Gobiernu del Principau d'Asturies

Asturies, muncho más cerca

Tas en

Asturias.es Temes Deportes El Gobiernu d'Asturies y la Diputación de Llión desbloquien les ...
 

Deportes

El Gobiernu d'Asturies y la Diputación de Llión desbloquien les negociaciones pa una xestión conxunta de les sos estaciones d'esquí

Dambes alministraciones comprométense a poner en marcha grupos de trabayu qu'estudien la collaboración pa promover y esplotar les cuatro instalaciones ivernales

22/10/2019

El Gobiernu d'Asturies, al traviés de la Conseyería de Cultura, Política Llingüística y Turismu, y la Diputación de Llión afitaron un puntu de partida sólidu pa empecipiar les negociaciones que puedan llevar a una xestión conxunta de les cuatro estaciones d'iviernu que dependen de dambes alministraciones.

Nel marcu de les conversaciones previes a la renovación del conveniu de promoción de les instalaciones asturianes de Fontes d'Iviernu y Valgrande-Payares, y les llioneses de San Isidro y Valle-L.laciana L.leitariegos, la directora xeneral de Deporte, Beatriz Álvarez Mesa, y el diputáu provincial de Turismu llionés, Nicanor Sen, comprometiéronse a crear grupos de trabayu técnicu y xurídicu que faciliten la negociación, asina como a ellaborar un cronograma pal procesu. La meyora nes conversaciones produzse tres una primer toma de contactu recién.

La actualización inminente del conveniu ente'l Gobiernu d'Asturies y la Diputación de Llión pal fortalecimientu y la promoción conxunta de les sos estaciones d'esquí considérase'l marcu afayadizu pa empecipiar un diálogu que respuenda a los intereses comunes de dambes alministraciones al respective de les sos instalaciones ivernales.

Nel marcu del conveniu de collaboración mentáu comercialícense dende va yá delles temporaes los forfaits Diario Interestaciones p'abonos anuales y el Cuatro días/Cuatro estaciones. Tanto'l Principáu como la Diputación llionesa valoren que la rellación ente les cuatro estaciones y el trabayu conxuntu dean continuidá a la cooperación, tanto nel aspectu técnicu y de control, como nel d'organización y intercambiu d'esperiencies.

Información sobre el documento

© Copyright 2006. Gobiernu del Principau d'Asturies