Gobiernu del Principau d'Asturies

Asturies, muncho más cerca

Tas en

Asturias.es El Gobiernu d’Asturies entama esta selmana’l procesu de ...
 

Aniciu

El Gobiernu d’Asturies entama esta selmana’l procesu de participación pública del plan de calidá del aire de la zona oeste de Xixón

El vicepresidente Juan Cofiño anuncia que’l l proyectu incluye la instalación d’una estación fixa medidora de la contaminación en Xove, que se va incorporar a la rede del Principáu

Un momento de la comparecencia

19/10/2020

El Gobiernu d'Asturies va sacar a información pública esta selmana'l plan d'acción al curtiu plazu pa la meyora de la calidá del aire na zona oeste de Xixón, ellaboráu pola Viceconseyería de Mediu Ambiente y Cambéu Climáticu, cola collaboración del Conceyu.

El vicepresidente del Principáu, Juan Cofiño, anunció güei na Comisión d'Alministración Autonómica, Mediu Ambiente y Cambéu Climáticu de la Xunta Xeneral que'l documentu yá s'unvió al Boletín Oficial del Principáu (Bopa).

El conseyeru indicó que'l plan incorpora un diagnósticu de los problemes que provoquen elevaos niveles de partícules en suspensión na atmósfera de la zona oeste de la ciudá. Nesti sentíu, esplicó que pa esta evaluación utilizáronse, amás de la información suministrada pola estación de midida de la rede del Principáu allugada na avenida de l'Arxentina, datos de diverses campañes realizaes con unidaes móviles de l'Alministración autonómica y del Conceyu n'El Cerilleru, Xove y El Lloredal, lo mesmo que de les estaciones d'empreses y del puertu.

Tamién se tuvieron en cuenta diversos estudios encargaos pola conseyería. Ente ellos, Cofiño citó como'l más relevante'l realizáu pol Institutu de Salú Carlos III, por tratase del Llaboratoriu Nacional de Referencia de Calidá del Aire, qu'analizó la implantación de toles estaciones públiques de l’aglomeración de Xixón y plantega encamientos pa reasitiar dalgunes d'elles.

El titular de Mediu Ambiente avanzó que’l so departamentu yá empecipió la llicitación p'adquirir la nueva estación mididora de la calidá del aire, que se va integrar na rede de control del Principáu y va instalase nel primer semestre de 2021. Esti equipamientu, que figura nel plan pa la zona oeste, va dotase de mididores de partícules PM10 y PM2,5, óxidos de nitróxenu, dióxidu d'azufre, monóxidu de carbonu, bencenu, toluenu y xilenu. Tamién va cuntar con una estación meteorolóxica que permita la caracterización de los vientos predominantes al respective de les fontes industriales. La conseyería, acordies col Conceyu, escoyó allugar la estación na redolada del local de l'Asociación de Vecinos Santa Cruz de Xove.

Información sobre el documento

© Copyright 2006. Gobiernu del Principau d'Asturies