Gobiernu del Principau d'Asturies

Asturies, muncho más cerca

Tas en

Asturias.es Los artistes mozos Andrea Rubio, Ricardo Villoria y Adrián ...
 

Aniciu

Los artistes mozos Andrea Rubio, Ricardo Villoria y Adrián Martínez van esponer esta temporada na Sala Borrón

Los trés resultaron escoyíos na última convocatoria del Principáu pa nuevos creadores plásticos. Per esti espaciu uviedín pasaron 369 propuestes artístiques de magar s’inauguró en 1987

10/02/2019

Los artistes mozos asturianos Andrea Rubio Fernández, Ricardo Fernández Suárez -conocíu como Ricardo Villoria-, y Adrián Martínez González van amosar los sos trabayos na Sala Borrón na temporada 2019-2020. Los creadores foron escoyíos dientro del programa d’esposiciones que convoca la Conseyería de Presidencia y Participación Ciudadana, al traviés del Institutu Asturianu de la Mocedá.

Una comisión técnica formada por Luis Feás Costilla, críticu d’arte y comisariu d’esposiciones; Natalia García, xestora cultural; Lydia Santamarina, directora del Muséu Barjola, y Marta Fermín, artista y propietaria de la galería uviedina Decero escoyeron los proyectos de los trés artistes p’amosalos na Sala Borrón. Amás, dada la calidá de los trabayos presentaos, tamién designaron trés reserves: Ana Pérez Valdés, Sabela Prendes López y Elena Menéndez Muñoz.

A esta iniciativa, que forma parte del programa CulturaAquí, podíen presentase artistes o colectivos asturianos, naturales o residentes nel Principáu, o descendientes hasta segundu grau d’emigrantes, que la so edá nun superare los 35 años a 31 d’avientu del 2018. Los creadores podíen presentar propuestes de toa clas (pintura, escultura, fotografía, dibuxu, instalaciones, videoinstalaciones) con tema, técnica y materiales d’elección llibre.

La programación anual de la sala va completase cola XXIX Muestra d’Arte Mozu del Principáu d’Asturies, los proyectos de la Escuela d’Arte d’Uviéu y de Taller 3, el Certame Nacional d’Arte de L.luarca y el Premiu Asturies Mozu d’Artes Plástiques 2018, que ganó Tania Blanco Prieto. Tamién se van amosar propuestes d’arte mozu de Madrid y de Castiella y Llión.

Dende la so apertura en 1987, per esti espaciu pasaron 369 propuestes artístiques, 176 individuales y 193 colectives, de creadores procedentes d’España, Gran Bretaña, Alemaña y Suíza, ente otros.



Los artistes

Andrea Rubio Fernández (Mieres, 1990) ye llicenciada en Belles Artes pola Universidá Complutense de Madrid. Tamién cursó’l master Artes Visuales y Educación. Un enfoque construccionista na Universidá de Granada, onde ye doctoranda nel programa Historia y Artes UGR llinia: creación artística, audiovisual y reflexón crítica. Nel 2014 realizó la so primer esposición individual, titulada La metáfora educativa a través de la escultura, y nel 2017 amosó’l so trabayu nel Centru Cultural Valey de Castrillón. Amás, participó en munches muestres colectives y tien delles publicaciones.

Ricardo Villoria (Llangréu, 1986) cursó Gráfica Publicitaria na Escuela d’Arte d’Uviéu y tien formación en videu y illuminación. Anguaño trabaya como creativu n’Editorial Prensa Ibérica, na dirección, producción y edición de videu pa dellos medios de comunicación, amás de na creación de videoclips y curtios, ente otros proyectos. Tien un estudiu de diseñu propiu y recibió’l premiu Laus de bronce a la meyor dirección d’arte en fotografía nel 2014.

Adrián Martínez González (Uviéu, 1989) cursó’l ciclu de grau superior de Formación Profesional en Grabáu y Técniques d’estampación na Escuela d’Arte d’Uviéu y el grau de Belles Artes na Universidá de Salamanca. Nel 2018, protagonizó la so primer esposición individual nel Centru Cultural de la Fresneda. Tamién participó en muestres colectives y na actualidá ye profesor de pintura y talla en madera nos cursos qu’imparte’l Conceyu d’Uviéu.

Información sobre el documento

© Copyright 2006. Gobiernu del Principau d'Asturies