Gobiernu del Principau d'Asturies

Asturies, muncho más cerca

Tas en

Asturias.es Temes Cultura L'Institutu de la Mocedá convoca'l programa d'esposiciones ...
 

Cultura

L'Institutu de la Mocedá convoca'l programa d'esposiciones p’artistes xóvenes de la Sala Borrón

El plazu pa presentar la documentación remata'l vienres próximu. Dende la so apertura en 1987, pel espaciu pasaron 360 propuestes artístiques españoles y d'otros países

09/12/2019

L'Institutu Asturianu de la Mocedá convoca'l programa d'esposiciones d’artistes plásticos xóvenes del Principáu d'Asturies pa la Sala Borrón mientres la temporada 2020-21. A esti programa pueden presentase artistes o colectivos de creadores asturianos, naturales o residentes nel Principáu, o descendientes hasta segundu grau d'emigrantes asturianos, que la so edá nun supere los 35 años al 31 d'avientu de 2019.

Puede presentase cualquier propuesta artística de pintura, escultura, fotografía, dibuxu, instalaciones o videoinstalaciones. El tema, la técnica y los materiales van ser d’elección llibre y el plazu pa optar a amosar la obra nel espaciu espositivu uvieín remata'l vienres próximu.

La programación pa la temporada 2020 va completase coles Muestres d'Arte Xoven del Principáu d'Asturies 2019; los proyectos de la Escuela d'Arte d'Uviéu y de Taller 3; el Certame Nacional d'Arte de L.luarca, y el Premiu Asturies Xoven d'Artes Plástiques 2019. Tamién van presentase propuestes d'arte xoven de Madrid y Castiella y Llión.

Mientres la temporada que ta próxima a rematar, la sala Borrón amosó'l trabayu de los artistes Miguel Braceli y Tamara Norniella, amás d'autores escoyíos del Certame d'Arte Xoven de Castiella y Llión. Asina mesmo, l'espaciu acoyó la XXIX Muestra d'Artes plástiques del Principáu; el Proyectate EAO´19 y l'amuesa de los trabayos de Taller 3. Tamién s'espunxeron les obres de los ganadores del Certame Nacional d'Arte de L.luarca, de los Circuitos d'Artes Plástiques de la Comunidá de Madrid y de Tania Blanco, Premiu Asturies Xoven d'Artes Plástiques 2018.

Dende la so apertura en 1987, pasaron pela Sala Borrón un total de 360 propuestes artístiques, 172 individuales y 188 colectives, de creadores nacionales y internacionales procedentes de Gran Bretaña, Alemaña o Suiza, ente otros países más.

Información sobre el documento

© Copyright 2006. Gobiernu del Principau d'Asturies