Gobiernu del Principau d'Asturies

Asturies, muncho más cerca

Tas en

Asturias.es Vivir n'Asturies Act. culturales Cultura ultima un alcuerdu cola Comunidá de Madrid pa ufiertar ...
 

Act. culturales

Cultura ultima un alcuerdu cola Comunidá de Madrid pa ufiertar un espaciu espositivu na capital a los artistes asturianos

El conveniu permitirá promover muestres de creadores del Principáu na Sala d'Arte Mozu y acoyer obra d'artistes madrilanos n'equipamientos culturales d'Uviéu, Xixón y Avilés. La Viceconseyería de Cultura y Deporte axunta nuna comisión de coordinación de los equipamientos artísticos del Principáu a los directores del Muséu de Belles Artes, Llaboral Centru d'Arte, Centru Niemeyer, Muséu Barjola y Sala Borrón

De izqda. a dcha.: Alfonso Palaciu Muséu Belles Artes d'Asturies, Lucía García Llaboral Centru d'Arte, María José Baragaño Sala Borrón, Lydia Santamarina Muséu Barjola y Carlos Cuadros Centro Niemeyer

17/02/2016

La Conseyería d'Educación y Cultura prepara un alcuerdu de collaboración cola Comunidá de Madrid que va abrir una puerta a los artistes asturianos mozos. El conveniu va dexar a los ceadores del Principáu llevar la so obra a la Sala d'Arte Mozu de la Comunidá de Madrid, un espaciu espositivu allugáu nel centru de la capital. Otramiente, Asturies va acoyer muestres de ceadores de la comunidá mentada n'equipamientos culturales como Llaboral Centru d'Arte y Creación Industrial o la Sala Borrón.

La collaboración ente Asturies y Madrid enmárcase nel oxetivu d'impulsar les artes visuales y facilitar espacios que permitan l'intercambiu d'esposiciones y promuevan, amás, la visibilidá de los artistes asturianos fora de les fronteres rexonales. Con esti alcuerdu, los ceadores del Principáu d'Asturies van poder optar a esponer nuna moderna sala, estructurada en trés plantes y allugada na Avenida d'América, n'una de les exes principales del centru de Madrid, que programa les últimes propuestes y creaciones contemporanees, con especial atención a la promoción de artistes mozos.

L'alcuerdu va permitirr, al empar, averar al públicu asturianu la obra de ceadores madrilanos. Nesti sentíu, Llaboral Centru d'Arte y Creación Industrial y Sala Borrón negocien yá una muestra itinerante que va recalar n'Asturies nos próximos meses, en sellando l'alcuerdu de collaboración institucional ente dambes comunidaes.

L'apertura d'esta nueva llinia de collaboración foi ún de los puntos trataos na xunta constitutiva de la Comisión de coordinación de los equipamientos artísticos del Principáu d'Asturies, dependiente de la Viceconseyería de Cultura y Deporte, y de la que formen parte los directores o responsables de los principales centros artísticos de la comunidá. El viceconseyeru, Vicente Domínguez, tuvo acompañáu pol director del Muséu de Belles Artes d'Asturies, Alfonso Palacio; la directora xerente de Llaboral Centru d'Arte y Creación Industrial, Lucía García Rodríguez; el director xerente del Centru Niemeyer, Carlos Cuadros; la directora del Muséu Barjola, Lydia Santamarina, y la responsable de programes culturales del Institutu Asturianu de la Mocedá, María José Baragaño, de quien depende la sala Borrón.

La creación d'esta comisión, que se va axuntar con una periodicidá mensual y de forma rotatoria en cada ún de los centros, respuende al interés del Gobiernu d'Asturies de favorecer la relación ente los grandes equipamientos culturales y abordar proyectos, coordinaos ente sigo y con instituciones artístiques y comunidaes autónomes, de los que se pueda beneficiar tola rexón.

Información sobre el documento

© Copyright 2006. Gobiernu del Principau d'Asturies