’anguaño

El vicepresidente y conseyeru d’Infraestructures asegura qu’esti aumentu supón un “puntu d’inflexón” p’ameyorar la rede autonómica. Cofiño destaca l’esfuerciu del Executivu por equilibrar el gastu social y la capacidá inversora nel proyectu de presupuestos

06/12/2019

El Proyectu de Llei de Presupuestos Xenerales del Principáu pal 2020 destina más de 72 millones a carreteres, lo que supón un aumentu del 11 % al respective d’anguaño. El vicepresidente del Gobiernu d’Asturies y conseyeru d’Infraestructures, Mediu Ambiente y Cambéu Climáticu, Juan Cofiño, destacó qu’esta xubida supón un “puntu d’inflexón pa la recuperación, añu a añu, de la tasa de reposición de la rede viaria, que, como vinimos anunciando, yá empieza nestos presupuestos”.

Cofiño esplicó que “rescampla que nun se pue revertir nun añu lo que se perdió en más d’una década, por razones básicamente achacables a la crisis económica”, pero aseguró que l’Executivu asturianu “consiguió empezar la recuperación de la inversión, que se va ver reflexada, ensin dulda, en tolos exercicios económicos d’esta llexislatura pa tener una rede autonómica en condiciones d’usu amañoses”. El conseyeru indicó que la crisis económica del 2007 y 2008 afectó al caltenimientu de la rede de carreteres del conxuntu del país “porque la inversión tuvo per debaxo de lo razonable y esixible y, de resultes, los viales presenten un nivel de deterioru relevante en toa España”.

El proyectu de presupuestos pal añu que vien establez una partida global pa la Conseyería d’Infraestructures de cuasi 200 millones, lo que representa “una medría notable del 15 %, mentes que los capítulos inversores tienen tamién una xubida razonable”, esplicó. Según destacó, “realicemos un esfuerciu importante pa presentar un presupuesto bien permediáu en gastu y inversión”.

En materia de tresportes, incorporóse al presupuestu la partida necesaria p’anovar los equipos tecnolóxicos y d’información al usuariu de cara a la futura implantación del billete únicu nuevu, la ufierta nueva a los usuarios de tola rexón, que “ye perdemandada y va dar munchos frutos nel futuru”, añedió.

Polo que se refier al saniamientu y suministru d’agua, calificó de “mui relevante” la cantidá asignada de 28 millones, xunto a otros 70 empobinaos a la Xunta de Saniamientu.

Cofiño esplicó que l’Executivu autonómicu “realizó un trabayu importante d’equilibriu” na ellaboración del proyectu económicu, que xube a 4.757 millones, cifra que representa una medría del 5,1 %. “Conxuguemos la necesidá de siguir incidiendo nel gastu social, en Sanidá y Educación, que son el soporte básicu de la sociedá del bienestar, cola capacidá inversora, pa lo que s’optimizaron tolos recursos disponibles”, apuntó .

Al respective de la tramitación parllamentaria del proyectu, señaló que’l principiu d’alcuerdu algamáu con Izquierda Xunida “ufierta al Gobiernu una fortaleza dende’l puntu de vista d’arrope parllamentariu”. Apeló tamién a la responsabilidá de les demás fuercies polítiques de la Xunta Xeneral pa que sofiten les cuentes rexonales porque “ye l’únicu presupuestu posible nestos momentos”. Y añedió: “Realicemos un gran esfuerciu por buscar los dos grandes equilibrios que formen parte de cualquier propuesta presupuestaria, gastu corriente y gastu inversor, y espero que tenga ecu ente los grupos parllamentarios pa qu’Asturies disponga de presupuestu en tiempu y forma, quier dicise, primero de qu’acabe l’añu”.

Información sobre el documento

© Copyright 2006. Gobiernu del Principau d'Asturies