Gobiernu del Principau d'Asturies

Asturies, muncho más cerca

Tas en

Asturias.es Constituyóse la Xunta d’Espurgo de documentos xudiciales
 

Aniciu

Constituyóse la Xunta d’Espurgo de documentos xudiciales

Esti órganu va ser l'encargáu de determinar la eliminación de los espedientes procesales o la tresferencia al Principáu pal so caltenimientu. La Dirección Xeneral de Xusticia ultima un contratu esternu pa la prestación del serviciu de recoyida y custodia de los fondos

De izquierda a derecha, el teniente fiscal Joaquín de la Riva; Marta Álvarez, jefa de servicio de Relaciones con la Administración de Justicia de la Dirección General de Justicia; Raquel Martínez, secretaria de gobierno del Tribunal Superior de Justicia de Asturias; Conchita Paredes, directora del Archivo Histórico de Asturias, y el presidente del Tribunal Superior de Justicia de Asturias, Ignacio Vidau, en la reunión de constitución de la Junta de Expurgo

12/07/2018

El Gobiernu d'Asturies, el Tribunal Superior de Xusticia (TSXA) y la Fiscalía Superior punxeron güei en marcha la Xunta d’Espurgo de documentos xudiciales, un órganu colexáu que va encargase de decidir la eliminación de los espedientes procesales o la so tresferencia al Principáu, cuando pol so valor históricu o documental tengan de caltenese.

La Xunta d’Espurgo, que foi creada mediante’l Decretu 90/2013, de 30 d'ochobre, nel que se determina la so organización, composición y funcionamientu, ye un organismu de naturaleza alministrativa adscritu a la Conseyería de Presidencia y Participación Ciudadana, el departamentu competente en materia de xusticia, que va facilitar los medios materiales y el soporte alministrativu y técnicu pal so funcionamientu.

Ta compuesta por cinco persones. De primeres, la presidencia recái nel presidente del Tribunal Superior de Xusticia del Principáu d'Asturies y la secretaría va ocupala un funcionariu adscritu a la Conseyería de Presidencia. Amás, va cuntar con trés vocales: un miembru de la carrera fiscal, el titular de la secretaría de gobiernu de la TSXA y un técnicu superior especialista del Arquivu Históricu d'Asturies.

L'empiezu de l'actividá de la xunta ye una de les acciones previstes pol Gobiernu d'Asturies pa poner en marcha un Plan d'Arquivos Xudiciales y acometer una actuación integral nos espacios d'almacenamientu de xulgaos y tribunales.

Como pasu previu a esta actuación, nos años últimos treslladóse distinta documentación al Arquivu Históricu d'Asturies. Amás, en payares del 2017 la Dirección Xeneral de Xusticia contrató un serviciu esternu de tratamientu archivísticu de los espedientes obrantes nel arquivu xeneral de la sede xudicial de la cai Concepción Arenal, n'Uviéu, al que se destinaron 21.659 euros.

Nesti casu, les actuaciones consistieron na preparación física de la documentación (eliminación d'elementos de suxeción, doblaos y escritos non necesarios), y la descripción normalizada de cada espediente nuna base de datos, llogrando un aprovechamientu racional del espaciu y una clasificación de los arquivos qu'ameyora los criterios de busca y localización d'espedientes.

Cola mira d’avanzar nesta llinia y de cara a la puesta en marcha del Plan d'Arquivos Xudiciales, el Gobiernu d'Asturies tramita anguaño un contratu esternu plurianual, hasta 2019, pa la prestación del serviciu de recoyida, arquivu y custodia de fondos documentales de los órganos xudiciales, que'l so preciu base de llicitación estímase en 570.000 euros. Va ser precisamente la Xunta d’Espurgo la que determine los espedientes que pueden ser destruyíos, al perder la so utilidá, y cuálos tienen de ser calteníos pol so valor históricu o cultural.

 

 

Información sobre el documento

© Copyright 2006. Gobiernu del Principau d'Asturies