Gobiernu del Principau d'Asturies

Asturies, muncho más cerca

Tas en

Asturias.es Información de los Conceyos El Principáu y el Conceyu de Xixón van ellaborar un plan a un ...
 

Información de los Conceyos

El Principáu y el Conceyu de Xixón van ellaborar un plan a un plazu curtiu p’ameyorar la calidá del aire na zona oeste de la ciudá

El documentu va concretar l’aplicación de midíes nes industries averaes, l’actividá portuaria, la movilidá y la información a la población

El consejero de Desarrollo Rural, Agroganadería y Pesca y presidente del comité de organización, Alejandro Calvo, presidiendo la reunión; el presidente de honor, Santiago Menéndez de Luarca, a la dcha del consejero; el concejal del Ayuntamiento de Oviedo, Alfredo García Quintana cuarto por la izda; la viceconsejera de Turismo, Graciela Blanco tercera por la izda y la Dtora. Gral. de Desarrollo Rural e Industrias Agrarias, Begoña López (2ª por la izda)

06/02/2020

La Conseyería d’Infraestructures, Mediu Ambiente y Cambéu Climáticu y el Conceyu de Xixón van ellaborar un plan d’acción a un plazu curtiu p’ameyorar la calidá del aire na zona oeste de Xixón. La iniciativa va incluyir midíes pa desenvolver hasta’l 2021 nes industries averaes, l’actividá portuaria, amás d’actuaciones en movilidá y d’información a la población.

Asina lo anunció güei la viceconseyera de Mediu Ambiente y Cambéu Climáticu, Nieves Roqueñí, nuna rueda de prensa xunto al conceyal de Mediu Ambiente y Movilidá del Conceyu de Xixón, Aurelio Martín.

Roqueñí indicó que, de manera específica, van incluyise aquelles midíes a les que se refier como “situaciones especiales d’inmisión” la ordenanza reguladora de protección del mediu ambiente atmosféricu, que’l Conceyu aprobó en mayu del 2017. A estos efectos, el plan va desenvolver l’artículu 54 de la ordenanza mentada.

La viceconseyera señaló que dambes alministraciones son sabedores del problema existente na zona oeste de la ciudá tocante a la calidá del aire. Por eso, sorrayó que “nel ánimu de proponer soluciones específiques, alcordemos trabayar a comuña nel diseñu d’esi plan”.

Roqueñí avanzó que nes selmanes vinientes van llevase a cabu contactos colos axentes “consideraos relevantes pa los oxetivos de meyora, como son l’Autoridá Portuaria de Xixón; el Ministeriu de Tresportes, Movilidá y Axenda Urbana; empreses industriales de la zona, sobre manera la empresa ArcelorMittal, y asociaciones de vecinos”. El documentu inicial va sometese a información pública nos meses vinientes.

La llexislación de calidá del aire cunta ellaborar planes d’acción a un plazu curtiu cuando nuna zona o una aglomeración determinada exista’l riesgu de que’l nivel de contaminantes supere ún o dellos valores tope. Estos documentos van indicar les midíes que se tienen qu’adoptar p’amenorgar el riesgu de superación o la so duración, esplicó la responsable de Mediu Ambiente.

La calidá del aire del conceyu de Xixón evalúase con seis estaciones que formen parte de la Rede de Control de la Calidá del Aire del Principáu d’Asturies. Dende’l 2014, últimu añu nel qu’hubo superaciones del valor tope llegal de partícules en suspensión PM10 na estación de l’avenida de l’Arxentina, la calidá del aire na zona cumple coles directives europees, remarcó la viceconseyera.

“Sicasí, y a pesar del éxitu de los planes de calidá del aire desenvueltos pol Principáu dende’l 2014, identificóse una problemática específica en cuantes a les partícules PM10 na zona oeste de Xixón, sobre manera na zona de Xove-El Lauredal”, amestó Roqueñí. Asina, los datos rexistraos nes dos estaciones móviles allugaes na zona (la del Conceyu de Xixón, nel parque d’El Lauredal dende agostu del 2017; y la del Principáu, en Xove, dende febreru del 2019) son más altos que los de les estaciones averaes, sobre manera cuando se dan episodios de mala ventilación atmosférica, por inversión térmica y ausencia de vientos y agua.

El Principáu aprobó n’agostu del 2018 un protocolu d’actuación en casu d’episodios de contaminación del aire pa tola zona central d’Asturies. “Esti instrumentu paez nun tener la sensibilidá afayadiza pa responder a les situaciones que se dan nesta zona de Xixón, onde confluyen emisiones industriales, de tráficu y derivaes de les operaciones portuaries”, indicó.

Icono gráfico alusivo al tipo de archivo Audiu (Audiu: 676 Kb) (n'español)

Información sobre el documento

© Copyright 2006. Gobiernu del Principau d'Asturies