Gobiernu del Principau d'Asturies

Asturies, muncho más cerca

Tas en

Asturias.es Temes Europa El Principáu empecipia un programa estensu d'actividaes por ...
 

Europa

El Principáu empecipia un programa estensu d'actividaes por cuenta de la so reconocencia como Rexón Entamadora Europea 2019

El conseyeru d'Empléu presentó l'axenda nun actu al qu'asistieron les entidaes que sofitaron la candidatura énte la UE y los once profesionales que van actuar como embaxadores. Asturies va acoyer l'alcuentru anual del Parllamentu Rural Européu en payares deI añu próximu

18/12/2018

El Gobiernu del Principáu punxo en marcha un programa estensu d'actividaes con cuenta de la reconocencia d'Asturies como Rexón Entamadora 2019 por parte del Comité de les Rexones. L'alcuentru anual del Parllamentu Rural Européu, que va celebrase en payares del añu próximu nel Principáu, ye unu de los principales eventos qu'avanzó güei’l conseyeru d'Empléu, Industria y Turismu, Isaac Pola, nun actu al qu'asistieron los colectivos que sofitaron la candidatura énte la Unión Europea y les personalidaes de distintos ámbitos que van actuar como embaxadores d'Asturies como Rexón Entamadora.

El Principáu creó yá la páxina web www.asturiasregionemprendedoraeuropea.com, na que va informase de toes estes actividaes. Nella consten los once embaxadores que representen los valores de l'Asturies innovadora y entamadora: la científica y presidenta del Conseyu Superior d'Investigaciones Científiques (CSIC), Rosa Menéndez López; la bioquímica y presidenta-cofundadora d’IMFAHE Foundation, Zafira Castaño-Corsino; la presidenta de Campoastur, Cruz Fernández Rodríguez; la conseyera delegada de Hijos de Luis Rodríguez (Masymas), Eva Rodríguez Alonso; l'investigador del Institutu Tecnolóxicu de los Materiales (ITMA) Amador Menéndez Velázquez; el director rexonal de Desenvolvimientu de Negociu de Phoenix Contact E-mobility, Adriano Mones; los cofundadores de Dropsens, David Hernández Santos y Pablo Fanjul Bolado; el xefe de gabinete del presidente del Parllamentu Européu, Diego Canga Fano; el director del Festival Intercélticu de Lorient, Lisardo Lombardía Yenes, y el director artísticu y de casting, Luis San Narciso Aguinaco.

Amás, la web amuesa les 19 entidaes que sofitaron la candidatura del Principáu: Fade, Aceppa, la Universidá d'Uviéu, l'Institutu Asturianu de la Muyer y Polítiques de Mocedá, la Federación Asturiana de Conceyos, les cámares de comerciu; centros tecnolóxicos como l'Institutu de los Materiales (Itma), el de Diseñu y la Producción Industriales (Prodintec) y el de la Información y la Comunicación (CTIC); l'Asociación d'Industries Cárniques (Asincar), el Consorciu Tecnolóxicu de la Enerxía (Ainer), el Clúster Industrial del Metal (MetaIndustry 4.0), los grupos de desenvolvimientu rural del programa Reader, la Fundación pal Fomentu de la Economía Social, l'Asociación Compromiso Asturies XXI y la Radio Televisión del Principáu d'Asturies (RTPA).



Actividaes principales

Una de les actividaes previstes más destacaes va ser l'alcuentru anual del Parllamentu Rural Européu, que defende los intereses de los habitantes d'estes zones, que se va celebrar n'Asturies a propuesta de la Rede de Desenvolvimientu Rural Reader. El Principáu tamién va participar nel Programa Erasmus pa Xóvenes Entamadores, promovíu pola Dirección Xeneral de Mercáu Interior, Industria y Navegación de la Comisión Europea, que dexa a entamadores noveles realizar intercambios transnacionales pa que conozan pequeñes empreses n'otros países.

L'axenda tamién incluye una visita del Centru Nacional de Recursos pa la Ellaboración Artesanal d'Alimentos de Suecia (Eldrimner) pa intercambiar esperiencies y la celebración d'una xornada sobre innovación de la Fundación de Fomentu de la Economía Social.

La candidatura presentada pol Principáu énte la UE basóse nes trés pegollos de la estratexa d’entamamientu: “la innovación, la inclusión social y la sostenibilidá, que dexen llograr una visión d'una rexón qu'apuesta por un desenvolvimientu equilibráu”. Xunto a ella, presentáronse dos exemplos de bones práctiques: el Programa Innovación Abierta 4.0, que favorez l'aceleración y tracción al mercáu d’empreses emerxentes nueves gracies al trabayu desenvueltu de forma conxunta con grandes firmes consolidaes, y el Programa de Cultura Entamadora de Valnalón, que fomenta l'espíritu entamador nos distintos niveles educativos.

Nel actu d'esta mañana tamién participó la directora xeneral d'Innovación y Emprendimientu, Ana Concejo; la directora del Centru Européu d'Empreses y Innovación, Cristina Fanjul, y la xerente de Valnalón, Marta Pérez.

 

   Icono gráfico alusivo al tipo de archivo Audiu (Audiu: 1 Mb) (n'español)

Información sobre el documento

© Copyright 2006. Gobiernu del Principau d'Asturies