Gobiernu del Principau d'Asturies

Asturies, muncho más cerca

Tas en

Asturias.es Gobiernu El Principáu promociónase como destín de naturaleza nel IV ...
 

Gobiernu

El Principáu promociónase como destín de naturaleza nel IV Congresu Nacional d’ Ecoturismu

- El Gobiernu d’ Asturies presenta en Guadix, Granada, la so estratexa de promoción ya impulsa la so comercialización internacional

13/11/2019

El Gobiernu d'Asturies participa esta selmana nel IV Congresu Nacional de Ecoturismu, que se celebra dende güei y hasta’l próximu vienres na localidá de Guadix, en Sierra Nevada, Granada. La participación del Principáu enmárcase na so estratexa pa promocionar ya impulsar la comercialización del turismu de naturaleza nos mercaos nacional ya internacional.

La viceconseyera de Turismu, Graciela Blanco, asistió güei a la inauguración del congresu, que na so cuarta edición preséntase sol xenéricu Ecoturismu: una oportunidá pa la España Rural. La secretaria d'Estáu, Isabel Oliver, presidió l'apertura institucional, a la que tamién asistió la directora xeneral de Deporte del Gobiernu asturianu, Beatriz Álvarez Mesa.

Diverses empreses asturianes d'agospiamientu, turismu deportivu y ecoturismu de la Comarca Fuentes del Narcea, Somiedu y Picos d'Europa participaron n'una bolsa de contratación con diez operadores internacionales especializaos en naturaleza, aventura y observación de fauna selvaxe. L'oxetivu de la delegación asturiana ye'l d'impulsar la comercialización de servicios qu'asitien Asturies como destín ecoturista en Reinu Uníu, Alemaña, Francia, Noruega y Estaos Xuníos.

Asturies va tener la oportunidá de presentar la so estratexa de promoción del Ecoturismo mañana xueves, dientro d'un programa diseñáu pa aldericar y buscar soluciones sobre cómo l’ecoturismu puede contribuyir al desenvolvimientu de la España rural.

El Programa Estratéxicu de Turismu Sostenible d'Asturies 2020 establez el turismu rural y de naturaleza como dos de los sos productos de cabecera, fundamentales pa contribuyir a la sostenibilidá del sector y l'equilibriu territorial. La estratexa turística asturiana va na llinia de la estratexa estatal actual, alliniada coles metes reflexaes n'otres iniciatives d'ámbitu nacional como la Estratexa contra la Despoblación, la Estratexa Estatal d'Infraestructures Verdes, o'l Plan Sectorial de Turismu de Naturaleza y Biodiversidá.

Información sobre el documento

© Copyright 2006. Gobiernu del Principau d'Asturies