Gobierno del Principado de Asturias

Asturias, mucho más cerca

Estás en

Aniciu Temes Agricultura y montes El Gobiernu impulsa una estratexa de desenvolvimientu sostenible ...
 

Agricultura y montes

El Gobiernu impulsa una estratexa de desenvolvimientu sostenible p’Asturies basada nos retos de l'Axenda 2030

Va Incluyir midíes pa la llucha contra la probeza y la esclusión social, la movilidá, el cambéu climáticu y la transición enerxética. El fomentu de la investigación científica y técnica, la economía social y l'empléu van tener un papel fundamental

12/07/2020

El Gobiernu del Principáu impulsa, al traviés de la Conseyería de Presidencia, una estratexa de desenvolvimientu sostenible qu'asuma los retos de l'Axenda 2030 nes principales polítiques públiques y que dea continuidá al programa Asturies compromisu solidariu de la pasada llexislatura. El so fin ye afitar les prioridaes económiques, sociales y de progresu pa los próximos años y cumplir colos 17 oxetivos de desenvolvimientu sostenible que busquen la igualdá, la protección del planeta y la prosperidá por aciu un nuevu contratu social global que nun dexe a naide atrás.

Esti propósitu tien d’algamar, amás, encarando cinco grandes retos: establecer un modelu industrial competitivu cola ciencia como principal aliáu; consiguir más y meyor empléu; ufiertar unos servicios públicos accesibles, bien esplegaos nel territoriu, y d'alta calidá; garantizar la igualdá ente les persones, y atayar la despoblación, l'avieyamientu y la perda de población. De siguío resúmense dalgunes de les llinies de trabayu.

Llucha contra la probeza y l'esclusión. va establecese un sistema de prestaciones que cubra les necesidaes básiques de les persones vulnerables, col salariu social básicu como elementu nuclear. Tamién se van reconocer como un derechu les ayudes al arriendu y los complementos vitales a la infancia y a les persones con discapacidá o en situación de dependencia. Tamién se va ameyorar la calidá de la intervención técnica nos procesos d'esclusión coordinando les árees d'empléu y servicios sociales y fomentando l'acompañamientu personalizáu pa los demandantes d'empléu.

Igualdá. Pa garantizar la igualdá d'oportunidaes promoveráse la igualdá de xéneru, va garantizase la continuación de l'atención integral a les muyeres víctimes de violencia machista y va impulsase la participación de la muyer con un papel protagonista en tolos ámbitos de la sociedá.

Movilidá y urbanismu sostenible. La incorporación d'un plan de movilidá pa la ordenación del territoriu del área central d'Asturies que garantice la sostenibilidá económica, social y ambiental ye otra de les llinies de trabayu. La so finalidá ye actuar sobre les infraestructures pa facilitar el desplazamientu de persones y mercancíes y el progresu de la forma más sostenible y eficiente, favoreciendo'l tresporte públicu frente al priváu. Tamién va incorporar criterios p'asegurar l'usu racional del suelu y la meyora de la compacidá y l'equilibriu urbanu mesmo que los principios de desenvolvimientu sostenible.

Cambéu climáticu. El Principáu impulsó la creación d'una comisión mista integrada polos axentes sociales y económicos que ta evaluando l'impactu de la transición enerxética n'Asturies. Amás, va crease un órganu colexáu de calter consultivu pa garantizar la coordinación de les acciones alministratives y de gobiernu que se pongan en marcha en materia de cambéu climáticu. Antemanar l'impactu de la transición enerxética va permitir desenvolver midíes territorializaes n'aplicación del Plan Nacional Integráu d'Enerxía y Clima, lo que va aumentar la xeneración d'enerxía con fontes anovables y l'amenorgamientu d'emisiones de gases d'efectu invernaderu.

Educación ya investigación. La educación va siguir siendo una prioridá, al igual que l'impulsu a la investigación científica y técnica. Por ello, siguirá impulsándose la convocatoria d'ayudes postdoctorales a institutos universitarios d'investigación y acreditación de centros d'excelencia. Tamién se van caltener les escueles rurales.

Economía social. Pa favorecer la economía social tán previstes convocatories d'ayudes y subvenciones pa fomentar el asociacionismu ente les cooperatives y sociedaes llaborales y potenciar el autoempléu colectivu.

Gobiernu abiertu. L'aprobación de la Llei 8/2018 de 14 de setiembre, de Tresparencia, Bon Gobiernu y Grupos d'Interés del Principáu va completase con una Llei de Participación Ciudadana que ta anguaño n'ellaboración. La primera d'estes normes aumenta la tresparencia de l'acción de gobiernu y facilita l'accesu a la información y la rindición de cuentes. La segunda va regular los mecanismos que favorecen la participación de la ciudadanía na esfera pública.

Información sobre el documento

© Copyright 2006. Gobierno del Principado de Asturias