Gobiernu del Principau d'Asturies

Asturies, muncho más cerca

Tas en

Asturias.es Temes Mediu Ambiente La Rede de Varamientos de Cetáceos estudia los restos d’un ...
 

Mediu Ambiente

La Rede de Varamientos de Cetáceos estudia los restos d’un rorcual norteñu localizáu nuna playa de Ribeseya

Trátase d’una especie poco común nesta zona y más habitual en agües templaes del hemisferiu sur

Rorcual varado

28/09/2020

La Rede de Varamientos de Cetáceos, recién creada, analiza los restos d’un rorcual norteñu (Balaenoptera borealis) atopaos na playa de Arra, en Ribeseya. Ello ye un machu xuvenil de 7,8 metros de llargo y dos tonelaes de pesu.

Depués de recibir el 112 una llamada na que se daba alerta de la presencia del cetáceu, activóse’l protocolu y técnicos y axentes del Mediu Natural allegáronse hasta ellí. El rorcual norteñu ye una especie poco común nesta parte, y hasta agora, nun consten varamientos d’estos exemplares nel Ministeriu pa la Transición Ecolóxica y el Retu Demográficu. Estos cetáceos viven nos más de los océanos y mares del planeta, dende agües tropicales hasta polares de los dos hemisferios, pero la so presencia ye más frecuente en partes templaes del hemisferiu sur. La Unión Internacional pa la Conservación de la Naturaleza considera qu’esta especie ta en peligru.

Los técnicos pudieron ver que l’exemplar nun tien feríes esternes que pudieren causa-y la muerte, polo qu’esta pudo venir de causes naturales. Recoyéronse datos biométricos y muestres biolóxiques p’analiza y van monitorizase continuamente tol procesu de degradación natural de los restos, como parte d’una experiencia pilotu na que participa también el Centru d’Esperimentación Pesquera (CEP) de Xixón. L’envís ye afondar na conocencia del ecosistema marín asturianu pal lograr una xestion meyor de los recursos nel futuru.

Depués de consultar al grupu de trabayu de la Rede de Varamientos de Cetáceos, decidióse nun retirar los restos, al resultar prácticamente imposible por nun haber acceso rodáu a la zona y falta de caláu bastante pa sacalu per mar.

Información sobre el documento

© Copyright 2006. Gobiernu del Principau d'Asturies