Gobiernu del Principau d'Asturies

Asturies, muncho más cerca

Tas en

Asturias.es La Rede Natural d'Asturies celebra'l Día Mundial del Mediu ...
 

Aniciu

La Rede Natural d'Asturies celebra'l Día Mundial del Mediu Ambiente col plantíu d'árboles nos centros d'interpretación

Tamién se va agasayar con arboretos a les persones que visiten estos equipamientos na fin de selmana. Los espacios protexíos recibieron a más d'un millón de turistes en 2019

05/06/2020

La Rede Natural d'Asturies, que engloba tolos espacios que cunten con protección autonómica, conmemora'l Día Mundial del Mediu Ambiente, que se celebra güei, con un plantíu d'árboles simultánea nos centros d'interpretación, información y de visitantes que permanecen abiertos.

Les actividaes entamaes por cuenta de esta efeméride van enllargase na fin de selmana, col agasayu d’arboretos a les persones que visiten estos equipamientos.

L'actu principal de la xornada tuvo llugar nel cabu Peñes, qu'anguaño cumple 25 años de la so declaración como primer paisaxe protexíu d'Asturies. Trátase r d'una singular unidá que s'estiende por una estrecha franxa del conceyu de Gozón ya inclúi árees de cantil, rasa costera, arenales y estuarios. Tamién alluga hábitats únicos nel Principáu, como formaciones dunares o carbes costeres, con enclaves como l'arenal de Xagó, l'ancón de Bañugues o'l castru de La Erbosa, el de mayor tamañu de mariña asturiana tres el de la Isla de Deva.

El conseyeru de Desenvolvimientu Rural, Agroganadería y Pesca, Alejandro Calvo, participó nel actu col plantíu d'un árbol nesti espaciu protexíu, xunta los directores xenerales del Mediu Natural, David Villar, y de Pesca Marítima, Francisco González, y l'alcalde de Gozón, Jorge Suárez.

Calvo recordó la importancia de los espacios naturales protexíos n'Asturies, qu'ocupen cerca del 40% del territoriu y formen un treme d'ecosistemes heteroxéneos qu'apurren biodiversidá, paisaxe y recursos naturales.

La Rede Natural, que recibió 1.057.000 visitantes en 2019, axunta una amplia variedá d'ecosistemes con estraordinaria biodiversidá y constitúi unu de los principales valores pa la comunidá. Estes zones aproven d'importantes servicios ecosistémicos, al ser fonte d'agua potable, materies primes y recursos xenéticos, amás de permitir l'actividá agroganadera y forestal.



Sensibilizar sobre la biodiversidá

Dende 1973,el Día Mundial del Mediu Ambiente celébrase'l 5 de xunu, fecha escoyida pola Organización de les Naciones Xuníes (ONU) pa sensibilizar a la población mundial. La tema principal d'esti añu ye la biodiversidá, aspectu qu'adquier entá más fuerza cola actual pandemia.

La ONU recuerda que l'apaición de la COVID-19 pon n'evidencia que l'alteración de la biodiversidá destrúi'l sistema que sofita la vida humana. Cuanto más variáu ye un ecosistema, más difícil resulta qu'un patóxenu s’arrobíne rápido, lo que supón que la perda de biodiversidá facilita la so circulación ente animales y persones.

Información sobre el documento

© Copyright 2006. Gobiernu del Principau d'Asturies