Gobiernu del Principau d'Asturies

Asturies, muncho más cerca

Tas en

Asturias.es Temes Artesanía y comerciu Desenvolvimientu Rural vaticina un “añu históricu” pa la DOP ...
 

Artesanía y comerciu

Desenvolvimientu Rural vaticina un “añu históricu” pa la DOP Sidra d’Asturies depués de la incorporación de 54 variedaes nueves de mazana y ocho llagares

La conseyera María Jesús Álvarez aseguró nel Festival de Villaviciosa que se va producir un “aumentu importantísimu” de botelles con “calidá altísima” depués del récord de ventes del 2016

Alcalde de Villaviciosa, Alejando Vega; consejera de Desarrollo Rural y Recursos Naturales, María Jesús Álvarez, y el presidente de la DOP Sidra de Asturias, Celestino Cortina

12/10/2017

La conseyera de Desenvolvimientu Rural y Recursos Naturales, María Jesús Álvarez, manifestó que’l 2017 va ser un añu “históricu” pa la Denominación d’Orixe Protexida (DOP) Sidra d’Asturies “porque dimos un pasu de xigante cola incorporación de 54 variedaes nueves de mazana, lo que dexa integrar na marca tola sidra natural ellaborao con mazana asturiano”. Esti fechu súmase a la unión d’ocho llagares nuevos y, en particular, a la inclusión de productores de la llamada “sidra selección”.

Desenvolvimientu Rural impulsó “con determín esti proyectu cola modificación del pliegu de la DOP pa incorporar les variedaes nueves y el so rexistru nel Ministeriu d’Agricultura”, dixo Álvarez na visita que realizó esta tarde al Festival de la Mazana de Villaviciosa. “El procesu va siguir cola incorporación progresiva de más variedaes, desque les determinen el comité técnicu, les alministraciones y les autoridaes científiques, col fin d’algamar un volume de producción que, nun llustru, dexe consolidar cifres estratéxiques y determinantes”, añedió.

La conseyera señaló qu’esti proyectu ye’l resultáu “d’un procesu llargu de negociación y alcuerdu onde participaron llagareros y productores, siempre col sofitu y collaboración de la conseyería”. Amás, reconoció’l papel protagonista del conseyu regulador, aparte de “la visión y l’interés de los llagareros de la conocida como sidra selección pa facer llegar a bon puertu esti plan, con una visión estratéxica que dexa multiplicar, y enforma, la sidra amparao pol sellu de la DOP y ameyorar la posición nel mercáu”.

Amás, Álvarez resaltó’l llabor del Serida porque, según aseguró, “esti oxetivu nun diba ser posible ensin el sustratu científico-técnicu realizáu nos postreros 30 años polos investigadores d’esti organismu, tanto en recoyida como na caracterización y meyora de les variedaes locales, rematando asina la misión de la entidá de responder a les demandes del sector asturianu”. “Esti trabayu evidencia la rentabilidá qu’apurre la inversión n’investigación pa una sociedá activa y moderna que, como l’asturiana, quier progresar esplotando racional y sosteniblemente los sos propios recursos, tradiciones y capacidaes”, remarcó.

La incorporación de llagareros a la DOP Sidra d’Asturies y de les variedaes nueves de mazana va suponer una “medría perimportante nel mercáu” de botelles de sidra con “calidá altísima”, depués del récord de ventes del añu pasáu, cuando aumentaron un 10 %, cuasi dos millones de botelles. Asina, la medría nesta bébora singular ye “cualitativa y cuantitativa nun momentu en que Sidra d’Asturies ye una realidá puxante, viva y n’espansión”, precisó la conseyera.

 

   Icono gráfico alusivo al tipo de archivo Audiu (Audiu: 841 Kb) (n'español) 

Información sobre el documento

© Copyright 2006. Gobiernu del Principau d'Asturies