Gobiernu del Principau d'Asturies

Asturies, muncho más cerca

Tas en

Asturias.es L’HUCA yá aplicó la nueva técnica de radioterapia ...
 

Aniciu

L’HUCA yá aplicó la nueva técnica de radioterapia intraoperatoria a 24 pacientes con cáncer de mama no que va d’añu

El tratamientu, indicáu pa quien carez tumores de baxa intensidá, permite combinar n'una sola sesión la ciruxía y la radioterapia. Les autoridaes sanitaries recuerden la importancia de participar nos programes de detección precoz énte la celebración del día internacional de la enfermedá

18/10/2020

El Serviciu de Salú del Principáu d'Asturies (Sespa) empecipió anguaño'l tratamientu del cáncer de mama con radioterapia ntraoperatoria, que permite aplicar n'una sola sesión ciruxía y radioterapia. Hasta ochobre, 24 persones con esti tipu de tumor fueron atendíes con esta técnica nel Hospital Universitariu Central d'Uviéu (HUCA). Énte la celebración, mañana, del Día Internacional del Cáncer de Mama, les autoridaes sanitaries recuerden la importancia de participar nos programes de detección precoz pa diagnosticar la enfermedá en fases tempranes y favorecer la eficacia de los tratamientos.

Les meyores terapéutiques y tecnolóxiques contra'l cáncer de mama fueron constantes nos últimos años. L’ HUCA cuenta con un dispositivu portátil donáu pola Fundación Amancio Ortega que puede ser treslladáu al quirófanu onde se realiza la extirpación del tumor pa, al momentu, alministrar la radioterapia na zona afayadiza. Aplícase nuna sola sesión que dura de 17 a 25 minutos. Les pacientes indicaes son les que tienen tumores de mama de baxa agresividá, aproximao'l 15% de les que reciben radioterapia oncolóxica.

Esta técnica trai otros beneficios colaterales. Per un sitiu, supón un aliciente profesional, yá que rique un trabayu multidisciplinar nel qu'han d'intervenir especialistes en ciruxía, oncoloxía radioterápica, radiofísica, radioloxía, anatomapatoloxía y anestesia. Por otru, al amenorgar les aplicaciones a una sola sesión mengua la carga d'usuarios nes unidaes de tratamientu, lo que permite entainar los tratamientos a pacientes con otres patoloxíes.

N'Asturies detéctense cerca de 860 nuevos casos añales de cáncer de mama. D'ellos, más del 90% diagnostíquense con estadios alcontraos gracies a los programes de detección precoz. La supervivencia a los cinco años avérase al 85%.

Nes últimes décades, l'amplia investigación sobre'l cáncer de mama, xunida al desenvolvimientu de nuevos planteamientos terapéuticos, permitió ameyorar la supervivencia y adaptar les terapies a les característiques de cada tumor y paciente.

Envalórase qu’ una de cada ocho muyeres va carecer un tumor de mama a lo llargo de la so vida. L'avieyamientu de la población ye una de les causes qu'alza'l porcentaxe.

Información sobre el documento

© Copyright 2006. Gobiernu del Principau d'Asturies