Gobiernu del Principau d'Asturies

Asturies, muncho más cerca

Tas en

Asturias.es Persones con discapacidá Emplegu y discapacidá Educación pacta con tolos sindicatos docentes una reserva de ...
 

Emplegu y discapacidá

Educación pacta con tolos sindicatos docentes una reserva de places pa persones con discapacidá nes llistes d'interinos

El Principáu ye la cuarta comunidá qu'impulsa una iniciativa d'esta mena, que va dexar que pelo menos un 7 % de los puestos vacantes se destinen a esti colectivu . La midida va aplicase nes llistes de 14 de les 30 especialidaes convocaes pa les oposiciones de Secundaria y FP que se van celebrar esti mes

D'esquierda a derecha, Gumersindo Rodríguez FSES-ANPE; Maxi Fernández FeSP-UXT; el conseyeru d'Educación y Cultura, Genaro Alonso; Enma Rodríguez SUATEA; y Enrique Fernández CC OO

03/06/2016

El conseyeru d'Educación y Cultura, Genaro Alonso, soscribió güei con tolos sindicatos educativos (FSES-ANPE, FeSP-UXT, CC. OO. Enseñanza y Confederación Intersindical-Suatea) el primer alcuerdu pa establecer n'Asturies una reserva de places nes llistes d'interinos destinada al personal docente con discapacidá. Hasta agora, la normativa solo afitaba un cupu pa discapacidá nos procedimientos selectivos pa l'axudicación de places de funcionariu de carrera.

En concreto, la reserva va aplicase a aquelles especialidaes que'l so procedimientu selectivu pal ingresu llibre incluya espresamente un cupu destináu a persones con discapacidá. Coles mesmes, el Principáu garantiza que pelo menos un 7 % de les places vacantes ufiertaes nes convocatories d'interinos puedan ser axudicaes a esti colectivu.

Esti porcentaxe de reserva va ser idénticu en tou casu al incluyíu na última ufierta d'empléu públicu del Principáu y va xubir nel casu de que s’incremente nos años próximos.

El titular d'Educación, que tuvo acompañáu pol director xeneral de Personal Docente y Planificación Educativa, Roberto Suárez, esplicó que l'alcuerdu va afectar a les llistes d'aspirantes a interinidá que s'igüen a partir de la so entrada a valir. Por tanto, yá va tar vixente pa les oposiciones que se van celebrar esti mes y va estendese tamién a les próximes convocatories de bolses d'interinos de les mesmes especialidaes que tengan reserva.

A efectos prácticos, el cupu va aplicase a 14 de les 30 especialidaes convocaes pal próximu procedimientu selectivu de docentes de Secundaria y Formación Profesional. (Nel casu de Secundaria, va afectar a les especialidaes de Llingua Castellana y Lliteratura, Xeografía y Hestoria, Matemátiques, Física y Química, Bioloxía y Xeoloxía, Inglés, Educación Física, Orientación Educativa, Tecnoloxía, Economía y Alministración d'Empreses. En Formación Profesional va aplicase a Mecanizao y caltenimientu de máquines, Procesos de Xestión alministrativa, y Servicios a la Comunidá).

L'alcuerdu, que figura ente los compromisos de llexislatura del Gobiernu d'Asturies, constituye’l primer pactu de reserva de places de personal interino en tolos ámbitos de la función pública del Principáu. Con esta decisión, que foi debatida en dos meses sectoriales de negociación de personal docente y ratificada güei na mesa xeneral, Asturies súmase a les trés úniques comunidaes, Madrid, Canaries y Estremadura, que yá cunten con un sistema similar de reserva de places pa discapacidá pal personal interino docente.

(audios n'español)
    Audiu 1 (mp3: 396 Kb)
    Audiu 2 (mp3: 179 Kb)

Información sobre el documento

© Copyright 2006. Gobiernu del Principau d'Asturies